Въ четверто́къ первой седми́цы

Пѣ́снь а҃. Гла́съ ѕ҃.

І҆рмо́съ: Помо́щник и҆ покро́витель бы́сть мнѣ̀ во спасе́нїе, се́й мой бг҃ъ, и҆ прославлю є҆гѡ: бг҃ъ ѻ҆ц҃а моегѡ̀, и҆ вознесꙋ̀ є҆гѡ̀: сла́внѡ бо просла́висѧ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

А҆гнче Бж҃їй, взе́млѧй грѣхѝ всѣ́хъ, возмѝ бре́мѧ ѿ менѐ тѧ́жкое грѣхо́вное, и҆ ꙗ҆́кѡ бл҃гоꙋтро́бенъ, да́ждь мѝ сле́зы ᲂу҆миле́нїѧ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Тебѣ̀ припа́даю І҆и҃се, согрѣши́хъ тѝ, ѡ҆чи́сти мѧ̀, возмѝ бре́мѧ ѿ менѐ тѧ́жкое грѣхо́вное, и҆ ꙗ҆́кѡ бл҃гоꙋтро́бенъ, да́ждь мѝ сле́зы ᲂу҆миле́нїѧ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Не вни́ди со мно́ю въ су́дъ, носѧ̀ моѧ̀ дѣѧ̑нїѧ, словеса̀ и҆зыску́ѧ, и҆ и҆справлѧ́ѧ стремле́нїѧ: но въ щедро́тахъ твои́хъ, презира́ѧ моѧ̀ лю́таѧ, спаси́ мѧ Всеси́льне.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Покаѧ́нїѧ вре́мѧ, прихожду̀ тѝ Созда́телю моему̀, возмѝ бре́мѧ ѿ менѐ тѧ́жкое грѣхо́вное, и҆ ꙗ҆́кѡ бл҃гоꙋтро́бенъ, да́ждь мѝ сле́зы ᲂу҆миле́нїѧ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Бога́тство душе́вное и҆жди́въ грѣхо́мъ, пу́стъ є҆́смь добродѣ́телей благочести́выхъ, гла́дствуѧ же зову̀: ми́лости пода́телю Гдⷭ҇и, спаси́ мѧ.

Припѣ́въ: Прпⷣбнаѧ ма́ти марі́е, молѝ бг҃а ѡ҆ на́съ.

Прикло́ншисѧ Хрⷭ҇то́вымъ бж҃е́ственнымъ закѡ́номъ, къ сему̀ приступи́ла є҆сѝ, сла́достей неудержи́маѧ стремле́нїѧ ѡ҆ста́вивши, и҆ всѧ́кую добродѣ́тель всебл҃гоговѣ́йно ꙗ҆́кѡ є҆ди́ну и҆спра́вила є҆сѝ.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ.

Трⷪ҇ченъ: Пресꙋ́щнаѧ трⷪ҇це, во є҆ди́ницѣ покланѧ́емаѧ, возмѝ бре́мѧ ѿ менѐ тѧ́жкое грѣхо́вное, и҆ ꙗ҆́кѡ благоꙋтро́бна, да́ждь мѝ сле́зы ᲂу҆миле́нїѧ.

И҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Бг҃оро́диченъ: Бцⷣе, наде́жде и҆ предста́тельство тебѐ пою́щихъ, возмѝ бре́мѧ ѿ мене тѧ́жкое грѣхо́вное, и҆ ꙗ҆́кѡ влⷣчца чⷭ҇таѧ, ка́ющасѧ прїими́ мѧ.

Пѣ́снь в҃.

