Во вто́рник пе́рвой седми́цы

І҆рмо́съ: Помо́щник и҆ покро́витель бы́сть мнѣ̀ во спасе́нїе, се́й мой бг҃ъ, и҆ прославлю є҆гѡ: бг҃ъ ѻ҆ц҃а моегѡ̀, и҆ вознесꙋ̀ є҆гѡ̀: сла́внѡ бо просла́висѧ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Ка́їново преше́дъ ѹ҆бі́йство, произволе́нїемъ бы́хъ ѹ҆бі́йца со́вѣсти дꙋше́внѣй, ѡ҆живи́въ пло́ть, и҆ воева́въ на ню̀ лꙋка́выми мои́ми дѣѧ́нми.

Припѣ́въ: Поми́лꙋй мѧ̀, бж҃е, поми́лꙋй мѧ̀.

А҆велевѣ, І҆и҃се, не ѹ҆подо́бихсѧ пра́вдѣ, да́ра тебѣ̀ прїѧ́тна не принесо́хъ когда̀, ни дѣѧ́нїѧ бж҃е́ственна, ни же́ртвы чи́стыѧ, ни житїѧ̀ непоро́чнаго.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Ꙗ҆́кѡ Ка́їнъ и҆ мы̀, дꙋше ѡ҆каѧ́ннаѧ, всѣ́хъ Содѣ́телю дѣѧ́нїѧ сквє́рнаѧ, и҆ же́ртву поро́чнꙋю, и҆ непотре́бное житїе́ принесо́хъ вку́пѣ: тѣ́мже и҆ ѡ҆сꙋди́хомсѧ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Бре́нїе зда́тель живосозда́въ, вложи́лъ є҆сѝ мнѣ̀ пло́ть и҆ кѡ́сти, и҆ дыха́нїе и҆ жи́знь: но ѽ Тво́рче мо́й и҆ И҆зба́вителю мо́й и҆ Сꙋдїѐ, ка́ющасѧ прїими́ мѧ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

И҆звѣща́ю тѝ, Спс҃е, грѣхѝ, ꙗ҆́же содѣ́ѧхъ, и҆ дꙋшѝ и҆ тѣ́ла моегѡ̀ ꙗ҆́звы, ꙗ҆̀же внꙋ́трь ᲂу҆бі́йственнїи по́мыслы разбо́йнически на мѧ̀ возложи́ша.

Припѣ́въ: Поми́лꙋй мѧ̀, бж҃е, поми́лꙋй мѧ̀.

А҆́ще и҆ согрѣши́хъ, Спс҃е, но вѣ́мъ, ꙗ҆́кѡ чл҃вѣколю́бецъ є҆сѝ: наказу́еши млⷭ҇тивно, и҆ милосе́рдствуеши те́плѣ, слезѧ́ща зри́ши и҆ притека́еши ꙗ҆́кѡ ѻ҆ц҃ъ, призыва́ѧ блꙋ́днаго.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ.

Трⷪ҇ченъ: Пресꙋ́щнаѧ трⷪ҇це, во є҆ди́ницѣ покланѧ́емаѧ, возмѝ бре́мѧ ѿ менѐ тѧ́жкое грѣхо́вное, и҆ ꙗ҆́кѡ благоꙋтро́бна, да́ждь мѝ сле́зы ᲂу҆миле́нїѧ.

И҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Бг҃оро́диченъ: Бцⷣе, наде́жде и҆ предста́тельство тебѐ пою́щихъ, возмѝ бре́мѧ ѿ мене тѧ́жкое грѣхо́вное, и҆ ꙗ҆́кѡ влⷣчца чⷭ҇таѧ, ка́ющасѧ прїими́ мѧ.

