Въ сре́ду пе́рвой седми́цы

І҆рмо́съ: Помо́щник и҆ покро́витель бы́сть мнѣ̀ во спасе́нїе, се́й мой бг҃ъ, и҆ прославлю є҆гѡ: бг҃ъ ѻ҆ц҃а моегѡ̀, и҆ вознесꙋ̀ є҆гѡ̀: сла́внѡ бо просла́висѧ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Ѿ ю҆́ности, Хрⷭ҇тѐ, за́повѣди твоѧ̀ преступи́хъ, всестра́стно небрегі́й, ᲂу҆ны́нїемъ преидо́хъ житїѐ: тѣ́мже зову́ ти, Сп҃се: понѐ на коне́цъ спаси́ мѧ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Пове́ржена мѧ̀, Сп҃се, предъ враты̀ твои́ми, понѐ на ста́рость не ѿри́ни менѐ во а҆́дъ тща̀: но пре́жде конца̀, ꙗ҆́кѡ человѣ́колю́бецъ, да́ждь мѝ прегрѣше́нїй ѡ҆ставле́нїе.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Бога́тство моѐ Сп҃се, и҆знури́въ въ блудѣ̀, пу́стъ є҆́смь плодѡ́въ бл҃гочести́вых̾, а҆́лченъ же зову̀: Ѻ҆ч҃е щедро́тъ, предвари́въ ты̀ мѧ̀ ᲂу҆ще́дри.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Въ разбо́йники впады́й а҆́зъ є҆́смь помышле́нми мои́ми, ве́сь ѿ ни́хъ ᲂу҆ѧзви́хсѧ ны́нѣ, и҆спо́лнихсѧ ра́нъ: но са́мъ мѝ предста́въ, Хрⷭ҇тѐ Сп҃се, и҆сцѣлѝ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Сщ҃е́нникъ мѧ̀ предви́дѣв̾ ми́мои́де, и҆ Леѵі́тъ ви́дѧ въ лю́тыхъ на́га презрѣ̀: но и҆з̾ Мр҃і́и возсїѧ́вый І҆и҃се, ты̀ предста́въ ᲂу҆ще́дри мѧ̀.

Припѣ́въ: Прпⷣбнаѧ ма́ти марі́е, молѝ бг҃а ѡ҆ на́съ.

Ты́ ми да́ждь свѣтоза́рную бл҃года́ть ѿ бж҃е́ственнагѡ свы́ше промышле́нїѧ, и҆збѣжа́ти страсте́й ѡ҆мраче́нїѧ, и҆ пѣ́ти ᲂу҆се́рднѡ твоегѡ̀, Марі́е, житїѧ̀ кра҆снаѧ и҆справле́нїѧ.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ.

Трⷪ҇ченъ: Пресꙋ́щнаѧ трⷪ҇це, во є҆ди́ницѣ покланѧ́емаѧ, возмѝ бре́мѧ ѿ менѐ тѧ́жкое грѣхо́вное, и҆ ꙗ҆́кѡ благоꙋтро́бна, да́ждь мѝ сле́зы ᲂу҆миле́нїѧ.

И҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Бг҃оро́диченъ: Бцⷣе, наде́жде и҆ предста́тельство тебѐ пою́щихъ, возмѝ бре́мѧ ѿ мене тѧ́жкое грѣхо́вное, и҆ ꙗ҆́кѡ влⷣчца чⷭ҇таѧ, ка́ющасѧ прїими́ мѧ.

І҆рмо́съ: Вонмѝ нб҃о, и҆ возглаго́лю, и҆ воспою̀ Хрⷭ҇та ѿ Дв҃ы плотїю прише́дшаго.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Поползо́хсѧ ꙗ҆́кѡ Дв҃дъ блу́днѡ, и҆ ѡ҆скверни́хсѧ: но ѡ҆мы́й ѹ҆бѡ и҆ менѐ, Сп҃се, слеза́ми.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Ни сле́зъ, нижѐ покаѧ́нїѧ и҆́мамъ, нижѐ ᲂу҆миле́нїѧ: са́мъ мѝ сїѧ̑, Сп҃се, ꙗ҆́кѡ Бг҃ъ да́руй.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Погуби́хъ первозда́нную добро́ту и҆ бл҃голѣ́пїе моѐ, и҆ ны́нѣ лежу̀ на́гъ и҆ стыжду́сѧ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Две́рь твою̀ не затворѝ мнѣ̀ тогда̀, Гдⷭ҇и, Гдⷭ҇и: но ѿве́рзи мѝ сїю̀ ка́ющемусѧ тебѣ̀.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Внушѝ воздыха́нїѧ душѝ моеѧ̀, и҆ ѻ҆́чїю мое́ю прїимѝ ка̑пли, Сп҃се, и҆ спаси́ мѧ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Чл҃вѣколю́бче, хотѧ́й всѣ̑м̾ спасти́сѧ, ты̀ воззови́ мѧ̀ и҆ прїимѝ, ꙗ҆́кѡ бл҃гъ ка́ющагосѧ.