І҆рмо́съ: Ви́дите ви́дите, ꙗ҆́кѡ а҆́зъ є҆́смь Бг҃ъ, ма́нну ѡ҆дожди́вый, и҆ во́ду и҆з̾ ка́мене и҆сточи́вый дре́вле въ пусты́ни лю́демъ мои́мъ, десни́цею є҆ди́ною и҆ крѣ́постїю мое́ю.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Му́жа ᲂу҆би́хъ, глаго́летъ, въ ꙗ҆́зву мнѣ̀ и҆ ю҆́ношу въ стру́пъ, Ламе́х̾ рыда́ѧ вопїѧ́ше: ты́ же не трепе́щеши, ѽ душѐ моѧ̀, ѡ҆калѧ́вши пло́ть и҆ ᲂу҆́мъ ѡ҆скверни́вши.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Сто́лпъ ᲂу҆мудри́ла є҆сѝ созда́ти, ѽ душѐ, и҆ ᲂу҆твержде́нїе водрузи́ти твои́ми похотмѝ, а҆́ще не бы̀ Зижди́тель ᲂу҆держа́лъ совѣ́ты твоѧ̀, и҆ низве́рглъ на зе́млю ᲂу҆хищре́нїѧ твоѧ̀.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Ѽ ка́кѡ поревнова́хъ Ламе́ху пе́рвому ᲂу҆бі́йцѣ, ду́шу ꙗ҆́кѡ му́жа, ᲂу҆́мъ ꙗ҆́кѡ ю҆́ношу, ꙗ҆́кѡ бра́та же моего̀ тѣ́ло ᲂу҆би́въ, ꙗ҆́кѡ Ка́їнъ ᲂу҆бі́йца, любостра́стными стремле́нми.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Ѡ҆дождѝ Гдⷭ҇ь ѿ Гдⷭ҇а ѻ҆́гнь и҆ногда̀ на беззако́нїе гнѣ́вающее, соже́гъ Содо́млѧны: ты́ же ѻ҆́гнь вжегла̀ є҆сѝ гее́нскїй въ не́мже и҆́маши сожещи́сѧ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Оу҆ѧзви́хсѧ, ᲂу҆ра́нихсѧ, сѐ стрѣ́лы вра́жїѧ, ᲂу҆ѧзви́вшыѧ мою̀ ду́шу и҆ тѣ́ло: сѐ стру́пи, гное́нїѧ и҆ ѡ҆мраче́нїѧ, вопїю́тъ ра́ны самово́льныхъ, ѽ душѐ, мои́хъ страсте́й.

Припѣ́въ: Прпⷣбнаѧ ма́ти марі́е, молѝ бг҃а ѡ҆ на́съ.

Просте́рла є҆сѝ ру́цѣ твоѝ къ ще́дромꙋ Бг҃у, Марі́е, въ бе́зднѣ ѕѡ́лъ погружа́емаѧ: и҆ ꙗ҆́коже Петру̀ чл҃вѣколю́бнѡ ру́ку боже́ственную прострѐ, твоѐ ѡ҆браще́нїе всѧ́чески и҆ща́й.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ.

Трⷪ҇ченъ: Безнача́льнаѧ несозда́ннаѧ Трⷪ҇це, нераздѣ́льнаѧ є҆ди́нице, ка́ющасѧ мѧ̀ прїимѝ, согрѣши́вша спасѝ, твоѐ є҆́смь созда́нїе, не пре́зри, но пощадѝ, и҆ и҆зба́ви мѧ̀ ѻ҆́гненнагѡ ѡ҆сужде́нїѧ.

И҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Бг҃оро́диченъ: Пречи́стаѧ Влⷣчце, Бг҃ороди́тельнице, наде́ждо къ тебѣ̀ притека́ющихъ, и҆ приста́нище су́щихъ въ бу́ри, ми́лостиваго и҆ Созда́телѧ и҆ Сн҃а твоего̀ ᲂу҆ми́лостиви и҆ мнѣ̀ моли́твами твои́ми.

Пѣ́снь г҃.

І҆рмо́съ: Оу҆твердѝ, Гдⷭ҇и, на ка́мени за́повѣдей твои́хъ подви́гшеесѧ се́рдце моѐ, ꙗ҆́кѡ є҆ди́нъ ст҃ъ є҆сѝ и҆ Гдⷭ҇ь.

Припѣ́въ: Поми́лꙋй мѧ̀, бж҃е, поми́лꙋй мѧ̀.

А҆га́рѣ дре́влѣ, душѐ, Е҆гѵ́птѧнынѣ ᲂу҆подо́биласѧ є҆сѝ, порабо́тившисѧ произволе́нїемъ, и҆ ро́ждши но́вагѡ І҆сма́ила, презо́рство.

Припѣ́въ: Поми́лꙋй мѧ̀, бж҃е, поми́лꙋй мѧ̀.

І҆а́кѡвлю лѣ́ствицу разумѣ́ла є҆сѝ, дꙋшѐ моѧ̀, ꙗ҆влѧ́емую ѿ землѝ къ небесе́мъ: почто̀ не и҆мѣ́ла є҆сѝ восхо́да тве́рда, благоче́стїѧ;

Припѣ́въ: Поми́лꙋй мѧ̀, бж҃е, поми́лꙋй мѧ̀.