І҆рмо́съ: Вонмѝ нб҃о, и҆ возглаго́лю, и҆ воспою̀ Хрⷭ҇та ѿ Дв҃ы плотїю прише́дшаго.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Сшива́ше ко́жныѧ ри́зы грѣ́хъ мнѣ̀, ѡ҆бнажи́вый мѧ̀ пе́рвыѧ бг҃отка́нныѧ ѻ҆де́жды.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Ѡ҆бложе́нъ є҆́смь ѡ҆дѣѧ́нїемъ стꙋда̀, ꙗ҆́коже ли́ствїемъ смоко́внымъ, во ѡ҆бличе́нїе мои́хъ самовла́стныхъ страсте́й.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Ѡ҆дѣ́ѧхсѧ въ сра́мнꙋю ри́зу, и҆ ѡ҆крова́вленнꙋю стꙋ́дно, тече́нїемъ стра́стнаго и҆ любосла́стнаго живота̀.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Впадо́хъ въ стра́стнꙋю па́гꙋбу и҆ въ веще́стнꙋю тлю̀, и҆ ѿто́лѣ до ны́нѣ вра́гъ мнѣ̀ досажда́етъ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Любове́щное и҆ любоимѣ́нное житїѐ, невоздержа́нїемъ, Спс҃е, предпоче́тъ ны́нѣ, тѧ́жкимъ бре́менемъ ѡ҆бложе́нъ є҆́смь.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Оу҆краси́хъ пло́тскїй ѡ҆́бразъ скве́рныхъ помышле́нїй разли́чнымъ ѡ҆бложе́нїемъ, и҆ ѡ҆сꙋжда́юсѧ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Внѣ́шнимъ прилѣ́жнѡ бл҃гоꙋкрашенїемъ є҆ди́нѣмъ попеко́хсѧ, внꙋтреннюю презрѣ́въ богоѻбра́знꙋю ски́нїю.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Погребо́хъ пе́рвагѡ ѡ҆́браза добро́тꙋ, Сп҃се страстьмѝ, ю҆́же ꙗ҆́кѡ и҆ногда̀ дра́хмꙋ, взыска́въ ѡ҆брѧ́щи.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Согрѣши́хъ, ꙗ҆́коже блꙋдни́ца вопїю́ ти, є҆ди́нъ согрѣши́хъ тебѣ̀, ꙗ҆́кѡ мѵ́ро прїимѝ Сп҃се и҆ моѧ̀ сле́зы.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Ѡ҆чи́сти, ꙗ҆́коже мыта́рь вопїю̀ тѝ, Сп҃се ѡ҆чи́сти мѧ̀: никто́же бо сꙋ́щихъ и҆зъ А҆да́ма, ꙗ҆́коже а҆́зъ согрѣши́хъ тебѣ̀.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ.

Трⷪ҇ченъ: Е҆ди́наго тѧ̀ въ трїе́хъ ли́цѣхъ, Бг҃а всѣ́хъ пою̀, Ѻ҆́ц҃а̀ и҆ Сн҃а и҆ Дх҃а Ст҃а́го.

И҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Бг҃оро́диченъ: Пречⷭ҇таѧ Бцⷣе Дв҃о, є҆ди́на всепѣ́таѧ, молѝ прилѣ́жнѡ во є҆́же спасти́сѧ на́мъ.

І҆рмо́съ: Оу҆твердѝ, Гдⷭ҇и, на ка́мени за́повѣдей твои́хъ подви́гшеесѧ се́рдце моѐ, ꙗ҆́кѡ є҆ди́нъ ст҃ъ є҆сѝ и҆ Гдⷭ҇ь.

Припѣ́въ: Поми́лꙋй мѧ̀, бж҃е, поми́лꙋй мѧ̀.

И҆сто́чникъ живота̀ стѧжа́хъ тебѐ, сме́рти низложи́телѧ, и҆ вопїю́ ти ѿ се́рдца моего̀ пре́жде конца̀: согрѣши́хъ, ѡ҆чи́сти и҆ спасѝ мѧ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Согрѣши́хъ, Гдⷭ҇и, согрѣши́хъ тебѣ̀, ѡ҆чи́сти мѧ̀: нѣ́сть бо, и҆́же кто̀ согрѣшѝ въ человѣ́цѣхъ, є҆го́же не превзыдо́хъ прегрѣше́нми.

Припѣ́въ: Поми́лꙋй мѧ̀, бж҃е, поми́лꙋй мѧ̀.

При Но́и, Сп҃се, блꙋ́дствовавшыѧ подража́хъ, ѻ҆́нѣхъ наслѣ́довавъ ѡ҆сꙋжде́нїе, въ пото́пѣ погрꙋже́нїѧ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Ха́ма ѻ҆́наго дꙋшѐ, ѻ҆тцеꙋбі́йца подража́вши, сра́ма не покры́ла є҆сѝ и҆́скреннѧгѡ, вспѧ́ть зрѧ̀ возврати́вшисѧ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Запале́нїѧ ꙗ҆́коже Ло́тъ, бѣ́гай дꙋше моѧ̀ грѣха̀, бѣ́гай Содо́мы и҆ Гомо́рры, бѣ́гай пла́мене всѧ́кагѡ безслове́снаго жела́нїѧ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Поми́лꙋй Гдⷭ҇и, поми́лꙋй мѧ̀, вопїю̀ тѝ, є҆гда̀ прїи́деши со А҆́гг҃лы твои́ми, возда́ти всѣ́мъ по достоѧ́нїю дѣѧ́нїй.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ.