Припѣ́въ: Прест҃а́ѧ бцⷣе, сп҃сѝ на́съ.

Пречⷭ҇таѧ Бцⷣе Дв҃о, є҆ди́на всепѣ́таѧ, молѝ прилѣ́жнѡ во є҆́же спасти́сѧ на́мъ.

І҆рмо́съ: Ви́дите ви́дите, ꙗ҆́кѡ а҆́зъ є҆́смь Бг҃ъ, ма́нну ѡ҆дожди́вый, и҆ во́ду и҆з̾ ка́мене и҆сточи́вый дре́вле въ пусты́ни лю́демъ мои́мъ, десни́цею є҆ди́ною и҆ крѣ́постїю мое́ю.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Ви́дите ви́дите, ꙗ҆́кѡ а҆́зъ є҆́смь Бг҃ъ: внуша́й душѐ моѧ̀ Гдⷭ҇а вопїю́ща, и҆ ᲂу҆дали́сѧ пре́жнѧго грѣха̀, и҆ бо́йсѧ ꙗ҆́кѡ неумы́тнаго и҆ ꙗ҆́кѡ судїѝ и҆ Бг҃а.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Кому̀ ᲂу҆подо́биласѧ є҆сѝ, многогрѣ́шнаѧ душѐ, то́кмѡ пе́рвому Ка́їну и҆ Ламе́ху ѻ҆́ному, каменова́вшаѧ тѣ́ло ѕлодѣ́йствы и҆ ᲂу҆би́вшаѧ ᲂу҆́мъ безслове́сными стремле́нми.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Всѧ̑ пре́жде зако́на прете́кши, ѽ душѐ, Си́ѳу не ᲂу҆подо́биласѧ є҆сѝ, ни Е҆нѡ́са подража́ла є҆сѝ, ни Е҆но́ха преложе́нїемъ, ни Нѡ́ѧ: но ꙗ҆ви́ласѧ є҆сѝ ᲂу҆бо́га пра́ведныхъ жи́зни.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Е҆ди́на ѿве́рзла є҆сѝ хлѧ̑би гнѣ́ва Бг҃а твоегѡ̀, душѐ моѧ̀, и҆ потопи́ла є҆сѝ всю̀ ꙗ҆́коже зе́млю пло́ть, и҆ дѣѧ̑нїѧ и҆ житїѐ, и҆ пребыла̀ є҆сѝ внѣ̀ спаси́тельнагѡ ковче́га.

Припѣ́въ: Прпⷣбнаѧ ма́ти марі́е, молѝ бг҃а ѡ҆ на́съ.

Всѣ́мъ ᲂу҆се́рдїемъ и҆ любо́вїю притекла̀ є҆сѝ Хрⷭ҇ту̀, пе́рвый грѣха̀ пу́ть ѿвра́щши, и҆ въ пусты́нѧхъ непроходи́мых̾ пита́ющисѧ, и҆ тогѡ̀ чи́стѣ соверша́ющи бж҃е́ственныѧ за́повѣди.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ.

Трⷪ҇ченъ: Безнача́льнаѧ несозда́ннаѧ Трⷪ҇це, нераздѣ́льнаѧ є҆ди́нице, ка́ющасѧ мѧ̀ прїимѝ, согрѣши́вша спасѝ, твоѐ є҆́смь созда́нїе, не пре́зри, но пощадѝ, и҆ и҆зба́ви мѧ̀ ѻ҆́гненнагѡ ѡ҆сужде́нїѧ.

И҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Бг҃оро́диченъ: Пречи́стаѧ Влⷣчце, Бг҃ороди́тельнице, наде́ждо къ тебѣ̀ притека́ющихъ, и҆ приста́нище су́щихъ въ бу́ри, ми́лостиваго и҆ Созда́телѧ и҆ Сн҃а твоего̀ ᲂу҆ми́лостиви и҆ мнѣ̀ моли́твами твои́ми.

