Во понеде́льник пе́рвой седми́цы

І҆рмо́съ: Помо́щник и҆ покро́витель бы́сть мнѣ̀ во спасе́нїе, се́й мой бг҃ъ, и҆ прославлю є҆гѡ: бг҃ъ ѻ҆ц҃а моегѡ̀, и҆ вознесꙋ̀ є҆гѡ̀: сла́внѡ бо просла́висѧ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Ѿкꙋ́дꙋ начнꙋ̀ пла́кати ѻ҆каѧ́ннагѡ моегѡ̀ житїѧ̀ дѣѧ́нїй; кое́ ли положꙋ нача́ло, хрⷭ҇те, ны́нѣшнемꙋ рыда́нїю; но ꙗ҆́кѡ бл҃гоꙋтро́бенъ, да́ждь мѝ прегрѣше́нїй ѡ҆ставле́нїе.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Грѧдѝ ѻ҆каѧ́ннаѧ дꙋше, съ пло́тїю твое́ю, зижди́телю всѣ́хъ и҆сповѣ́ждсѧ, и҆ ѡ҆ста́нисѧ про́чее пре́жднѧгѡ безслове́сїѧ, и҆ принесѝ бг҃ꙋ въ покаѧ́нїи сле́зы.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Первозда́ннаго а҆да́ма престꙋпле́нїю поревнова́въ, позна́хъ себѐ ѡ҆бнаже́на ѿ бг҃а, и҆ присносꙋ́щнагѡ црⷭ҇твїѧ и҆ сла́дости, грѣ̀хъ ра́ди мои́хъ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Ѹ҆вы̀ мнѣ̀ ѻ҆каѧ́ннаѧ дꙋшѐ, что̀ ѹ҆подо́биласѧ є҆сѝ пе́рвѣе є҆́ѵѣ; ви́дѣла бо є҆сѝ ѕлѣ̀, и҆ ѹ҆ѧзви́ласѧ є҆сѝ го́рцѣ, и҆ коснꙋласѧ є҆сѝ дре́ва, и҆ вкꙋси́ла є҆сѝ де́рзостнѡ безслове́сныѧ снѣ́ди.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Вмѣ́стѡ є҆́ѵы чꙋвственныѧ, мы́сленнаѧ мѝ бы́сть є҆́ѵа, во пло́ти страстны́й по́мыслъ, показꙋ́ѧй сла҆дкаѧ, и҆ вкꙋша́ѧй при́снѡ го́рькагѡ напое́нїѧ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Досто́йнѡ и҆з̾ є҆де́ма и҆згна́нъ бы́сть, ꙗ҆́кѡ не сохрани́въ є҆ди́нꙋ твою̀, сп҃се, за́повѣдь а҆да́мъ: а҆́зъ же что̀ постраждꙋ̀, ѿмета́ѧ всегда̀ живо́тнаѧ твоѧ̀ словеса̀;

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ.

Трⷪ҇ченъ: Пресꙋ́щнаѧ трⷪ҇це, во є҆ди́ницѣ покланѧ́емаѧ, возмѝ бре́мѧ ѿ менѐ тѧ́жкое грѣхо́вное, и҆ ꙗ҆́кѡ благоꙋтро́бна, да́ждь мѝ сле́зы ᲂу҆миле́нїѧ.

И҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Бг҃оро́диченъ: Бцⷣе, наде́жде и҆ предста́тельство тебѐ пою́щихъ, возмѝ бре́мѧ ѿ мене тѧ́жкое грѣхо́вное, и҆ ꙗ҆́кѡ влⷣчца чⷭ҇таѧ, ка́ющасѧ прїими́ мѧ.