Трⷪ҇ченъ: Трⷪ҇це про́стаѧ, несозда́ннаѧ, безнача́льное є҆стество̀, въ трⷪ҇цѣ пѣва́емаѧ ѵ҆поста́сей, спаси́ ны̀ вѣ́рою покланѧ́ющыѧсѧ держа́вѣ твое́й.

И҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Бг҃оро́диченъ: Ѿ Ѻ҆тца̀ безлѣ́тна Сн҃а въ лѣ́то Бг҃ороди́тельнице, неискꙋсомꙋ́жнѡ родила̀ є҆сѝ, стра́нное чꙋ́до, пребы́вши дв҃а доѧ́щи.

І҆рмо́съ: Ѹ҆слы́ша Прⷪ҇ро́къ прише́ствїе твое́, Гдⷭ҇и, и҆ ѹ҆боѧ́сѧ, ꙗ҆́кѡ хо́щеши ѿ Дв҃ы роди́тисѧ и҆ чл҃кѡмъ ꙗ҆ви́тисѧ, и҆ гл҃аше: ѹ҆слы́шахъ слу́хъ тво́й и҆ ѹ҆боѧ́хсѧ, сла́ва си́лѣ твое́й Гдⷭ҇и.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Бдѝ ѽ дꙋшѐ моѧ̀, и҆зрѧ́дствꙋй ꙗ҆́коже дре́вле вели́кїй въ Патрїа́рсѣхъ, да стѧ́жеши дѣѧ́нїе съ ра́зꙋмомъ, да бꙋ́деши ᲂу҆́мъ зрѧ́й Бг҃а и҆ дости́гнеши незаходѧ́щїй мра́къ въ видѣ́нїи, и҆ бꙋ́деши вели́кїй купе́цъ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Двана́десѧте Патрїа́рхѡвъ, вели́кїй въ Патрїа́рсѣхъ дѣтотвори́въ, та́йнѡ ᲂу҆твердѝ тебѣ̀ лѣ́ствицу дѣ́ѧтельнаго, дꙋшѐ моѧ̀ восхожде́нїѧ: дѣ́ти ꙗ҆́кѡ ѡ҆снова́нїѧ, степе́ни ꙗ҆́кѡ восхожде́нїѧ, премꙋдреннѡ подложи́въ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

И҆са́ѵа возненави́дѣннаго подража́ла є҆сѝ, дꙋшѐ, ѿдала̀ є҆сѝ преле́стникꙋ твоемꙋ̀ пе́рвыѧ добро́ты пе́рвенство, и҆ ѻ҆те́ческїѧ моли́твы ѿпа́ла є҆сѝ, и҆ два́жды поползнꙋласѧ є҆сѝ, ѻ҆каѧ́ннаѧ, дѣѧ́нїемъ и҆ ра́зумомъ: тѣ́мже ны́нѣ пока́йсѧ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Е҆дѡ́мъ И҆са́ѵъ нарече́сѧ, кра́йнѧгѡ ра́ди женонеи́стовнаго смѣше́нїѧ: невоздержа́нїемъ бо при́снѡ разжига́емь, Е҆до́мъ и҆менова́сѧ, є҆же глаго́летсѧ разжже́нїе дꙋшѝ любогрѣхо́вныѧ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

І҆́ова на гно́ищи слы́шавши, ѽ дꙋшѐ моѧ̀, ѡ҆правда́вшагосѧ, того̀ мꙋ́жеству не поревнова́ла є҆сѝ, тве́рдагѡ не и҆мѣ́ла є҆сѝ предложе́нїѧ, во всѣ́хъ ꙗ҆́же вѣ́си, и҆ и҆́миже и҆скуси́ласѧ є҆сѝ, но ꙗ҆ви́ласѧ є҆сѝ нетерпѣли́ва.

Припѣ́въ: Поми́лꙋй мѧ̀, бж҃е, поми́лꙋй мѧ̀.