І҆рмо́съ: Оу҆твердѝ, Гдⷭ҇и, на ка́мени за́повѣдей твои́хъ подви́гшеесѧ се́рдце моѐ, ꙗ҆́кѡ є҆ди́нъ ст҃ъ є҆сѝ и҆ Гдⷭ҇ь.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Бл҃гослове́нїѧ Си́мова не наслѣ́довала є҆сѝ, душѐ ѻ҆каѧ́ннаѧ, ни простра́нное ѡ҆держа́нїе, ꙗ҆́коже І҆а́феѳ̾ и҆мѣ́ла є҆сѝ на землѝ ѡ҆ставле́нїѧ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Ѿ землѝ Харра́нъ, и҆зы́ди ѿ грѣха̀, душѐ моѧ̀; грѧдѝ въ зе́млю точа́щую присноживо́тное нетлѣ́нїе, є҆́же А҆враа́мъ наслѣ́дствова.

Припѣ́въ: Поми́лꙋй мѧ̀, бж҃е, поми́лꙋй мѧ̀.

А҆враа́ма слы́шала є҆сѝ, душѐ моѧ̀, дре́вле ѡ҆ста́вльша зе́млю ѻ҆те́чества, и҆ бы́вша прише́льца: сегѡ̀ произволе́нїю подража́й.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Оу҆ ду́ба Мамврі́йскагѡ ᲂу҆чреди́въ Патрїа́рхъ А҆́гг҃лы, наслѣ́дствова по ста́рости ѡ҆бѣтова́нїѧ лови́тву.

Припѣ́въ: Поми́лꙋй мѧ̀, бж҃е, поми́лꙋй мѧ̀.

І҆саа́ка, ѻ҆каѧ́ннаѧ душѐ моѧ̀, разумѣ́вши но́вую же́ртву, та́йнѡ всесожже́нную Гдⷭ҇ви, подража́й є҆гѡ̀ произволе́нїю.

Припѣ́въ: Поми́лꙋй мѧ̀, бж҃е, поми́лꙋй мѧ̀.

І҆сма́ила слы́шала є҆сѝ, трезви́сѧ душѐ моѧ̀, и҆згна́на ꙗ҆́кѡ рабы́нино ѿрожде́нїе: ви́ждь, да не ка́кѡ подо́бно что постра́ждеши ласкосе́рдствующи.

Припѣ́въ: Прпⷣбнаѧ ма́ти марі́е, молѝ бг҃а ѡ҆ на́съ.

Содержи́мь є҆́смь бу́рею, и҆ треволне́нїемъ согрѣше́нїй: но сама̀ мѧ мт҃и ны́нѣ спасѝ, и҆ къ приста́нищу бж҃е́ственнагѡ покаѧ́нїѧ возведѝ.

Припѣ́въ: Прпⷣбнаѧ ма́ти марі́е, молѝ бг҃а ѡ҆ на́съ.

Ра́бское моле́нїе и҆ ны́нѣ преподо́бнаѧ, прине́сши ко бл҃гоутро́бнѣй моли́твами твои́ми Бцⷣѣ, ѿве́рзи мѝ боже́ственныѧ вхо́ды.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ.

Трⷪ҇ченъ: Трⷪ҇це про́стаѧ, несозда́ннаѧ, безнача́льное є҆стество̀, въ трⷪ҇цѣ пѣва́емаѧ ѵ҆поста́сей, спаси́ ны̀ вѣ́рою покланѧ́ющыѧсѧ держа́вѣ твое́й.

И҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Бг҃оро́диченъ: Ѿ Ѻ҆тца̀ безлѣ́тна Сн҃а въ лѣ́то Бг҃ороди́тельнице, неискꙋсомꙋ́жнѡ родила̀ є҆сѝ, стра́нное чꙋ́до, пребы́вши дв҃а доѧ́щи.