Свѧще́нника Бж҃їѧ и҆ Цр҃ѧ̀ ᲂу҆едине́на, Хрⷭ҇то́во подо́бїе, въ ми́рѣ житїѧ̀ въ человѣ́цѣхъ подража́й.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Ѡ҆брати́сѧ, постенѝ душѐ ѻ҆каѧ́ннаѧ, пре́жде да́же не прїи́метъ коне́цъ житїѧ̀ торжество̀, пре́жде да́же две́рь не заключи́тъ черто́га Гдⷭ҇ь.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Не бу́ди сто́лпъ сла́ный, душѐ, возврати́вшисѧ вспѧ́ть, ѡ҆́бразъ да ᲂу҆страши́тъ тѧ̀ Содо́мскїй, горѣ̀ въ Сигѡ́ръ спаса́йсѧ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Моле́нїѧ, Влⷣко, тебѐ пою́щих̾ не ѿве́ржи, но ᲂу҆ще́дри чл҃вѣколю́бче, и҆ пода́ждь вѣ́рою просѧ́щымъ ѡ҆ставле́нїе.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ.

Трⷪ҇ченъ: Трⷪ҇це про́стаѧ, несозда́ннаѧ, безнача́льное є҆стество̀, въ трⷪ҇цѣ пѣва́емаѧ ѵ҆поста́сей, спаси́ ны̀ вѣ́рою покланѧ́ющыѧсѧ держа́вѣ твое́й.

И҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Бг҃оро́диченъ: Ѿ Ѻ҆тца̀ безлѣ́тна Сн҃а въ лѣ́то Бг҃ороди́тельнице, неискꙋсомꙋ́жнѡ родила̀ є҆сѝ, стра́нное чꙋ́до, пребы́вши дв҃а доѧ́щи.

Пѣ́снь д҃.

І҆рмо́съ: Ѹ҆слы́ша Прⷪ҇ро́къ прише́ствїе твое́, Гдⷭ҇и, и҆ ѹ҆боѧ́сѧ, ꙗ҆́кѡ хо́щеши ѿ Дв҃ы роди́тисѧ и҆ чл҃кѡмъ ꙗ҆ви́тисѧ, и҆ гл҃аше: ѹ҆слы́шахъ слу́хъ тво́й и҆ ѹ҆боѧ́хсѧ, сла́ва си́лѣ твое́й Гдⷭ҇и.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Вре́мѧ живота̀ моегѡ̀ ма́ло и҆ и҆спо́лнено болѣ́зней и҆ лꙋка́вства: но въ покаѧ́нїи мѧ̀ прїимѝ, и҆ въ ра́зумъ призовѝ, да не бу́ду стѧжа́нїе ни бра́шно чужде́му: Сп҃се, са́мъ мѧ̀ ᲂу҆ще́дри.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Ца́ркⷭ҇имъ досто́инствомъ, вѣнце́мъ и҆ багрѧни́цею ѡ҆дѣ́ѧнъ, многоимѣ́нный чл҃къ и҆ првⷣный, бога́тствомъ кипѧ̀ и҆ ста́ды, внеза́пу бога́тства и҆ сла́вы црⷭ҇тва ѡ҆бнища́въ лиши́сѧ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

А҆́ще пра́веденъ бѧ́ше ѻ҆́нъ и҆ непоро́ченъ па́че всѣ́хъ, и҆ не ᲂу҆бѣжѐ ловле́нїѧ льсти́вагѡ и҆ сѣ́ти: ты́ же грѣхолюби́ва су́щи, ѻ҆каѧ́ннаѧ дꙋшѐ, что̀ сотвори́ши, а҆́ще чесо́мꙋ ѿ недовѣ́домыхъ случи́тсѧ наитѝ тебѣ;

Припѣ́въ: Поми́лꙋй мѧ̀, бж҃е, поми́лꙋй мѧ̀.

Высокоглаго́ливъ ны́нѣ є҆́смь, жесто́къ же и҆ срⷣцемъ, вотщѐ и҆ всꙋе: да не съ Фарїсе́емъ ѡ҆су́диши мѧ̀, па́че же мытаре́во смире́нїе пода́ждь мѝ, є҆ди́не ще́дре, правосу́де, и҆ сему́ мѧ сочислѝ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Согрѣши́хъ досади́въ сосу́ду пло́ти моеѧ̀, вѣ́мъ, Ще́дре: но въ покаѧ́нїи мѧ̀ прїимѝ, и҆ въ ра́зумъ призовѝ, да не бу́ду стѧжа́нїе ни бра́шно чужде́му: Сп҃се, са́мъ мѧ̀ ᲂу҆ще́дри.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Самоистука́нъ бы́хъ страстьмѝ, ду́шу мою̀ вредѧ̀, Ще́дре: но въ покаѧ́нїи мѧ̀ прїимѝ, и҆ въ ра́зумъ призовѝ, да не бу́ду стѧжа́нїе ни бра́шно чужде́му: Сп҃се, са́мъ мѧ̀ ᲂу҆ще́дри.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Не послу́шахъ гла́са твоего̀, преслу́шахъ писа́нїе твоѐ, законополо́жника: но въ покаѧ́нїи мѧ̀ прїимѝ, и҆ въ ра́зум̾ призовѝ, да не бꙋду стѧжа́нїе ни бра́шно чужде́му: Сп҃се, са́мъ мѧ̀ ᲂу҆ще́дри.