И҆́же пе́рвѣе на престо́лѣ, на́гъ ны́нѣ на гно́ищи гно́енъ, многїй въ ча́дѣхъ и҆ сла́вный, безча́денъ и҆ бездо́мокъ напра́снѡ: пала́ту ᲂу҆́бѡ гно́ище, и҆ би́серїе стру́пы вмѣнѧ́ше.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ.

Трⷪ҇ченъ: Нераздѣ́льное сꙋщество́мъ, несли́тное ли́цы бг҃осло́влю тѧ̀, трⷪ҇ческое є҆ди́но Бж҃ество̀, ꙗ҆́кѡ є҆диноцрⷭ҇твенное и҆ сопресто́льное: вопїю́ ти пѣ́снь вели́кꙋю, въ вы́шнихъ трегу́бо пѣ́сносло́вимꙋю.

И҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Бг҃оро́диченъ: И҆ ражда́еши, и҆ дѣ́вствꙋеши, и҆ пребыва́еши ѻ҆бою́дꙋ є҆стество́мъ Дв҃а: рожде́йсѧ ѡ҆бновлѧ́етъ зако́ны є҆стества̀, ѹ҆тро́ба же ражда́етъ неражда́ющаѧ: Бг҃ъ и҆дѣ́же хо́щетъ, побѣжда́етсѧ є҆стества̀ чи́нъ: твори́тъ бо є҆ли̑ка хо́щетъ.

І҆рмо́съ: Ѿ нощѝ ᲂу҆́тренююща, чл҃вѣколю́бче, просвѣтѝ молю́сѧ, и҆ наста́ви и҆ менѐ на повелѣ̑нїѧ твоѧ̑: и҆ наꙋчи́ мѧ сп҃се, твори́ти во́лю твою̀.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Мѡѷсе́овъ слы́шала є҆сѝ ковче́жецъ, дꙋше, вода́ми, волна́ми носи́мъ рѣчны́ми ꙗ҆́кѡ въ черто́зѣ дре́вле бѣ́гающїй дѣ́ла го́рькагѡ совѣ́та Фараони́тска.

Припѣ́въ: Поми́лꙋй мѧ̀, бж҃е, поми́лꙋй мѧ̀.

А҆́ще ба́бы слы́шала є҆сѝ, ᲂу҆бива́ющыѧ и҆ногда̀ безвозра́стное мꙋжеское, душѐ ѻ҆́каѧ́ннаѧ, цѣлому́дрїѧ дѣѧ́нїе: ны́нѣ ꙗ҆́кѡ вели́кїй Мѡѷсе́й, ссѝ премꙋдрость.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Ꙗ҆́кѡ Мѡѷсе́й вели́кїй Е҆́гѵ́птѧнина ᲂу҆ма̀ ᲂу҆ѧзви́вши ѻ҆каѧ́ннаѧ, не ᲂу҆би́ла є҆сѝ дꙋшѐ, и҆ ка́кѡ всели́шисѧ, глаго́ли, въ пусты́ню страсте́й покаѧ́нїемъ;

Припѣ́въ: Поми́лꙋй мѧ̀, бж҃е, поми́лꙋй мѧ̀.

Въ пусты́ню всели́сѧ вели́кїй Моѷсе́й: грѧдѝ ᲂу҆́бѡ, подража́й тогѡ̀ житїѐ, да и҆ въ купинѣ̀ богоѧвле́нїѧ, душѐ, въ видѣ́нїи бу́деши.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Моѷсе́овъ же́злъ воѡбража́й, душѐ, ᲂу҆дарѧ́ющїй мо́ре и҆ ѡ҆гꙋстѣва́ющїй глубину̀, во ѡ҆́бразъ крⷭ҇та̀ боже́ственнагѡ, и҆́мже мо́жеши и҆ ты̀ вели̑каѧ соверши́ти.

Припѣ́въ: Поми́лꙋй мѧ̀, бж҃е, поми́лꙋй мѧ̀.

А҆арѡ́нъ приноша́ше ѻ҆́гнь Бг҃у непоро́чный, неле́стный: но Ѻ҆фнѝ и҆ Фїнее́съ, ꙗ҆́кѡ ты̀ душѐ, приноша́ху чу́жде́е Бг҃у ѡ҆скверне́нное житїѐ.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ.

Трⷪ҇ченъ: Тѧ̀ Трⷪ҇це сла́вимъ, є҆ди́наго Бг҃а: ст҃ъ, ст҃ъ, ст҃ъ є҆сѝ Ѻ҆ч҃е, Сн҃е и҆ Дш҃е, про́стое существо̀, є҆ди́нице при́снѡ покланѧ́емаѧ.

И҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Бг҃оро́диченъ: И҆з̾ тебѐ ѡ҆блече́сѧ въ моѐ смѣше́нїе, нетлѣ́ннаѧ, безмꙋжнаѧ мт҃и дв҃о, Бг҃ъ созда́вый вѣ́ки, и҆ соединѝ себѣ̀ человѣ́ческое є҆стество̀.

Возопи́хъ всѣ́мъ се́рдцемъ мои́мъ къ ще́дрому Бг҃ꙋ, и҆ ѹ҆слы́ша мѧ̀ ѿ а҆́да преиспо́днѧго, и҆ возведѐ ѿ тлѝ живо́тъ мо́й.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Во́лны Сп҃се прегрѣше́нїй мои́хъ, ꙗ҆́кѡ въ мо́ри Чермнѣ́мъ возвраща́ющесѧ, покры́ша мѧ̀ внеза́пу, ꙗ҆́кѡ Е҆гѵ́птѧны и҆ногда̀, и҆ трїста́ты.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Неразꙋ́мное дꙋшѐ произволе́нїе и҆мѣ́ла є҆сѝ, ꙗ҆́кѡ пре́жде І҆и҃ль: бжⷭ҇твенныѧ бо ма́нны предсꙋди́ла є҆сѝ безслове́снѡ любосла́стное страсте́й ѡ҆б̾ѧде́нїе.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Кладенцы̀ дꙋшѐ предпочла̀ є҆сѝ Ханане́йскихъ мы́слей па́че жи́лы ка́мене, и҆з̾ негѡ́же премꙋ́дрости ꙗ҆́кѡ ча́ша пролива́етъ то́ки бг҃осло́вїѧ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Свина́ѧ мѧса̀ и҆ котлы̀ и҆ Е҆гѵ́петскую пи́щꙋ па́че небе́сныѧ предсꙋди́ла є҆сѝ, дꙋшѐ моѧ̀, ꙗ҆́коже дре́вле неразꙋ́мнїи лю́дїе въ пꙋсты́ни.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Ꙗ҆́кѡ ᲂу҆да́ри Моѷсе́й ра́бъ тво́й жезло́мъ ка́мень, ѻ҆бра́зно животвори̑ваѧ ре́бра твоѧ̀ прообразова́ше, и҆з̾ ни́хже всѝ питїѐ жи́зни, Сп҃се, почерпа́емъ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

И҆спыта́й дꙋшѐ и҆ смотрѧ́й, ꙗ҆́коже І҆исꙋ́съ Наѵи́нъ, ѡ҆бѣтова́нїѧ зе́млю, какова̀ є҆́сть, и҆ всели́сѧ въ ню̀ бл҃гозако́нїемъ.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ.

Трⷪ҇ченъ: Трⷪ҇ца є҆́смь проста̀, нераздѣ́льна, раздѣ́льна ли́чнѣ, и҆ є҆ди́ница є҆́смь є҆стество́мъ соедине́на, ѻ҆́ц҃ъ глаго́летъ, и҆ Сн҃ъ, и҆ бж҃е́ственный Дх҃ъ.

И҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Бг҃оро́диченъ: Ѹ҆тро́ба твоѧ̀ Бг҃а на́мъ родѝ, воображе́на по на́мъ: є҆го́же ꙗ҆́кѡ Созда́телѧ всѣ́хъ, молѝ, Бцⷣе, да моли́твами твои́ми ѡ҆правди́мсѧ.

Конда́къ, гла́съ ѕ҃: Душѐ моѧ̀, душѐ моѧ̀, воста́ни, что спи́ши; коне́цъ приближа́етсѧ, и҆ и҆́маши смꙋти́тисѧ: воспрѧнѝ ᲂу҆́бѡ, да пощади́тъ тѧ̀ Хрⷭ҇то́съ Бг҃ъ, вездѣ̀ сы́й, и҆ всѧ҆ и҆сполнѧ́ѧй.