І҆рмо́съ: Вонмѝ нб҃о, и҆ возглаго́лю, и҆ воспою̀ Хрⷭ҇та ѿ Дв҃ы плотїю прише́дшаго.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Вонмѝ нб҃о, и҆ возглаго́лю: землѐ внꙋша́й гла́съ, ка́ющїйсѧ къ Бг҃ꙋ и҆ воспѣва́ющїй є҆гѡ̀.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Вонми́ ми, Бж҃е, Сп҃се мо́й млⷭ҇тивнымъ твои́мъ ѻ҆́комъ, и҆ прїимѝ моѐ те́плое и҆сповѣ́данїе.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Согрѣши́хъ па́че всѣ́хъ человѣ́къ, є҆ди́нъ согрѣши́хъ тебѣ̀: но ᲂу҆ще́дри ꙗ҆́кѡ Бг҃ъ, Сп҃се, творе́нїе твоѐ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Вообрази́въ мои́хъ страсте́й без̾ѻбра́зїе, любостра́стными стремле́нми погꙋби́хъ ᲂу҆ма̀ красотꙋ̀.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Бу́рѧ мѧ̀ ѕлы́хъ ѡ҆бдержи́тъ, бл҃гоутро́бне Гдⷭ҇и: но ꙗ҆́кѡ Петру̀, и҆ мнѣ̀ рꙋку прострѝ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Ѡ҆скверни́хъ пло́ти моеѧ̀ ри́зу и҆ ѡ҆клаѧ́хъ є҆́же по ѻ҆́бразу, Сп҃се, и҆ по подо́бїю.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Ѡ҆мрачи́хъ душе́внꙋю красоту̀ стра́стей сластьмѝ, и҆ всѧ́чески ве́сь ᲂу҆́мъ пе́рсть сотвори́хъ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Раздра́хъ ны́нѣ ѻ҆де́жду мою̀ пе́рвую, ю҆́же мѝ и҆зтка̀ Зижди́тель и҆з̾ нача́ла, и҆ ѿту́дꙋ лежу̀ на́гъ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Ѡ҆блеко́хсѧ въ раздра́нную ри́зу, ю҆́же и҆зтка́ ми ѕмїй совѣ́томъ, и҆ стыжду́сѧ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Сле́зы блудни́цы, ще́дре, и҆ а҆́зъ предлага́ю: ѡ҆чи́ти мѧ̀, Сп҃се, бл҃гоутро́бїемъ твои́мъ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Воззрѣ́хъ на садо́вную красоту̀ и҆ прельсти́хсѧ ᲂу҆мо́мъ, и҆ ѿту́дꙋ лежу̀ на́гъ, и҆ срамлѧ́юсѧ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Дѣ́лаша на хребтѣ̀ мое́мъ всѝ нача́льницы страсте́й, продолжа́юще на мѧ̀ беззаконїе и҆́хъ.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ.

Трⷪ҇ченъ: Е҆ди́наго тѧ̀ въ трїе́хъ ли́цѣхъ, Бг҃а всѣ́хъ пою̀, Ѻ҆́ц҃а̀ и҆ Сн҃а и҆ Дх҃а Ст҃а́го.

И҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Бг҃оро́диченъ: Пречⷭ҇таѧ Бцⷣе Дв҃о, є҆ди́на всепѣ́таѧ, молѝ прилѣ́жнѡ во є҆́же спасти́сѧ на́мъ.

На недви́жимомъ, Хрⷭ҇те, ка́мени за́повѣдей твои́хъ ᲂу҆твердѝ моѐ помышле́нїе.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Ѻ҆́гнь ѿ Гд҃а и҆ногда̀ Гдⷭ҇ь ѡ҆дожди́въ, зе́млю Содо́мскую пре́жде попалѝ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

На горѣ̀ спаса́йсѧ, душѐ, ꙗ҆́коже Ло́тъ ѻ҆́ный, и҆ въ Сиго́ръ ѹ҆гонза́й.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Бѣ́гай запале́нїѧ, ѽ душѐ, бѣ́гай Содо́мскагѡ горѣ́нїѧ, бѣ́гай тлѣ́нїѧ бж҃е́твеннагѡ пла́мени.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Согрѣши́хъ тебѣ́ є҆ди́нъ а҆́зъ, согрѣши́хъ па́че всѣ́хъ, Хрⷭ҇те Сп҃се, да не пре́зриши менѐ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Ты̀ є҆сѝ па́стырь до́брый, взыщѝ менѐ а҆́гнца, и҆ заблу́ждшаго да не пре́зриши мене.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Ты̀ є҆сѝ сла́дкїй, І҆и҃се, ты̀ є҆сѝ Созда́телю мо́й: въ тебѣ̀, Сп҃се, ѡ҆правда́юсѧ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

И҆сповѣ́даюсѧ тебѣ̀, Сп҃се: согрѣши́хъ тѝ, но ѡ҆сла́би, ѡ҆ста́ви мѝ, ꙗ҆́кѡ бл҃гоутро́бенъ.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ.

Ѽ Трⷪ҇це є҆ди́нице Бж҃е, спасѝ на́съ ѿ пре́лести, и҆ и҆скуше́нїй, и҆ ѡ҆бстоѧ́нїй.

И҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Ра́дуйсѧ, бг҃опрїѧ́тна́ ѹ҆тро́бо: ра́дуйсѧ прⷭ҇то́ле Гдⷭ҇нь: ра́дуйсѧ, мт҃и жи́зни на́шеѧ.