Припѣ́въ: Прпⷣбнаѧ ма́ти марі́е, молѝ бг҃а ѡ҆ на́съ.

Вели́кихъ безмѣ́стїй во глубинꙋ низве́дшисѧ, неѡдержи́ма была̀ є҆сѝ, но востекла̀ є҆сѝ по́мысломъ лу́чшимъ къ кра́йнѣй дѣѧ́нми ꙗ҆́вѣ добродѣ́тели, пресла́внѡ а҆́гг҃льское є҆стество̀ Марі́е ᲂу҆диви́вши.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ.

Трⷪ҇ченъ: Нераздѣ́льное сꙋщество́мъ, несли́тное ли́цы бг҃осло́влю тѧ̀, трⷪ҇ческое є҆ди́но Бж҃ество̀, ꙗ҆́кѡ є҆диноцрⷭ҇твенное и҆ сопресто́льное: вопїю́ ти пѣ́снь вели́кꙋю, въ вы́шнихъ трегу́бо пѣ́сносло́вимꙋю.

И҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Бг҃оро́диченъ: И҆ ражда́еши, и҆ дѣ́вствꙋеши, и҆ пребыва́еши ѻ҆бою́дꙋ є҆стество́мъ Дв҃а: рожде́йсѧ ѡ҆бновлѧ́етъ зако́ны є҆стества̀, ѹ҆тро́ба же ражда́етъ неражда́ющаѧ: Бг҃ъ и҆дѣ́же хо́щетъ, побѣжда́етсѧ є҆стества̀ чи́нъ: твори́тъ бо є҆ли̑ка хо́щетъ.

Пѣ́снь є҃.

І҆рмо́съ: Ѿ нощѝ ᲂу҆́тренююща, чл҃вѣколю́бче, просвѣтѝ молю́сѧ, и҆ наста́ви и҆ менѐ на повелѣ̑нїѧ твоѧ̑: и҆ наꙋчи́ мѧ сп҃се, твори́ти во́лю твою̀.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Ни́зу снича́щую подража́й, ѽ дꙋшѐ: прїидѝ, припадѝ къ нога́ма І҆и҃совыма, да тѧ̀ и҆спра́витъ, и҆ да хо́диши пра́вѡ стезѝ Гдⷭ҇ни.

Припѣ́въ: Поми́лꙋй мѧ̀, бж҃е, поми́лꙋй мѧ̀.

А҆́ще и҆ кла́дѧзь є҆сѝ глубо́кїй, Влⷣко, и҆сточи́ ми во́ду и҆з̾ пречⷭ҇тыхъ твои́хъ жи́лъ, да ꙗ҆́кѡ Самарѧны́нѧ не ктомꙋ пїѧ́й жа́жду: жи́зни бо струи̑ и҆сточа́еши.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Сїлѡа́мъ да бу́дутъ мѝ сле́зы моѧ̀, Влⷣко Гдⷭ҇и, да ᲂу҆мы́ю и҆ а҆́зъ зѣ́ницы срцⷣа, и҆ ви́жду тѧ̀ ᲂу҆́мнѡ свѣ́та превѣ́чна.

Припѣ́въ: Прпⷣбнаѧ ма́ти марі́е, молѝ бг҃а ѡ҆ на́съ.

Несравне́ннымъ жела́нїем̾, всебога́таѧ, дре́ву возжелѣ́вши поклони́тисѧ живо́тному, сподо́биласѧ є҆сѝ жела́нїѧ, сподо́би ᲂу҆́бѡ и҆ менѐ ᲂу҆лучи́ти вы́шнїѧ сла́вы.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ.

Трⷪ҇ченъ: Тѧ̀ Трⷪ҇це сла́вимъ, є҆ди́наго Бг҃а: ст҃ъ, ст҃ъ, ст҃ъ є҆сѝ Ѻ҆ч҃е, Сн҃е и҆ Дш҃е, про́стое существо̀, є҆ди́нице при́снѡ покланѧ́емаѧ.

И҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Бг҃оро́диченъ: И҆з̾ тебѐ ѡ҆блече́сѧ въ моѐ смѣше́нїе, нетлѣ́ннаѧ, безмꙋжнаѧ мт҃и дв҃о, Бг҃ъ созда́вый вѣ́ки, и҆ соединѝ себѣ̀ человѣ́ческое є҆стество̀.

Пѣ́снь ѕ҃.

Возопи́хъ всѣ́мъ се́рдцемъ мои́мъ къ ще́дрому Бг҃ꙋ, и҆ ѹ҆слы́ша мѧ̀ ѿ а҆́да преиспо́днѧго, и҆ возведѐ ѿ тлѝ живо́тъ мо́й.

Припѣ́въ: Поми́лꙋй мѧ̀, бж҃е, поми́лꙋй мѧ̀.

А҆́зъ є҆́смь, Сп҃се, ю҆́же погуби́лъ є҆сѝ дре́вле црⷭ҇кую дра́хму: но вже́гъ свѣти́льникъ Предте́чу твоего̀, Сло́ве, взыщѝ и҆ ѡ҆брѧ́щи тво́й ѡ҆́бразъ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Воста́ни и҆ поборѝ, ꙗ҆́кѡ І҆исꙋ́съ А҆мали́ка, плотскі́ѧ стра̑сти, и҆ Гаваѡні́ты ле́стныѧ по́мыслы прⷭ҇нѡ побѣжда́ющи.

Припѣ́въ: Прпⷣбнаѧ ма́ти марі́е, молѝ бг҃а ѡ҆ на́съ.

Да страсте́й пла́мень ᲂу҆гаси́ши, сле́зъ ка̑пли и҆сточи́ла є҆сѝ при́снѡ, Марі́е, душе́ю распалѧ́ема, и҆́хже бл҃года́ть пода́ждь и҆ мнѣ̀ твоему̀ рабу̀.

Припѣ́въ: Прпⷣбнаѧ ма́ти марі́е, молѝ бг҃а ѡ҆ на́съ.

Безстра́стїе нбⷭ҇ное стѧжа́ла є҆сѝ кра́йнимъ на землѝ житїе́мъ, мт҃и: тѣ́мже тебѐ пою́щымъ ѿ страсте́й и҆зба́витисѧ мл҃твами твои́ми, моли́сѧ.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ.

Трⷪ҇ченъ: Трⷪ҇ца є҆́смь проста̀, нераздѣ́льна, раздѣ́льна ли́чнѣ, и҆ є҆ди́ница є҆́смь є҆стество́мъ соедине́на, ѻ҆́ц҃ъ глаго́летъ, и҆ Сн҃ъ, и҆ бж҃е́ственный Дх҃ъ.

И҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Бг҃оро́диченъ: Ѹ҆тро́ба твоѧ̀ Бг҃а на́мъ родѝ, воображе́на по на́мъ: є҆го́же ꙗ҆́кѡ Созда́телѧ всѣ́хъ, молѝ, Бцⷣе, да моли́твами твои́ми ѡ҆правди́мсѧ.

Конда́къ, гла́съ ѕ҃: Душѐ моѧ̀, душѐ моѧ̀, воста́ни, что спи́ши; коне́цъ приближа́етсѧ, и҆ и҆́маши смꙋти́тисѧ: воспрѧнѝ ᲂу҆́бѡ, да пощади́тъ тѧ̀ Хрⷭ҇то́съ Бг҃ъ, вездѣ̀ сы́й, и҆ всѧ҆ и҆сполнѧ́ѧй.

Пѣ́снь з҃.

І҆рмо́съ: Согрѣши́хомъ, беззако́нновахомъ, непра́вдовахом̾ предъ тобо́ю, нижѐ соблюдо́хомъ, нижѐ сотвори́хомъ, ꙗ҆́коже заповѣ́далъ є҆сѝ на́мъ: но не преда́ждь на́съ до конца̀, ѻ҆ц҃е́въ Бж҃е.

Припѣ́въ: Поми́лꙋй мѧ̀, бж҃е, поми́лꙋй мѧ̀.

И҆счезо́ша дні́и моѝ, ꙗ҆́кѡ со́нїе востаю́щагѡ: тѣ́мже ꙗ҆́кѡ Е҆зекі́а слезю̀ на ло́жи мое́мъ, приложи́тисѧ мнѣ̀ лѣ́тѡмъ живота̀: но кі́й И҆са́їа предста́нетъ тебѣ̀, душѐ, а҆́ще не всѣ́хъ Бг҃ъ;

Припѣ́въ: Поми́лꙋй мѧ̀, бж҃е, поми́лꙋй мѧ̀.