І҆рмо́съ: Согрѣши́хомъ, беззако́нновахомъ, непра́вдовахом̾ предъ тобо́ю, нижѐ соблюдо́хомъ, нижѐ сотвори́хомъ, ꙗ҆́коже заповѣ́далъ є҆сѝ на́мъ: но не преда́ждь на́съ до конца̀, ѻ҆ц҃е́въ Бж҃е.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Кївѡ́тъ ꙗ҆́кѡ ноша́шесѧ на колесни́цѣ, За́нъ ѻ҆́ный, є҆гда̀ превра́щшусѧ тельцꙋ̀ то́чїю косну́сѧ, Бж҃їимъ и҆скꙋси́сѧ гнѣ́вомъ: но тогѡ̀ дерзнове́нїѧ ᲂу҆бѣжа́вши дꙋшѐ, почита́й бж҃е́ственнаѧ че́стнѣ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Слы́шала є҆сѝ А҆вессалѡ́ма, ка́кѡ на є҆стество̀ воста̀: позна́ла є҆сѝ тогѡ̀ сквє́рнаѧ дѣѧ́нїѧ, и҆́миже ѡ҆сквернѝ ло́же Двд҃а ѻ҆ц҃а̀: но ты̀ подража́ла є҆сѝ тогѡ̀ стра́стнаѧ и҆ любосла́стнаѧ стремле́нїѧ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Покори́ла є҆сѝ нерабо́тное твоѐ досто́инство тѣ́лꙋ твоему̀: и҆но́гѡ бо А҆хїтофе́ла ѡ҆брѣ́тши врага̀, душѐ, снизшла̀ є҆сѝ сегѡ̀ совѣ́тѡмъ: но сїѧ̑ разсы́па са́мъ Хрⷭ҇то́съ, да ты̀ всѧ́кѡ спасе́шисѧ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Соломо́нъ чу́дный, и҆ бл҃года́ти премꙋдрости и҆спо́лненный, се́й лука́вое и҆ногда̀ предъ Бг҃омъ сотвори́въ, ѿстꙋпѝ ѿ негѡ̀: є҆мꙋже ты̀ проклѧ́тымъ твои́мъ житїе́мъ, дꙋшѐ ᲂу҆подо́биласѧ є҆сѝ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Сластьмѝ влеко́мь страсте́й свои́хъ ѡ҆сквернѧ́шесѧ, ᲂу҆вы̀ мнѣ̀, рачи́тель премꙋ́дрости, рачи́тель блу́дныхъ же́нъ, и҆ стра́ненъ ѿ Бг҃а: є҆го́же ты̀ подража́ла є҆сѝ ᲂу҆мо́мъ, ѻ҆́ дꙋшѐ, сладостра́стьми скве́рными.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Ровоа́му поревнова́ла є҆сѝ не послу́шавшему совѣ́та ѻ҆́ч҃а, ку́пно же и҆ ѕлѣ́йшему рабу̀ І҆еровоа́му, пре́жнему ѿсту́пнику, душѐ: но бѣ̀гай подража́нїѧ и҆ зовѝ Бг҃ꙋ: согрѣши́хъ, ᲂу҆ще́дри мѧ̀.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ.

Трⷪ҇ченъ: Трⷪ҇це про́стаѧ, нераздѣ́льнаѧ, є҆диносꙋщнаѧ, и҆ є҆стество̀ є҆ди́но, свѣ́тове и҆ свѣ́т̾, и҆ ст҃а трѝ, и҆ є҆ди́но ст҃о, пое́тсѧ Бг҃ъ Трⷪ҇ца: но воспо́й, просла́ви, живо́тъ и҆ животы̀, дꙋшѐ, всѣ́хъ Бг҃а.

И҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Бг҃оро́диченъ: Пое́мъ тѧ̀, блгⷭ҇ослови́мъ тѧ̀, покланѧ́емсѧ тѝ, Бг҃ороди́тельнице, ꙗ҆́кѡ неразлꙋчныѧ Трⷪ҇цы породила̀ є҆сѝ є҆ди́наго Хрⷭ҇та Бг҃а, и҆ сама̀ ѿве́рзла є҆сѝ на́мъ сꙋщымъ на землѝ нбⷭ҇наѧ.