І҆рмо́съ: Ѹ҆слы́ша Прⷪ҇ро́къ прише́ствїе твое́, Гдⷭ҇и, и҆ ѹ҆боѧ́сѧ, ꙗ҆́кѡ хо́щеши ѿ Дв҃ы роди́тисѧ и҆ чл҃кѡмъ ꙗ҆ви́тисѧ, и҆ гл҃аше: ѹ҆слы́шахъ слу́хъ тво́й и҆ ѹ҆боѧ́хсѧ, сла́ва си́лѣ твое́й Гдⷭ҇и.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Тѣ́ло ѡ҆скверни́сѧ, ду́хъ ѡ҆калѧ́сѧ, ве́сь ѡ҆струпи́хсѧ: но ꙗ҆́кѡ вра́чь, Хрⷭ҇тѐ, ѻ҆боѧ̀ покаѧ́нїемъ мои́мъ ᲂу҆врачу́й, ѡ҆мы́й, ѡ҆чи́сти, покажѝ Сп҃се мо́й па́че снѣ́га чистѣ́йша.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Тѣ́ло твоѐ и҆ кро́вь распина́емый ѡ҆ всѣ́хъ положи́лъ є҆сѝ, Сло́ве: тѣ́ло ᲂу҆́бѡ, да мѧ̀ ѡ҆бнови́ши, кро́вь, да ѡ҆мы́еши мѧ̀, ду́хъ же пре́далъ є҆сѝ, да мѧ̀ приведе́ши, Хрⷭ҇тѐ, твоему̀ Роди́телю.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Содѣ́лалъ є҆сѝ спасе́нїе посредѣ̀ землѝ, Ще́дре, да спасе́мсѧ, во́лею на дре́вѣ распѧ́лсѧ є҆сѝ, Е҆де́мъ затворе́нный ѿве́рзесѧ, го́рнѧѧ и҆ до́льнѧѧ тва́рь, ꙗ҆зы́цы всѝ спасе́ни покланѧ́ютсѧ тебѣ̀.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Да бу́детъ мѝ купѣ́ль, кро́вь и҆з̾ ре́бръ твои́хъ, вку́пѣ и҆ питїѐ, и҆сточи́вшее во́ду ѡ҆ставле́нїѧ: да ѻ҆бою́ду ѡ҆чища́юсѧ, помазу́ѧсѧ и҆ пїѧ̀, ꙗ҆́кѡ пома́занїе и҆ питїѐ, Сло́ве, животѡ́чнаѧ твоѧ словеса̀.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Ча́шу Цр҃ковь стѧжа̀ ре́бра твоѧ̀ живонѡ́снаѧ, и҆зъ ни́хже сугу́быѧ на́мъ и҆сточѝ то́ки, ѡ҆ставле́нїѧ и҆ ра́зꙋма, во ѡ҆́бразъ дре́внѧгѡ и҆ но́вагѡ двои́хъ вку́пѣ завѣ́товъ, Сп҃се на́шъ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

На́гъ є҆́смь черто́га, на́гъ є҆́смь и҆ бра́ка, ку́пно и҆ ве́чери, свѣти́льникъ ᲂугасѐ, ꙗ҆́кѡ без̾еле́йный, черто́гъ заключи́сѧ мнѣ̀ спѧ́щу, ве́черѧ снѣде́сѧ, а҆́зъ же по ру́ку и҆ но́гу свѧ́занъ во́нъ низве́рженъ є҆́смь.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ.

Трⷪ҇ченъ: Нераздѣ́льное сꙋщество́мъ, несли́тное ли́цы бг҃осло́влю тѧ̀, трⷪ҇ческое є҆ди́но Бж҃ество̀, ꙗ҆́кѡ є҆диноцрⷭ҇твенное и҆ сопресто́льное: вопїю́ ти пѣ́снь вели́кꙋю, въ вы́шнихъ трегу́бо пѣ́сносло́вимꙋю.

И҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Бг҃оро́диченъ: И҆ ражда́еши, и҆ дѣ́вствꙋеши, и҆ пребыва́еши ѻ҆бою́дꙋ є҆стество́мъ Дв҃а: рожде́йсѧ ѡ҆бновлѧ́етъ зако́ны є҆стества̀, ѹ҆тро́ба же ражда́етъ неражда́ющаѧ: Бг҃ъ и҆дѣ́же хо́щетъ, побѣжда́етсѧ є҆стества̀ чи́нъ: твори́тъ бо є҆ли̑ка хо́щетъ.