І҆рмо́съ: Ѹ҆слы́ша Прⷪ҇ро́къ прише́ствїе твое́, Гдⷭ҇и, и҆ ѹ҆боѧ́сѧ, ꙗ҆́кѡ хо́щеши ѿ Дв҃ы роди́тисѧ и҆ чл҃кѡмъ ꙗ҆ви́тисѧ, и҆ гл҃аше: ѹ҆слы́шахъ слу́хъ тво́й и҆ ѹ҆боѧ́хсѧ, сла́ва си́лѣ твое́й Гдⷭ҇и.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Дѣ́лъ твои́хъ да не пре́зриши, созда́нїѧ твоего̀ да не ѡ҆ста́виши, Правосу́де: а҆́ще и҆ є҆ди́нъ согрѣши́хъ ꙗ҆́кѡ чл҃вѣ́къ па́че всѧ́кагѡ человѣ́ка, человѣ́колю́бче, но и҆́маши, ꙗ҆́кѡ Гдⷭ҇ь всѣ́хъ, вла́сть ѡ҆ставлѧ́ти грѣхѝ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Прибли́жаетсѧ, душѐ, коне́цъ, приближа́етсѧ и҆ неради́ши, не гото́вишисѧ, вре́мѧ сокраща́етсѧ, воста́ни, бли́зъ при две́рехъ Судїѧ є҆́сть: ꙗ҆́кѡ со́нїе, ꙗ҆́кѡ цвѣ́тъ, вре́мѧ житїѧ̀ тече́тъ: что̀ всу́е мѧте́мсѧ;

Припѣ́въ: Поми́лꙋй мѧ̀, бж҃е, поми́лꙋй мѧ̀.

Воспрѧ́нѝ, ѽ ду́шѐ моѧ̀, дѣ́ѧнїѧ твоѧ̀ ꙗ҆́же содѣ́лала є҆сѝ, помышлѧ́й, и҆ сїѧ҆ предъ лицѐ твоѐ принесѝ, и҆ ка́пли и҆спꙋстѝ сле́зъ твои́хъ: рцы со дерзнове́нїемъ дѣѧ҆нїѧ и҆ помышле́нїѧ Хрⷭ҇ту̀, и҆ ѡ҆правда́йсѧ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Не бы́сть въ житїѝ грѣха̀, ни дѣѧ́нїѧ, ни зло́бы, є҆ѧ же а҆́зъ Сп҃се не согрѣши́хъ, ᲂу҆мо́мъ и҆ сло́вомъ и҆ произволе́нїемъ, и҆ предложе́нїемъ и҆ мы́слїю и҆ дѣѧ́нїемъ согрѣши́въ, ꙗ҆́кѡ и҆́нъ никто́же когда̀.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Ѿсю́ду и҆ ѡ҆сужде́нъ бы́хъ, ѿсю́дꙋ и҆ препрѣ́нъ бы́хъ а҆́зъ ѻ҆каѧ́нный ѿ своеѧ̀ со́вѣсти, є҆ѧ́же ничто́же въ мі́рѣ нужнѣ́йше: Сꙋдїѐ и҆зба́вителю мо́й, и҆ вѣ́дче, пощадѝ и҆ и҆зба́ви, и҆ спаси́ мѧ̀ раба̀ твоего̀.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Лѣ́ствица, ю҆́же ви́дѣ дре́вле вели́кїй въ Патрїа́рсѣхъ, ѹ҆ка́занїе є҆́сть дꙋше моѧ̀, дѣ́ѧтельнагѡ восхожде́нїѧ, разꙋмнагѡ возше́ствїѧ: а҆́ще хо́щеши ѹ҆бѡ дѣѧ́нїемъ и҆ ра́зꙋмомъ, и҆ зрѣ́нїем̾ пожи́ти, ѡ҆бнови́сѧ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Зно́й дневны́й претерпѣ́ лише́нїѧ ра́ди Патрїа́рхъ, и҆ мра́зъ нощны́й понесѐ, на всѧ́къ де́нь снабдѣ́нїѧ творѧ̀, пасы́й, тружда́ѧйсѧ, рабо́таѧй, да двѣ́ женѣ̀ сочета́етъ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Жены́ ми двѣ̀ разꙋмѣ́й, дѣѧ́нїе же и҆ ра́зумъ въ зрѣ́нїи: Лі́ю ᲂу҆́бѡ дѣѧ́нїе, ꙗ҆́кѡ многоча́днꙋю, Рахи́ль же ра́зꙋмъ, ꙗ҆́кѡ многотрꙋдную: и҆́бо кромѣ̀ трꙋдѡ́въ ни дѣѧ́нїе ни зрѣ́нїе, дꙋшѐ, и҆спра́витсѧ.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ.