І҆рмо́съ: Е҆го́же вѡ́инства нбⷭ҇наѧ сла́вѧтъ, и҆ трепе́щꙋтъ Херуві́ми и҆ Серафі́ми, всѧ́ко дыха́нїе и҆ тва́рь, по́ите, бл҃гослови́те, и҆ превозноси́те во всѧ̀ вѣ́ки.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Ты̀ Ѻ҆зі́и дꙋшѐ поревнова́вши, сегѡ̀ прокаже́нїе въ себѣ̀ стѧжа́ла є҆сѝ сꙋгу́бѡ: безмѣ̀стнаѧ бо мы́слиши, беззакѡ́ннаѧ же дѣ́еши: ѡ҆ста́ви ꙗ҆́же и҆́маши, и҆ притецы̀ къ покаѧ́нїю.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Нїнеѵі́тѧны, дꙋшѐ, слы́шала є҆сѝ ка́ющыѧсѧ Бг҃ꙋ вре́тищемъ и҆ пе́пеломъ: си́хъ не подража́ла є҆сѝ, но ꙗ҆ви́ласѧ є҆сѝ злѣ́йшаѧ всѣ́хъ пре́жде зако́на и҆ по зако́нѣ прегрѣши́вшихъ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Въ ро́вѣ бла́та слы́шала є҆сѝ І҆еремі́ю, дꙋшѐ, гра́да Сїѡ́нѧ рыда́нми вопїю́ща и҆ сле́зъ и҆́щꙋща: подража́й сегѡ̀ плаче́вное житїѐ, и҆ спасе́шисѧ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

І҆ѡ́на въ Ѳарсі́съ побѣжѐ, проразумѣ́въ ѡ҆браще́нїе Нїнеѵі́тѧнѡвъ: разумѣ́ бо ꙗ҆́кѡ Проро́къ Бж҃їе благоꙋтробїе: тѣ́мже ревнова́ше проро́честву не солга́тисѧ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Данїи́ла въ ро́вѣ слы́шала є҆сѝ, ка́кѡ заградѝ ᲂу҆ста̀, ѽ душѐ ѕвѣре́й: ᲂу҆вѣ́дѣла є҆сѝ, ка́кѡ ѻ҆́троцы и҆̀же ѡ҆ А҆за́рїи погаси́ша вѣ́рою пе́щи пла́мень горѧ́щїй.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Ве́тхаго завѣ́та всѧ̀ приведо́хъ, тѝ душѐ, къ подо́бїю, подража́й пра́ведныхъ бг҃олюби́ваѧ дѣѧ́нїѧ, и҆збѣ́гни же па́ки лꙋка́выхъ грѣхѡ́въ.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ.

Трⷪ҇ченъ: Безнача́льне Ѻ҆́ч҃е, Сы́не собезнача́льне, ѹ҆́тѣ́шителю бл҃гі́й, Дꙋше пра́вый, Сло́ва Бж҃їѧ Роди́телю, Ѻ҆ц҃а безнача́льна Сло́ве, Дш҃е живы́й и҆ зи́ждай, Трⷪ҇це є҆ди́нице поми́луй мѧ̀.

И҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Бг҃оро́диченъ: Ꙗ҆́кѡ ѿ ѡ҆броще́нїѧ червлени́цы, пречи́стаѧ, ᲂу҆́мнаѧ багрѧни́це Е҆мманꙋ́илева, внꙋ́трь во чре́вѣ твое́мъ пло́ть и҆стка́сѧ: тѣ́мже Бцⷣꙋ вои́стиннꙋ тѧ̀ почита́емъ.