І҆рмо́съ: Ѿ нощѝ ᲂу҆́тренююща, чл҃вѣколю́бче, просвѣтѝ молю́сѧ, и҆ наста́ви и҆ менѐ на повелѣ̑нїѧ твоѧ̑: и҆ наꙋчи́ мѧ сп҃се, твори́ти во́лю твою̀.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Ꙗ҆́кѡ тѧ́жкїй нра́вомъ, Фараѡ́ну го́рькому бы́хъ, Влⷣко, І҆аннѝ и҆ І҆амврѝ, душе́ю и҆ тѣ́ломъ, и҆ погруже́нъ ᲂу҆мо́мъ: но помози́ ми.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Ка́ломъ смѣси́хсѧ ѻ҆каѧ́нный ᲂу҆мо́мъ, ѡ҆мы́й мѧ̀, Влⷣко, ба́нею мои́хъ сле́зъ, молю́ тѧ, пло́ти моеѧ̀ ѻ҆де́жду ᲂу҆бѣли́въ ꙗ҆́кѡ снѣ́гъ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

А҆́ще и҆спыта́ю моѧ̀ дѣла̀, Сп҃се, всѧ́кагѡ человѣ́ка превозше́дша грѣха́ми себѐ зрю̀, ꙗ҆́кѡ ра́зумомъ му́дрствуѧй согрѣши́хъ, не невѣ́дѣнїемъ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Пощадѝ, пощадѝ, Гдⷭ҇и, созда́нїе твоѐ: согрѣши́хъ, ѡ҆сла́би мѝ, ꙗ҆́кѡ є҆стество́мъ чи́стый са́мъ сы́й є҆ди́нъ, и҆ и҆́нъ ра́звѣ тебѐ никто́же є҆́сть кромѣ̀ скве́рны.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Менѐ ра́ди Бг҃ъ сы́й воѡбрази́лсѧ є҆сѝ въ мѧ̀, показа́лъ є҆сѝ чудеса̀, и҆сцѣливъ прокаже́нныѧ и҆ разсла́бленнаго стѧгну́въ, кровоточи́выѧ то́къ ᲂу҆ста́вилъ є҆сѝ, Сп҃се, прикоснове́нїемъ ри́зъ.

Припѣ́въ: Прпⷣбнаѧ ма́ти марі́е, молѝ бг҃а ѡ҆ на́съ.

Струи̑ І҆орда́нскїѧ преше́дши, ѡ҆брѣла̀ є҆сѝ поко́й безболѣ́зненный, пло́ти сла́сти и҆збѣжа́вши, є҆ѧ́же и҆ на́съ и҆змѝ твои́ми молитвами преподо́бнаѧ.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ.

Трⷪ҇ченъ: Тѧ̀ Трⷪ҇це сла́вимъ, є҆ди́наго Бг҃а: ст҃ъ, ст҃ъ, ст҃ъ є҆сѝ Ѻ҆ч҃е, Сн҃е и҆ Дш҃е, про́стое существо̀, є҆ди́нице при́снѡ покланѧ́емаѧ.

И҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Бг҃оро́диченъ: И҆з̾ тебѐ ѡ҆блече́сѧ въ моѐ смѣше́нїе, нетлѣ́ннаѧ, безмꙋжнаѧ мт҃и дв҃о, Бг҃ъ созда́вый вѣ́ки, и҆ соединѝ себѣ̀ человѣ́ческое є҆стество̀.

Возопи́хъ всѣ́мъ се́рдцемъ мои́мъ къ ще́дрому Бг҃ꙋ, и҆ ѹ҆слы́ша мѧ̀ ѿ а҆́да преиспо́днѧго, и҆ возведѐ ѿ тлѝ живо́тъ мо́й.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Воста́ни и҆ поборѝ, ꙗ҆́кѡ І҆ису́съ А҆мали́ка, плотскі́ѧ стра̑сти, и҆ Гаваѡні́ты ле́стныѧ по́мыслы при́снѡ побѣжда́ющи.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Преидѝ вре́мене теку́щее є҆стество̀, ꙗ҆́кѡ пре́жде ковче́гъ, и҆ землѝ ѻ҆́ныѧ бу́ди во ѡ҆держа́нїи ѻ҆бѣтова́нїѧ, душѐ, Бг҃ъ повелѣва́етъ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Ꙗ҆́кѡ спа́слъ є҆сѝ Петра̀ возопи́вша, спасѝ предвари́въ мѧ̀, Сп҃се, ѿ ѕвѣ́рѧ и҆зба́ви, просте́ръ ру́ку твою̀, и҆ возведѝ и҆зъ глубины грѣхо́вныѧ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Приста́нище тѧ̀ вѣ́мъ ᲂу҆ти́шное, Влⷣко, Влⷣко Хрⷭ҇тѐ: но ѿ незаходи́мыхъ глуби́нъ грѣха̀ и҆ ѿча́ѧнїѧ мѧ̀ предвари́въ и҆зба́ви.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ.