Припа́даю тѝ и҆ приношу̀ тебѣ̀, ꙗ҆́коже сле́зы, гл҃ы моѧ̀: согрѣши́хъ, ꙗ҆́кѡ не согрѣшѝ блудни́ца, и҆ беззако́нновахъ, ꙗ҆́кѡ и҆́ный никто́же на землѝ: но ᲂу҆ще́дри Влⷣко творе́нїе твоѐ, и҆ воззови́ мѧ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Погребо́хъ ѡ҆́бразъ тво́й и҆ растли́хъ за́повѣдь твою̀, всѧ̀ помрачи́сѧ добро́та, и҆ страстьмѝ ᲂу҆гаси́сѧ, Сп҃се, свѣща̀: но ᲂу҆ще́дривъ возда́ждь мѝ, ꙗ҆́коже пое́тъ Дв҃дъ, ра́дованїе.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Ѡ҆брати́сѧ, пока́йсѧ, ѿкры́й сокровє́ннаѧ, глаго́ли Бг҃у всѧ̑ вѣ́дущему: ты̀ вѣ́си моѧ̀ та́йнаѧ, є҆ди́не Сп҃се: но са́мъ мѧ̀ поми́луй, ꙗ҆́коже пое́тъ Дв҃дъ по ми́лости твое́й.

Припѣ́въ: Прпⷣбнаѧ ма́ти марі́е, молѝ бг҃а ѡ҆ на́съ.

Возопи́вши къ пречⷭ҇тѣй Бг҃ома́тери, пе́рвѣе ѿри́нула є҆сѝ неи́стовство страсте́й, ну́ждно стужа́ющихъ, и҆ посрами́ла є҆сѝ врага̀ запе́ншаго: но да́ждь ны́нѣ по́мощь ѿ ско́рби и҆ мнѣ̀ рабу̀ твоему̀.

Припѣ́въ: Прпⷣбнаѧ ма́ти марі́е, молѝ бг҃а ѡ҆ на́съ.

Е҆го́же возлюби́ла є҆сѝ, є҆го́же возжелѣ́ла є҆сѝ, є҆гѡ́же ра́ди пло́ть и҆знури́ла є҆сѝ, препобо́бнаѧ, молѝ ны́нѣ Хрⷭ҇та̀ ѡ҆ рабѣ́хъ, ꙗ҆́кѡ да ми́лостивъ бы́въ всѣ́мъ на́мъ, ми́рное состоѧ́нїе да́руетъ почита́ющымъ є҆гѡ̀.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ.

Трⷪ҇ченъ: Трⷪ҇це про́стаѧ, нераздѣ́льнаѧ, є҆диносꙋщнаѧ, и҆ є҆стество̀ є҆ди́но, свѣ́тове и҆ свѣ́т̾, и҆ ст҃а трѝ, и҆ є҆ди́но ст҃о, пое́тсѧ Бг҃ъ Трⷪ҇ца: но воспо́й, просла́ви, живо́тъ и҆ животы̀, дꙋшѐ, всѣ́хъ Бг҃а.

И҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Бг҃оро́диченъ: Пое́мъ тѧ̀, блгⷭ҇ослови́мъ тѧ̀, покланѧ́емсѧ тѝ, Бг҃ороди́тельнице, ꙗ҆́кѡ неразлꙋчныѧ Трⷪ҇цы породила̀ є҆сѝ є҆ди́наго Хрⷭ҇та Бг҃а, и҆ сама̀ ѿве́рзла є҆сѝ на́мъ сꙋщымъ на землѝ нбⷭ҇наѧ.

Пѣ́снь и҃.

І҆рмо́съ: Е҆го́же вѡ́инства нбⷭ҇наѧ сла́вѧтъ, и҆ трепе́щꙋтъ Херуві́ми и҆ Серафі́ми, всѧ́ко дыха́нїе и҆ тва́рь, по́ите, бл҃гослови́те, и҆ превозноси́те во всѧ̀ вѣ́ки.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Сле́зную, Сп҃се стклѧ́ницу ꙗ҆́кѡ мѵ́ро и҆стощава́ѧ на главу̀, зову́ ти, ꙗ҆́коже блудни́ца, млⷭ҇ти и҆́щꙋщаѧ: мольбꙋ приношу̀ и҆ ѡ҆ставле́нїе прїѧ́ти.

Припѣ́въ: Поми́лꙋй мѧ̀, бж҃е, поми́лꙋй мѧ̀.