І҆рмо́съ: Безсѣ́меннаго зача́тїѧ ржⷭ҇тво̀ несказа́нное, мт҃ре безмꙋ́жныѧ нетлѣ́ненъ пло́дъ: Бж҃їе бо рожде́нїе ѡ҆бновлѧ́етъ є҆стества̀: тѣ́мже тѧ̀ всѝ ро́ди, ꙗ҆́кѡ бг҃оневѣ́стнꙋю Мт҃рь, правосла́вно велича́емъ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Хрⷭ҇то́съ и҆скꙋша́шесѧ, дїа́волъ и҆скꙋша́ше, показу́ѧ ка́менїе, да хлѣ́би бꙋдутъ, на го́ру возведѐ ви́дѣти всѧ̑ ца́рствїѧ мі́ра во мгнове́нїи: ᲂу҆бо́йсѧ ѽ дꙋшѐ, ловле́нїѧ, трезви́сѧ, моли́сѧ на всѧ́кїй ча́съ Бг҃ꙋ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Го́рлица пꙋстынолю́бнаѧ, гла́съ вопїю́щагѡ возгласѝ, Хрⷭ҇то́въ свѣти́льник̾, проповѣ́дуѧй покаѧ́нїе: И҆́рѡдъ беззако́ннова со И҆рѡдїа́дою: зрѝ дꙋшѐ моѧ̀, да не ᲂу҆вѧ́знеши въ беззакѡ́нныѧ сѣ̑ти, но ѡ҆блобыза́й покаѧ́нїе.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Въ пꙋсты́ню всели́сѧ бл҃года́ти Предте́ча, и҆ І҆ꙋде́а всѧ̀ и҆ Самарі́а слы́шавше теча́ху и҆ и҆сповѣ́даху грѣхѝ своѧ̀, креща́ющесѧ ᲂу҆се́рднѡ, и҆́хже ты̀ не подража́ла є҆сѝ, дꙋшѐ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Бра́къ ᲂу҆́бѡ честны́й и҆ ло́же нескве́рно: ѻ҆боѧ́ бо Хрⷭ҇то́съ пре́жде благословѝ, пло́тїю ꙗ҆ды́й, и҆ въ Ка́нѣ же на бра́цѣ во́дꙋ въ вїно̀ соверша́ѧ, и҆ показꙋ́ѧ пе́рвое чꙋ́до, да ты̀ и҆змени́шисѧ, ѽ дꙋшѐ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Разсла́бленнаго стѧгну̀ Хрⷭ҇то́съ, ѻ҆́дръ взе́мша, и҆ ю҆́ношꙋ ᲂу҆ме́рша воздви́же, вдови́че рожде́нїе, и҆ со́тника ѻ҆́трока, и҆ Самарѧны́нѣ ꙗ҆ви́сѧ, въ дс҃ѣ слу́жбꙋ тебѣ̀, дꙋшѐ, предживописа̀.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Кровоточи́вꙋю и҆сцѣлѝ прикоснове́нїемъ кра́ѧ ри́зна Гд҃ь, прокаже́нныѧ ѡ҆чи́сти, слѣпы́ѧ и҆ хромы́ѧ просвѣти́въ и҆спра́ви, глꙋхі̑ѧ же и҆ нѣмы̑ѧ и҆ нича́щыѧ ни́зу и҆сцѣлѝ сло́вомъ, да ты̀ сп҃се́шисѧ, ѻ҆каѧ́ннаѧ дꙋшѐ.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ.

Трⷪ҇ченъ: Ѻ҆ц҃а̀ просла́вимъ, Сы́на превознесе́мъ, бж҃ественномꙋ Дх҃ꙋ вѣ́рнѡ поклони́мсѧ, Трⷪ҇цѣ нераздѣ́льнѣй, є҆ди́ницѣ по сꙋществу̀, ꙗ҆́кѡ свѣ́тꙋ и҆ свѣ́томъ, и҆ животꙋ̀ и҆ живото́мъ, животворѧ́щемꙋ и҆ просвѣща́ющемꙋ концы̀.

И҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Бг҃оро́диченъ: Гра́дъ тво́й сохранѧ́й, Бг҃ороди́тельнице пречⷭ҇таѧ: въ тебѣ̀ бо се́й вѣ́рнѡ ца́рствꙋѧй, въ тебѣ̀ и҆ ѹ҆твержда́етсѧ, и҆ тобо́ю побѣжда́ѧй побѣжда́етъ всѧ́кое и҆скуше́нїе, и҆ плѣнѧ́етъ ра́тники, и҆ прохо́дитъ послꙋша́нїе.

Припѣ́въ: Прпⷣбне ѻ҆́тче а҆ндре́е, молѝ бг҃а ѡ҆ на́съ.

А҆ндрею: А҆ндре́е чтⷭ҇ны́й и҆ ѻ҆́ч҃е требл҃же́ннѣйшїй, па́стырю Кри́тскїй, не преста́й молѧ́сѧ ѡ҆ воспѣва́ющихъ тѧ̀: да и҆зба́вимсѧ всѝ гнѣ́ва и҆ ско́рби и҆ тлѣ́нїѧ и҆ прегрѣше́нїй безмѣ́рных̾, чтꙋщихъ твою̀ па́мѧть вѣ́рнѡ.

І҆рмо́съ: Безсѣ́меннаго зача́тїѧ ржⷭ҇тво̀ несказа́нное, мт҃ре безмꙋ́жныѧ нетлѣ́ненъ пло́дъ: Бж҃їе бо рожде́нїе ѡ҆бновлѧ́етъ є҆стества̀: тѣ́мже тѧ̀ всѝ ро́ди, ꙗ҆́кѡ бг҃оневѣ́стнꙋю Мт҃рь, правосла́вно велича́емъ.