Трⷪ҇ченъ: Трⷪ҇ца є҆́смь проста̀, нераздѣ́льна, раздѣ́льна ли́чнѣ, и҆ є҆ди́ница є҆́смь є҆стество́мъ соедине́на, ѻ҆́ц҃ъ глаго́летъ, и҆ Сн҃ъ, и҆ бж҃е́ственный Дх҃ъ.

И҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Бг҃оро́диченъ: Ѹ҆тро́ба твоѧ̀ Бг҃а на́мъ родѝ, воображе́на по на́мъ: є҆го́же ꙗ҆́кѡ Созда́телѧ всѣ́хъ, молѝ, Бцⷣе, да моли́твами твои́ми ѡ҆правди́мсѧ.

Конда́къ, гла́съ ѕ҃: Душѐ моѧ̀, душѐ моѧ̀, воста́ни, что спи́ши; коне́цъ приближа́етсѧ, и҆ и҆́маши смꙋти́тисѧ: воспрѧнѝ ᲂу҆́бѡ, да пощади́тъ тѧ̀ Хрⷭ҇то́съ Бг҃ъ, вездѣ̀ сы́й, и҆ всѧ҆ и҆сполнѧ́ѧй.

І҆рмо́съ: Согрѣши́хомъ, беззако́нновахомъ, непра́вдовахом̾ предъ тобо́ю, нижѐ соблюдо́хомъ, нижѐ сотвори́хомъ, ꙗ҆́коже заповѣ́далъ є҆сѝ на́мъ: но не преда́ждь на́съ до конца̀, ѻ҆ц҃е́въ Бж҃е.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Манассі́ева собрала є҆сѝ согрѣшє́нїѧ и҆зволе́нїемъ, поста́вльши ꙗ҆́кѡ ме́рзости стра́сти, и҆ ᲂу҆мно́живши душѐ негодова́нїе: но тогѡ̀ покаѧ́нїю ревну́ющи те́плѣ, стѧжѝ ᲂу҆миле́нїе.

Припѣ́въ: Поми́лꙋй мѧ̀, бж҃е, поми́лꙋй мѧ̀.

А҆хаа́вѡвымъ поревнова́ла є҆сѝ скве́рнамъ, душѐ моѧ̀, ᲂу҆вы̀ мнѣ̀, была̀ є҆сѝ плотски́хъ скве́рнъ пребыва́лище, и҆ сосу́дъ сра́мленъ страсте́й: но и҆з̾ глубины̀ твоеѧ̀ воздохнѝ, и҆ глаго́ли Бг҃у грѣхѝ твоѧ̀.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Заключи́сѧ тебѣ̀ нб҃о душѐ, и҆ гла́дъ Бж҃їй пости́же тѧ̀, є҆гда̀ И҆лїѝ Ѳесві́тѧнина ꙗ҆́коже А҆хаа́въ не покори́сѧ словесє́мъ и҆ногда̀: но Сара́фѳїи ᲂу҆подо́бивсѧ, напита́й проро́чу ду́шу.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Попалѝ И҆лїа̀ и҆ногда̀ два́щи пѧтьдесѧ́тъ І҆езаве́линыхъ, є҆гда̀ сту́дныѧ Проро́ки погубѝ, во ѡ҆бличе́нїе А҆хаа́вово: но бѣ́гай подража́нїѧ двою̀, душѐ, и҆ ᲂу҆крѣплѧ́йсѧ.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ.

Трⷪ҇ченъ: Трⷪ҇це про́стаѧ, нераздѣ́льнаѧ, є҆диносꙋщнаѧ, и҆ є҆стество̀ є҆ди́но, свѣ́тове и҆ свѣ́т̾, и҆ ст҃а трѝ, и҆ є҆ди́но ст҃о, пое́тсѧ Бг҃ъ Трⷪ҇ца: но воспо́й, просла́ви, живо́тъ и҆ животы̀, дꙋшѐ, всѣ́хъ Бг҃а.

И҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Бг҃оро́диченъ: Пое́мъ тѧ̀, блгⷭ҇ослови́мъ тѧ̀, покланѧ́емсѧ тѝ, Бг҃ороди́тельнице, ꙗ҆́кѡ неразлꙋчныѧ Трⷪ҇цы породила̀ є҆сѝ є҆ди́наго Хрⷭ҇та Бг҃а, и҆ сама̀ ѿве́рзла є҆сѝ на́мъ сꙋщымъ на землѝ нбⷭ҇наѧ.