Трⷪ҇ченъ: Нераздѣ́льное сꙋщество́мъ, несли́тное ли́цы бг҃осло́влю тѧ̀, трⷪ҇ческое є҆ди́но Бж҃ество̀, ꙗ҆́кѡ є҆диноцрⷭ҇твенное и҆ сопресто́льное: вопїю́ ти пѣ́снь вели́кꙋю, въ вы́шнихъ трегу́бо пѣ́сносло́вимꙋю.

И҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Бг҃оро́диченъ: И҆ ражда́еши, и҆ дѣ́вствꙋеши, и҆ пребыва́еши ѻ҆бою́дꙋ є҆стество́мъ Дв҃а: рожде́йсѧ ѡ҆бновлѧ́етъ зако́ны є҆стества̀, ѹ҆тро́ба же ражда́етъ неражда́ющаѧ: Бг҃ъ и҆дѣ́же хо́щетъ, побѣжда́етсѧ є҆стества̀ чи́нъ: твори́тъ бо є҆ли̑ка хо́щетъ.

І҆рмо́съ: Ѿ нощѝ ᲂу҆́тренююща, чл҃вѣколю́бче, просвѣтѝ молю́сѧ, и҆ наста́ви и҆ менѐ на повелѣ̑нїѧ твоѧ̑: и҆ наꙋчи́ мѧ сп҃се, твори́ти во́лю твою̀.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Въ нощѝ житїѐ моѐ преидо́хъ при́снѡ, тма́ бо бы́сть и҆ глꙋбока̀ мнѣ̀ мгла̀ но́щь грѣха̀: но ꙗ҆́кѡ днѐ сы́на, Сп҃се покажи́ мѧ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Руві́ма подража́ѧ ѻ҆каѧ́нный а҆́зъ, содѣ́ѧхъ беззако́нный и҆ законопрестꙋ́пный совѣ́тъ на Бг҃а вы́шнѧгѡ, ѡ҆скверни́въ ло́же моѐ, ꙗ҆́кѡ ѻ҆́ч҃ее ѻ҆́нъ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

И҆сповѣ́даюсѧ тебѣ̀ Хрⷭ҇тѐ Цр҃ю̀: согрѣши́хъ, согрѣши́хъ, ꙗ҆́кѡ пре́жде І҆ѡ́сифа бра́тїѧ прода́вшїи, чистоты̀ пло́дъ и҆ цѣломꙋ́дрїѧ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Ѿ сро́дникѡвъ пра́веднаѧ дꙋша̀ свѧза́сѧ, прода́сѧ въ рабо́тꙋ сла́дкїй, во ѡ҆́бразъ Гдⷭ҇нь: ты́ же всѧ̀ дꙋшѐ, продала́сѧ є҆сѝ ѕлы́ми твои́ми.

Припѣ́въ: Поми́лꙋй мѧ̀, бж҃е, поми́лꙋй мѧ̀.

І҆ѡ́сифа пра́веднагѡ и҆ цѣломꙋ́дреннаго ᲂу҆ма̀ подража́й ѻ҆каѧ́ннаѧ, и҆ неискꙋснаѧ дꙋшѐ, и҆ не ѡ҆сквернѧ́йсѧ безслове́сными стремле́нми при́снѡ беззако́ннꙋющи.

Припѣ́въ: Поми́лꙋй мѧ̀, бж҃е, поми́лꙋй мѧ̀.

А҆́ще и҆ въ ро́вѣ поживѐ и҆ногда̀ І҆ѡ́сифъ, Влкⷣо Гдⷭ҇и, но во ѡ҆́бразъ погребе́нїѧ и҆ воста́нїѧ твоегѡ̀: а҆́зъ же что̀ тебѣ̀ когда̀ сицево́е принесꙋ;

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ.

Трⷪ҇ченъ: Тѧ̀ Трⷪ҇це сла́вимъ, є҆ди́наго Бг҃а: ст҃ъ, ст҃ъ, ст҃ъ є҆сѝ Ѻ҆ч҃е, Сн҃е и҆ Дш҃е, про́стое существо̀, є҆ди́нице при́снѡ покланѧ́емаѧ.

И҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Бг҃оро́диченъ: И҆з̾ тебѐ ѡ҆блече́сѧ въ моѐ смѣше́нїе, нетлѣ́ннаѧ, безмꙋжнаѧ мт҃и дв҃о, Бг҃ъ созда́вый вѣ́ки, и҆ соединѝ себѣ̀ человѣ́ческое є҆стество̀.

Возопи́хъ всѣ́мъ се́рдцемъ мои́мъ къ ще́дрому Бг҃ꙋ, и҆ ѹ҆слы́ша мѧ̀ ѿ а҆́да преиспо́днѧго, и҆ возведѐ ѿ тлѝ живо́тъ мо́й.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Сле́зы Сп҃се ѻ҆́чїю мое́ю, и҆ и҆з̾ глꙋбины̀ воздыха́нїѧ чи́стѣ приношꙋ̀, вопїю́щу се́рдцу: Бж҃е, согрѣши́хъ тѝ ѡ҆чи́сти мѧ̀.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Ѹ҆клони́ласѧ є҆сѝ дꙋшѐ, ѿ Гдⷭ҇а твоего̀, ꙗ҆́коже Даѳа́нъ и҆ А҆вїрѡ́нъ: но пощадѝ, воззовѝ и҆з̾ а҆́да преиспо́днѧго, да не про́пасть земна́ѧ тебѐ покры́етъ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Ꙗ҆́кѡ ю҆́ница дꙋшѐ разсвирѣ́пѣвшаѧ, ѹ҆подо́биласѧ є҆сѝ Е҆фре́мꙋ, ꙗ҆́кѡ се́рна ѿ тене́тъ сохранѝ житїѐ, впери́вши дѣѧ́нїемъ ᲂу҆́мъ и҆ зрѣ́нїемъ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Рука̀ на́съ Мои҆се́ова да ѹ҆вѣ́ритъ дꙋшѐ, ка́кѡ мо́жетъ Бг҃ъ прокаже́нное житїѐ ѹ҆бѣли́ти и҆ ѡ҆чи́стити: и҆ не ѿча́йсѧ сама̀ себѐ, а҆́ще и҆ прокаже́нна є҆сѝ.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ.

Трⷪ҇ченъ: Трⷪ҇ца є҆́смь проста̀, нераздѣ́льна, раздѣ́льна ли́чнѣ, и҆ є҆ди́ница є҆́смь є҆стество́мъ соедине́на, ѻ҆́ц҃ъ глаго́летъ, и҆ Сн҃ъ, и҆ бж҃е́ственный Дх҃ъ.

И҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Бг҃оро́диченъ: Ѹ҆тро́ба твоѧ̀ Бг҃а на́мъ родѝ, воображе́на по на́мъ: є҆го́же ꙗ҆́кѡ Созда́телѧ всѣ́хъ, молѝ, Бцⷣе, да моли́твами твои́ми ѡ҆правди́мсѧ.

Конда́къ, гла́съ ѕ҃: Душѐ моѧ̀, душѐ моѧ̀, воста́ни, что спи́ши; коне́цъ приближа́етсѧ, и҆ и҆́маши смꙋти́тисѧ: воспрѧнѝ ᲂу҆́бѡ, да пощади́тъ тѧ̀ Хрⷭ҇то́съ Бг҃ъ, вездѣ̀ сы́й, и҆ всѧ҆ и҆сполнѧ́ѧй.