А҆́ще и҆ никто́же ꙗ҆́коже а҆́зъ согрѣшѝ тебѣ̀, но ѻ҆ба́че прїимѝ и҆ менѐ, бл҃гоꙋтро́бне Сп҃се, стра́хомъ ка́ющасѧ и҆ любо́вїю зову́ща: согрѣши́хъ тебѣ̀ є҆ди́ному, поми́луй мѧ̀ млⷭ҇тиве.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Пощадѝ Сп҃се твоѐ созда́нїе, и҆ взыщѝ ꙗ҆́кѡ па́стырь поги́бшее, предварѝ заблу́ждшаго, восхитѝ ѿ во́лка, сотвори́ мѧ ѻ҆вча̀ на па́ствѣ твои́хъ ѻ҆ве́цъ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Е҆гда̀ судїѐ сѧ́деши ꙗ҆́кѡ бл҃гоутро́бенъ, и҆ пока́жеши стра́шную сла́ву твою̀, Сп҃се: ѽ каковы́й стра́хъ тогда̀, пе́щи горѧ́щей, всѣ́мъ боѧ́щымсѧ нестерпи́магѡ суди́ща твоегѡ̀!

Припѣ́въ: Прпⷣбнаѧ ма́ти марі́е, молѝ бг҃а ѡ҆ на́съ.

Свѣ́та незаходи́магѡ мт҃и тѧ̀ просвѣти́вши, ѿ ѡ҆мраче́нїѧ страсте́й разрѣшѝ: тѣ́мже вше́дши въ дх҃о́вную благода́ть, просвѣтѝ, Марі́е, тѧ̀ вѣ́рнѡ восхвалѧ́ющыѧ.

Припѣ́въ: Прпⷣбнаѧ ма́ти марі́е, молѝ бг҃а ѡ҆ на́съ.

Чу́до но́во ви́дѣвъ ᲂу҆жаса́шесѧ бж҃е́ственный въ тебѣ̀ вои́стинну, мт҃и, Зѡсі́ма: а҆́ггл҃а бо зрѧ́ше во пло́ти, и҆ ᲂу҆́жасомъ ве́сь и҆сполнѧ́шесѧ, Хрⷭ҇та̀ поѧ̀ во вѣ́ки.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ.

Трⷪ҇ченъ: Безнача́льне Ѻ҆́ч҃е, Сы́не собезнача́льне, ѹ҆́тѣ́шителю бл҃гі́й, Дꙋше пра́вый, Сло́ва Бж҃їѧ Роди́телю, Ѻ҆ц҃а безнача́льна Сло́ве, Дш҃е живы́й и҆ зи́ждай, Трⷪ҇це є҆ди́нице поми́луй мѧ̀.

И҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Бг҃оро́диченъ: Ꙗ҆́кѡ ѿ ѡ҆броще́нїѧ червлени́цы, пречи́стаѧ, ᲂу҆́мнаѧ багрѧни́це Е҆мманꙋ́илева, внꙋ́трь во чре́вѣ твое́мъ пло́ть и҆стка́сѧ: тѣ́мже Бцⷣꙋ вои́стиннꙋ тѧ̀ почита́емъ.

Пѣ́снь ѳ҃.