І҆рмо́съ: Е҆го́же вѡ́инства нбⷭ҇наѧ сла́вѧтъ, и҆ трепе́щꙋтъ Херуві́ми и҆ Серафі́ми, всѧ́ко дыха́нїе и҆ тва́рь, по́ите, бл҃гослови́те, и҆ превозноси́те во всѧ̀ вѣ́ки.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Правосу́де Сп҃се поми́луй и҆ и҆зба́ви мѧ̀ ѻ҆гнѧ̀ и҆ преще́нїѧ, є҆́же и҆́мамъ на судѣ̀ пра́веднѡ претерпѣ́ти: ѡ҆сла́би мѝ пре́жде конца добродѣ́телїю и҆ покаѧ́нїемъ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Ꙗ҆́кѡ разбо́йникъ вопїю́ ти, помѧни́ мѧ: ꙗ҆́кѡ Пе́тръ пла́чу го́рцѣ: ѡ҆сла́би мѝ Сп҃се, зову̀ ꙗ҆́кѡ мыта́рь: слезю̀ ꙗ҆́кѡ блудни́ца: прїимѝ моѐ рыда́нїе, ꙗ҆́коже и҆ногда̀ Ханане́ино.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Гное́нїе, Сп҃се, и҆сцѣлѝ смире́нныѧ моеѧ̀ душѝ, є҆ди́не врачу̀: пла́стырь мнѣ̀ наложѝ и҆ є҆ле́й и҆ вїно̀, дѣла̀ покаѧ́нїѧ, ᲂу҆миле́нїе со слеза́ми.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Ханане́ю и҆ а҆́зъ подража́ѧ, поми́луй мѧ̀, вопїю̀, сн҃е Давд҃овъ: каса́юсѧ кра́ѧ ри́зы, ꙗ҆́кѡ кровоточи́ваѧ: пла́чу, ꙗ҆́кѡ Ма́рѳа и҆ Марі́а над̾ Ла́заремъ.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ.

Трⷪ҇ченъ: Безнача́льне Ѻ҆́ч҃е, Сы́не собезнача́льне, ѹ҆́тѣ́шителю бл҃гі́й, Дꙋше пра́вый, Сло́ва Бж҃їѧ Роди́телю, Ѻ҆ц҃а безнача́льна Сло́ве, Дш҃е живы́й и҆ зи́ждай, Трⷪ҇це є҆ди́нице поми́луй мѧ̀.

И҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Бг҃оро́диченъ: Ꙗ҆́кѡ ѿ ѡ҆броще́нїѧ червлени́цы, пречи́стаѧ, ᲂу҆́мнаѧ багрѧни́це Е҆мманꙋ́илева, внꙋ́трь во чре́вѣ твое́мъ пло́ть и҆стка́сѧ: тѣ́мже Бцⷣꙋ вои́стиннꙋ тѧ̀ почита́емъ.