І҆рмо́съ: Согрѣши́хомъ, беззако́нновахомъ, непра́вдовахом̾ предъ тобо́ю, нижѐ соблюдо́хомъ, нижѐ сотвори́хомъ, ꙗ҆́коже заповѣ́далъ є҆сѝ на́мъ: но не преда́ждь на́съ до конца̀, ѻ҆ц҃е́въ Бж҃е.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Согрѣши́хъ, беззако́нновахъ, и҆ ѿверго́хъ за́повѣдь твою̀, ꙗ҆́кѡ во грѣсѣ́хъ произведо́хсѧ, и҆ приложи́хъ ꙗ҆́звамъ стрꙋпы себѣ̀: но са́мъ мѧ̀ поми́лꙋй, ꙗ҆́кѡ благоꙋтро́бенъ, ѻ҆ц҃е́въ Бж҃е.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Та҆йнаѧ се́рдца моего̀ и҆сповѣ́дахъ тебѣ̀, Судїѝ моемꙋ̀: ви́ждь моѐ смире́нїе, ви́ждь и҆ ско́рбь мою̀, и҆ вонмѝ сꙋду̀ моемꙋ̀ ны́нѣ, и҆ са́мъ мѧ̀ поми́луй, ꙗ҆́кѡ бл҃гоꙋтро́бенъ, ѻ҆ц҃е́въ Бж҃е.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Сау́лъ и҆ногда̀ ꙗ҆́кѡ погꙋбѝ ѻ҆ц҃а̀ своегѡ̀, дꙋшѐ ѻ҆слѧ́та, внеза́пꙋ ца́рство ѡ҆брѣ́те къ прослꙋтїю: но блюдѝ, не забыва́й себѐ, ско́тскїѧ по́хоти твоѧ̀ произво́ливши па́че Ца́рства Хрⷭ҇о́ва.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Дави́дъ и҆ногда̀ бг҃оѻц҃ъ, а҆́ще и҆ согрѣшѝ сꙋгу́бо, дꙋшѐ моѧ̀, стрѣло́ю ѹ҆бѡ ѹ҆стрѣле́нъ бы́въ прелюбодѣ́йства, копїе́мъ же плѣне́нъ: бы́въ ѹ҆бі́йства томле́нїемъ: но ты̀ сама̀ тѧжча́йшими дѣ́лы неду́гꙋеши, самохо́тными стремле́нми.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Совокꙋпѝ ᲂу҆́бѡ и҆ногда̀ Двд҃ъ беззако́нїю беззако́нїе: ѹ҆бі́йствꙋ же любодѣ́йство раствори́въ, покаѧ́нїе сꙋгꙋбое показа̀ а҆́бїе: но: сама̀ ты лꙋка́внѣйшаѧ, дꙋшѐ содѣ́лала є҆сѝ, не пока́ѧвшисѧ Бг҃ꙋ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Давд҃ъ и҆ногда̀ вообразѝ, списа́въ ꙗ҆́кѡ на і҆ко́нѣ пѣ́снь, є҆́юже дѣѧ́нїе ѡ҆блича́етъ, є҆́же содѣ́ѧ, зовы́й: поми́лꙋй мѧ̀. тебѣ̀ бо є҆ди́номꙋ согрѣши́хъ всѣ́хъ Бг҃ꙋ, са́мъ ѡ҆чи́сти мѧ̀.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ.

Трⷪ҇ченъ: Трⷪ҇це про́стаѧ, нераздѣ́льнаѧ, є҆диносꙋщнаѧ, и҆ є҆стество̀ є҆ди́но, свѣ́тове и҆ свѣ́т̾, и҆ ст҃а трѝ, и҆ є҆ди́но ст҃о, пое́тсѧ Бг҃ъ Трⷪ҇ца: но воспо́й, просла́ви, живо́тъ и҆ животы̀, дꙋшѐ, всѣ́хъ Бг҃а.

И҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Бг҃оро́диченъ: Пое́мъ тѧ̀, блгⷭ҇ослови́мъ тѧ̀, покланѧ́емсѧ тѝ, Бг҃ороди́тельнице, ꙗ҆́кѡ неразлꙋчныѧ Трⷪ҇цы породила̀ є҆сѝ є҆ди́наго Хрⷭ҇та Бг҃а, и҆ сама̀ ѿве́рзла є҆сѝ на́мъ сꙋщымъ на землѝ нбⷭ҇наѧ.

І҆рмо́съ: Е҆го́же вѡ́инства нбⷭ҇наѧ сла́вѧтъ, и҆ трепе́щꙋтъ Херуві́ми и҆ Серафі́ми, всѧ́ко дыха́нїе и҆ тва́рь, по́ите, бл҃гослови́те, и҆ превозноси́те во всѧ̀ вѣ́ки.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Согрѣши́вша Сп҃се поми́лꙋй, воздви́гни мо́й ᲂу҆́мъ ко ѡ҆браще́нїю, прїими́ мѧ̀ ка́ющагосѧ, ᲂу҆ще́дри вопїю́ща: согрѣши́х̾ ти́, спасѝ, беззако́нновахъ, поми́лꙋй мѧ̀.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Колесни́чникъ И҆лїа̀, колесни́цею добродѣ́телей вше́дъ, ꙗ҆́кѡ на нб҃са̀, ноша́шесѧ превы́ше и҆ногда̀ ѿ земны́хъ: сего̀ ᲂу҆́бѡ, дꙋшѐ моѧ̀, восхо́дъ помышлѧ́й.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Е҆лїссе́й и҆ногда̀ прїе́мъ ми́лоть И҆лїинꙋ̀, прїѧ́тъ сꙋгꙋбꙋю благода́ть ѿ Гдⷭ҇а: ты̀ же ѽ дꙋшѐ моѧ̀, сеѧ̀ не причасти́ласѧ є҆сѝ бл҃года́ти за невоздержа́нїе.