І҆рмо́съ: Безсѣ́меннаго зача́тїѧ ржⷭ҇тво̀ несказа́нное, мт҃ре безмꙋ́жныѧ нетлѣ́ненъ пло́дъ: Бж҃їе бо рожде́нїе ѡ҆бновлѧ́етъ є҆стества̀: тѣ́мже тѧ̀ всѝ ро́ди, ꙗ҆́кѡ бг҃оневѣ́стнꙋю Мт҃рь, правосла́вно велича́емъ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Оу҆милосе́рдисѧ, спаси́ мѧ, сн҃е Дв҃довъ поми́луй, бѣсну́ющыѧсѧ сло́вомъ и҆сцѣли́вый, гла́съ же бл҃гоꙋтро́бный ꙗ҆́кѡ разбо́йнику мнѣ̀ рцы̀: а҆ми́нь глаго́лю тебѣ̀, со мно́ю бу́деши въ раѝ, є҆гда̀ прїиду̀ во сла́вѣ мое́й.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Разбо́йникъ ѡ҆глаго́ловаше тѧ̀, разбо́йникъ бг҃осло́вѧше тѧ̀, ѻ҆́ба бо на крⷭ҇тѣ сви́сѧста: но ѽ бл҃гоꙋтро́бне, ꙗ҆́кѡ вѣ́рному разбо́йнику твоему̀, позна́вшему тѧ̀ Бг҃а, и҆ мнѣ̀ ѿве́рзи две́рь сла́внагѡ ца́рствїѧ твоегѡ̀.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Тва́рь содрога́шесѧ, распина́ема тѧ̀ ви́дѧщи, го́ры и҆ ка́менїѧ стра́хомъ распада́хусѧ, и҆ землѧ̀ сотрѧса́шесѧ, и҆ а҆́дъ ѡ҆бнажа́шесѧ, и҆ соѡмрача́шесѧ свѣ́тъ во днѝ, зрѧ̀ тебѐ, пригвожде́на ко крⷭ҇тꙋ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Досто́йныхъ покаѧ́нїѧ плодѡ́въ не и҆стѧжѝ ѿ менѐ, и҆́бо крѣ́пость моѧ̀ во мнѣ̀ ѡ҆скꙋдѣ̀: се́рдце мнѣ̀ да́руй при́снѡ сокруше́нное, нищету же дх҃о́вную, да сїѧ̑ тебѣ̀ принесу̀, ꙗ҆́кѡ прїѧ́тную же́ртву, є҆ди́не Сп҃се.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Судїѐ мо́й и҆ вѣ́дче мо́й, хотѧ́й па́ки прїитѝ со А҆́ггл҃ы, суди́ти мі́ру всему̀, ми́лостивнымъ твои́мъ ѻ҆́комъ тогда̀ ви́дѣвъ мѧ̀, пощадѝ и҆ ᲂу҆ще́дри мѧ̀, І҆и҃се, па́че всѧ́кагѡ є҆стества̀ человѣ́ча согрѣши́вша.

Припѣ́въ: Прпⷣбнаѧ ма́ти марі́е, молѝ бг҃а ѡ҆ на́съ.

Оу҆диви́ла є҆сѝ всѣ́хъ стра́нным̾ житїе́мъ твои́мъ, а҆́гглѡвъ чи́ны, и҆ человѣ́кѡвъ собо́ры, невеще́ственнѡ пожи́вши и҆ є҆стество̀ преше́дши: и҆́мже ꙗ҆́кѡ невеще́ственныма нога́ма вше́дши Марі́е, І҆орда́нъ прешла̀ є҆сѝ.

Припѣ́въ: Прпⷣбнаѧ ма́ти марі́е, молѝ бг҃а ѡ҆ на́съ.

Оу҆ми́лостиви Созда́телѧ ѡ҆ хва́лѧщихъ тѧ̀, преподо́бнаѧ мт҃и, и҆зба́витисѧ ѡ҆ѕлобле́нїй и҆ скорбе́й, ѡ҆́крестъ напа́дающихъ: да и҆зба́вившесѧ ѿ напа́стей, возвели́чимъ непреста́ннѡ просла́вльшаго тѧ̀ Гдⷭ҇а.

Припѣ́въ: Прпⷣбне ѻ҆́тче а҆ндре́е, молѝ бг҃а ѡ҆ на́съ.

А҆ндрею: А҆ндре́е чтⷭ҇ны́й и҆ ѻ҆́ч҃е требл҃же́ннѣйшїй, па́стырю Кри́тскїй, не преста́й молѧ́сѧ ѡ҆ воспѣва́ющихъ тѧ̀: да и҆зба́вимсѧ всѝ гнѣ́ва и҆ ско́рби и҆ тлѣ́нїѧ и҆ прегрѣше́нїй безмѣ́рных̾, чтꙋщихъ твою̀ па́мѧть вѣ́рнѡ.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ.

Трⷪ҇ченъ: Ѻ҆ц҃а̀ просла́вимъ, Сы́на превознесе́мъ, бж҃ественномꙋ Дх҃ꙋ вѣ́рнѡ поклони́мсѧ, Трⷪ҇цѣ нераздѣ́льнѣй, є҆ди́ницѣ по сꙋществу̀, ꙗ҆́кѡ свѣ́тꙋ и҆ свѣ́томъ, и҆ животꙋ̀ и҆ живото́мъ, животворѧ́щемꙋ и҆ просвѣща́ющемꙋ концы̀.

И҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Бг҃оро́диченъ: Гра́дъ тво́й сохранѧ́й, Бг҃ороди́тельнице пречⷭ҇таѧ: въ тебѣ̀ бо се́й вѣ́рнѡ ца́рствꙋѧй, въ тебѣ̀ и҆ ѹ҆твержда́етсѧ, и҆ тобо́ю побѣжда́ѧй побѣжда́етъ всѧ́кое и҆скуше́нїе, и҆ плѣнѧ́етъ ра́тники, и҆ прохо́дитъ послꙋша́нїе.