І҆рмо́съ: Безсѣ́меннаго зача́тїѧ ржⷭ҇тво̀ несказа́нное, мт҃ре безмꙋ́жныѧ нетлѣ́ненъ пло́дъ: Бж҃їе бо рожде́нїе ѡ҆бновлѧ́етъ є҆стества̀: тѣ́мже тѧ̀ всѝ ро́ди, ꙗ҆́кѡ бг҃оневѣ́стнꙋю Мт҃рь, правосла́вно велича́емъ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Неду́ги и҆сцѣлѧ́ѧ, ни́щымъ бл҃говѣствова́ше Хрⷭ҇то́съ сло́во, вре́дныѧ ᲂу҆врачева̀, съ мытарѝ ꙗ҆дѧ́ше, со грѣ́шники бесѣ́доваше, І҆аі́ровы дще́ре ду́шу пред̾ꙋме́ршую возвратѝ ѡ҆сѧза́нїемъ рукѝ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Мыта́рь спаса́шесѧ, и҆ блудни́ца цѣлому́дрствоваше, и҆ Фарїсе́й хвалѧ́сѧ ѡ҆сужда́шесѧ: ѻ҆́въ ᲂу҆́бѡ, ѡ҆чи́сти мѧ̀: ѻ҆́ва же, поми́лꙋй мѧ̀: се́й же велича́шесѧ вопїѧ̀: Бж҃е, бл҃годарю́ тѧ, и҆ про́чыѧ безу́мныѧ глаго́лы.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Закхе́й мыта́рь бѣ̀, но ѻ҆ба́че сп҃са́шесѧ, и҆ Фарисе́й Сі́монъ соблажнѧ́шесѧ, и҆ блудни́ца прїима́ше ѡ҆ста́вительнаѧ разрѣше́нїѧ ѿ и҆му́щаго крѣ́пость ѡ҆ставлѧ́ти грѣхѝ: ю҆́же душѐ потщи́сѧ подража́ти.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Блꙋдни́цѣ, ѽ ѻ҆каѧ́ннаѧ душѐ моѧ̀, не поревнова́ла є҆сѝ, ꙗ҆́же прїи́мши мѵ́ра а҆лава́стръ, со слеза́ми ма́заше но́зѣ Спа́совѣ, ѡ҆тре́ же власы̀, дре́внихъ согрѣше́нїй рукописа́нїе раздира́ющагѡ є҆ѧ̀.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Гра́ды, и҆̀мже дадѐ Хрⷭ҇то́съ бл҃говѣ́стїе, душѐ моѧ̀, ᲂу҆вѣ́дала є҆сѝ, ка́кѡ про́клѧти бы́ша: ᲂу҆бо́йсѧ ᲂу҆каза́нїѧ, да не бу́деши ꙗ҆́коже ѻ҆́ны, и҆́хже Содо́млѧнѡмъ Влⷣка ᲂу҆подо́бивъ, да́же до а҆́да ѡ҆судѝ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Да не го́ршаѧ ѽ душѐ моѧ̀, ꙗ҆ви́шисѧ ѿча́ѧнїемъ, Ханане́и вѣ́ру слы́шавшаѧ, є҆ѧ́же дщѝ сло́вомъ Бж҃їимъ и҆сцѣли́сѧ: сн҃е Дв҃довъ, спасѝ и҆ менѐ, воззовѝ и҆з̾ глꙋбины̀ се́рдца, ꙗ҆́коже ѻ҆на̀ Хрⷭ҇ту̀.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ.

Трⷪ҇ченъ: Ѻ҆ц҃а̀ просла́вимъ, Сы́на превознесе́мъ, бж҃ественномꙋ Дх҃ꙋ вѣ́рнѡ поклони́мсѧ, Трⷪ҇цѣ нераздѣ́льнѣй, є҆ди́ницѣ по сꙋществу̀, ꙗ҆́кѡ свѣ́тꙋ и҆ свѣ́томъ, и҆ животꙋ̀ и҆ живото́мъ, животворѧ́щемꙋ и҆ просвѣща́ющемꙋ концы̀.

И҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Бг҃оро́диченъ: Гра́дъ тво́й сохранѧ́й, Бг҃ороди́тельнице пречⷭ҇таѧ: въ тебѣ̀ бо се́й вѣ́рнѡ ца́рствꙋѧй, въ тебѣ̀ и҆ ѹ҆твержда́етсѧ, и҆ тобо́ю побѣжда́ѧй побѣжда́етъ всѧ́кое и҆скуше́нїе, и҆ плѣнѧ́етъ ра́тники, и҆ прохо́дитъ послꙋша́нїе.

Припѣ́въ: Прпⷣбне ѻ҆́тче а҆ндре́е, молѝ бг҃а ѡ҆ на́съ.

А҆ндрею: А҆ндре́е чтⷭ҇ны́й и҆ ѻ҆́ч҃е требл҃же́ннѣйшїй, па́стырю Кри́тскїй, не преста́й молѧ́сѧ ѡ҆ воспѣва́ющихъ тѧ̀: да и҆зба́вимсѧ всѝ гнѣ́ва и҆ ско́рби и҆ тлѣ́нїѧ и҆ прегрѣше́нїй безмѣ́рных̾, чтꙋщихъ твою̀ па́мѧть вѣ́рнѡ.

І҆рмо́съ: Безсѣ́меннаго зача́тїѧ ржⷭ҇тво̀ несказа́нное, мт҃ре безмꙋ́жныѧ нетлѣ́ненъ пло́дъ: Бж҃їе бо рожде́нїе ѡ҆бновлѧ́етъ є҆стества̀: тѣ́мже тѧ̀ всѝ ро́ди, ꙗ҆́кѡ бг҃оневѣ́стнꙋю Мт҃рь, правосла́вно велича́емъ.