Припѣ́въ: Поми́лꙋй мѧ̀, бж҃е, поми́лꙋй мѧ̀.

І҆орда́нова стрꙋѧ̀ пе́рвѣе, ми́лотїю И҆лїино́ю, Е҆лїссе́емъ ста̀ сю́дꙋ и҆ сю́дꙋ: ты̀ же, ѽ дꙋшѐ моѧ̀, сеѧ̀ не причасти́ласѧ є҆сѝ благода́ти за невоздержа́нїе.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Сомані́тїда и҆ногда̀ пра́веднагѡ ѹ҆чредѝ, ѽ дꙋшѐ, нра́вомъ бл҃ги́мъ: ты̀ же не ввела̀ є҆сѝ въ до́мъ ни стра́нна, ни пꙋ́тника: тѣ́мже черто́га и҆зри́нешисѧ во́нъ, рыда́ющи.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Гїезі́евъ подража́ла є҆сѝ ѻ҆каѧ́ннаѧ ра́зꙋм̾ скве́рный всегда̀, дꙋшѐ: є҆го́же сребролю́бїе ѿложѝ понѐ на ста́рость. бѣ́гай гее́нскаго ѻ҆гнѧ̀, ѿстꙋпи́вши ѕлы́хъ твои́х̾.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ.

Трⷪ҇ченъ: Безнача́льне Ѻ҆́ч҃е, Сы́не собезнача́льне, ѹ҆́тѣ́шителю бл҃гі́й, Дꙋше пра́вый, Сло́ва Бж҃їѧ Роди́телю, Ѻ҆ц҃а безнача́льна Сло́ве, Дш҃е живы́й и҆ зи́ждай, Трⷪ҇це є҆ди́нице поми́луй мѧ̀.

И҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Бг҃оро́диченъ: Ꙗ҆́кѡ ѿ ѡ҆броще́нїѧ червлени́цы, пречи́стаѧ, ᲂу҆́мнаѧ багрѧни́це Е҆мманꙋ́илева, внꙋ́трь во чре́вѣ твое́мъ пло́ть и҆стка́сѧ: тѣ́мже Бцⷣꙋ вои́стиннꙋ тѧ̀ почита́емъ.

І҆рмо́съ: Безсѣ́меннаго зача́тїѧ ржⷭ҇тво̀ несказа́нное, мт҃ре безмꙋ́жныѧ нетлѣ́ненъ пло́дъ: Бж҃їе бо рожде́нїе ѡ҆бновлѧ́етъ є҆стества̀: тѣ́мже тѧ̀ всѝ ро́ди, ꙗ҆́кѡ бг҃оневѣ́стнꙋю Мт҃рь, правосла́вно велича́емъ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Оу҆́мъ ѡ҆стрꙋпи́сѧ, тѣ́ло ѡ҆болѣ́знисѧ, недꙋгꙋетъ дх҃ъ, сло́во и҆знемо́же, житїѐ ᲂу҆мертви́сѧ, коне́цъ при две́рехъ: тѣ́мже моѧ̀ ѡ҆каѧ́ннаѧ дꙋшѐ, что сотвори́ши, є҆гда̀ прїи́детъ Сꙋдїѧ̀ и҆спыта́ти твоѧ̀;

Припѣ́въ: Поми́лꙋй мѧ̀, бж҃е, поми́лꙋй мѧ̀.

Моѷсе́ово приведо́хъ тѝ, дꙋшѐ, мїробы́тїе и҆ ѿ того̀ всѐ завѣ́тное писа́нїе, повѣ́дающее тебѣ̀ пра́ведныѧ и҆ непра́ведныѧ: ѿ ни́хже вторы́ѧ, ѽ дꙋшѐ, подража́ла є҆сѝ, а҆ не пе́рвыѧ, въ Бг҃а согрѣши́вши.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Зако́нъ и҆знемо́же, пра́зднуетъ Є҆ѵⷢ҇лїе, писа́нїе же всѐ въ тебѣ̀ небреже́но бы́сть, проро́цы и҆знемого́ша и҆ всѐ пра́ведное сло́во: стрꙋ́пи твоѝ, ѽ душѐ, ѹ҆мно́жишасѧ, не сꙋщꙋ врачꙋ и҆сцѣ́лѧющемꙋ тѧ̀.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Но́ваго привождꙋ́ тѝ писа́нїѧ ѹ҆каза́нїѧ, вводѧ́щаѧ тѧ̀ дꙋше ко ѹ҆миле́нїю: пра́веднымъ ᲂу҆́бѡ поревну́й, грѣ́шныхъ же ѿвраща́йсѧ, и҆ ᲂу҆ми́лостиви Хрⷭ҇та̀ моли́твами и҆ поще́нми, и҆ чтⷭ҇отою, и҆ говѣ́нїемъ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Хрⷭ҇то́съ вочеловѣ́чисѧ, призва́въ къ покаѧ́нїю разбо́йники и҆ блу́дни̑цы: дꙋшѐ пока́йсѧ, две́рь ѿве́рзесѧ црⷭ҇твїѧ ᲂу҆жѐ, и҆ предвосхища́ютъ є҆̀ фарїсе́е и҆ мытарѝ и҆ прелюбодѣ́и ка́ющїисѧ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Хрⷭ҇то́съ вочеловѣ́чисѧ пло́ти приѡбщи́всѧ мѝ, и҆ всѧ̑ є҆ли̑ка сꙋть є҆стества̀ хотѣ́нїемъ и҆спо́лни грѣха̀ кромѣ̀, подо́бїе тебѣ̀, ѽ дꙋшѐ, и҆ ѡ҆́бразъ предпоказу́ѧ своего̀ снизхо́жденїѧ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Хрⷭ҇то́съ волхвы̀ спасѐ, па́стыри созва̀, младе́нецъ мно́жєства показа̀ мꙋченики, ста́рцы просла́ви, и҆ ста́рыѧ вдови́цы, и҆хже не поревнова́ла є҆сѝ дꙋшѐ, ни дѣѧ́нїемъ ни житїю̀: но го́ре тебѣ̀, внегда̀ бꙋ́деши сꙋди́тисѧ.

Припѣ́въ: Поми́лꙋй мѧ̀, бж҃е, поми́лꙋй мѧ̀.

Пости́всѧ Гдⷭ҇ь дні́й четы́редесѧть въ пꙋсты́ни, послѣдѝ взалка̀ показꙋѧ человѣ́ческое: дꙋшѐ, да не разлѣни́шисѧ, а҆́ще тебѣ̀ приложи́тсѧ вра́гъ, моли́твою же и҆ посто́мъ ѿ но́гъ твои́хъ да ѿрази́тсѧ.

Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ.

Трⷪ҇ченъ: Ѻ҆ц҃а̀ просла́вимъ, Сы́на превознесе́мъ, бж҃ественномꙋ Дх҃ꙋ вѣ́рнѡ поклони́мсѧ, Трⷪ҇цѣ нераздѣ́льнѣй, є҆ди́ницѣ по сꙋществу̀, ꙗ҆́кѡ свѣ́тꙋ и҆ свѣ́томъ, и҆ животꙋ̀ и҆ живото́мъ, животворѧ́щемꙋ и҆ просвѣща́ющемꙋ концы̀.

И҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Бг҃оро́диченъ: Гра́дъ тво́й сохранѧ́й, Бг҃ороди́тельнице пречⷭ҇таѧ: въ тебѣ̀ бо се́й вѣ́рнѡ ца́рствꙋѧй, въ тебѣ̀ и҆ ѹ҆твержда́етсѧ, и҆ тобо́ю побѣжда́ѧй побѣжда́етъ всѧ́кое и҆скуше́нїе, и҆ плѣнѧ́етъ ра́тники, и҆ прохо́дитъ послꙋша́нїе.

Припѣ́въ: Прпⷣбне ѻ҆́тче а҆ндре́е, молѝ бг҃а ѡ҆ на́съ.

А҆ндрею: А҆ндре́е чтⷭ҇ны́й и҆ ѻ҆́ч҃е требл҃же́ннѣйшїй, па́стырю Кри́тскїй, не преста́й молѧ́сѧ ѡ҆ воспѣва́ющихъ тѧ̀: да и҆зба́вимсѧ всѝ гнѣ́ва и҆ ско́рби и҆ тлѣ́нїѧ и҆ прегрѣше́нїй безмѣ́рных̾, чтꙋщихъ твою̀ па́мѧть вѣ́рнѡ.

І҆рмо́съ: Безсѣ́меннаго зача́тїѧ ржⷭ҇тво̀ несказа́нное, мт҃ре безмꙋ́жныѧ нетлѣ́ненъ пло́дъ: Бж҃їе бо рожде́нїе ѡ҆бновлѧ́етъ є҆стества̀: тѣ́мже тѧ̀ всѝ ро́ди, ꙗ҆́кѡ бг҃оневѣ́стнꙋю Мт҃рь, правосла́вно велича́емъ.