Бж҃е́ственнаѧ слꙋ́жба во ст҃ы́хь ѻ҆тца̀ на́шегѡ і҆ѡа́нна златоꙋ́стагѡ
Лїтꙋргі́а ѡ҆глаше́нныхъ
Нача́ло
Дїа́конъ: Бл҃гословѝ, влⷣко.
І҆ере́й: Бл҃гослове́но црⷭ҇тво, ѻ҆ц҃а̀, и҆ сн҃а, и҆ ст҃а́гѡ дх҃а, ны́нѣ и҆ при́снѡ, и҆ во вѣ́ки вѣкѡ́въ.
Ли́къ: А҆ми́нь.
Е҆ктенїа̀ вели́каѧ
Дїа́конъ: Ми́ромъ гдⷭ҇ꙋ помо́лимсѧ.
Ли́къ: Гдⷭ҇и поми́лꙋй.
Дїа́конъ: Ѡ҆ свы́шнѣмъ ми́рѣ, и҆ спасе́нїи дꙋ́шъ на́шихъ, гдⷭ҇ꙋ помо́лимсѧ.
Ли́къ: Гдⷭ҇и поми́лꙋй.
Дїа́конъ: Ѡ҆ ми́рѣ всегѡ̀ мі́ра, бл҃гостоѧ́нїи ст҃ы́хъ бж҃їихъ цр҃кве́й, и҆ соедине́нїи всѣ́хъ, гдⷭ҇ꙋ помо́лимсѧ.
Ли́къ: Гдⷭ҇и поми́лꙋй.
Дїа́конъ: Ѡ҆ ст҃ѣ́мъ хра́мѣ се́мъ, и҆ съ вѣ́рою, бл҃гоговѣ́нїемъ и҆ стра́хомъ бж҃їимъ входѧ́щихъ во́нь, гдⷭ҇ꙋ помо́лимсѧ.
Ли́къ: Гдⷭ҇и поми́лꙋй.
Дїа́конъ: Ѡ҆ господи́нѣ и҆ ѻ҆ц҃ѣ̀ на́шемъ, бл҃же́ннѣйшемъ митрополі́тѣ са́ввѣ, и҆ ѡ҆ господи́нѣ на́шемъ преѡсвѧще́ннѣйшемъ є҆пⷭ҇кпѣ а҆ѳана́сїи, честнѣ́мъ пресвѵ́терствѣ, во хрⷭ҇тѣ̀ дїа́конствѣ, ѡ҆ все́мъ при́чтѣ и҆ лю́дехъ, гдⷭ҇ꙋ помо́лимсѧ.
Ли́къ: Гдⷭ҇и поми́лꙋй.
Дїа́конъ: Ѡ҆ богохрани́мѣй странѣ̀ на́шей, властѣ́хъ и҆ во́инствѣ є҆ѧ̀, гдⷭ҇ꙋ помо́лимсѧ.
Ли́къ: Гдⷭ҇и поми́лꙋй.
Дїа́конъ: Ѡ҆ гра́дѣ се́мъ [и҆лѝ ѡ҆ ве́си се́й, и҆лѝ ѡ҆ ст҃ѣ́й ѻ҆би́тели се́й], всѧ́комъ гра́дѣ, странѣ̀, и҆ вѣ́рою живꙋ́щихъ въ ни́хъ, гдⷭ҇ꙋ помо́лимсѧ.
Ли́къ: Гдⷭ҇и поми́лꙋй.
Дїа́конъ: Ѡ҆ бл҃горастворе́нїи воздꙋ́хѡвъ, ѡ҆ и҆з̾ѻби́лїи плодѡ́въ земны́хъ и҆ вре́менѣхъ ми́рныхъ, гдⷭ҇ꙋ помо́лимсѧ.
Ли́къ: Гдⷭ҇и поми́лꙋй.
Дїа́конъ: Ѡ҆ пла́вающихъ, пꙋтеше́ствꙋющихъ, недꙋ́гꙋющихъ, стра́ждꙋщихъ, плѣне́нныхъ, и҆ ѡ҆ спасе́нїи и҆́хъ, гдⷭ҇ꙋ помо́лимсѧ.
Ли́къ: Гдⷭ҇и поми́лꙋй.
Дїа́конъ: Ѡ҆ и҆зба́витисѧ на́мъ ѿ всѧ́кїѧ ско́рби, гнѣ́ва и҆ нꙋ́жды, гдⷭ҇ꙋ помо́лимсѧ.
Ли́къ: Гдⷭ҇и поми́лꙋй.
Дїа́конъ: Застꙋпѝ, спасѝ, поми́лꙋй и҆ сохранѝ на́съ, бж҃е, твое́ю бл҃года́тїю.
Ли́къ: Гдⷭ҇и поми́лꙋй.
Дїа́конъ: Прест҃ꙋ́ю, пречⷭ҇тꙋю, пребл҃гослове́ннꙋю, сла́внꙋю влⷣчцꙋ на́шꙋ бцⷣꙋ и҆ приснодв҃ꙋ мр҃і́ю со всѣ́ми ст҃ы́ми помѧнꙋ́вше, са́ми себѐ, и҆ дрꙋгъ дрꙋ́га, и҆ ве́сь живо́тъ на́шъ хрⷭ҇тꙋ̀ бг҃ꙋ предади́мъ.
Ли́къ: Тебѣ̀ гдⷭ҇и.
Моли́тва пе́рвагѡ а҆нтїфѡ́на
І҆ере́й: [глаго́летъ та́йнѡ]
Возглаше́нїе: Ꙗ҆́кѡ подоба́етъ тебѣ̀ всѧ́каѧ сла́ва, че́сть и҆ поклоне́нїе, ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, ны́нѣ и҆ при́снѡ, и҆ во вѣ́ки вѣкѡ́въ.
Ли́къ: А҆ми́нь.
Пе́рвый а҆нтїфѡ́нъ, ѱало́мъ р҃в
а҃ ли́къ: Бл҃гословѝ дꙋшѐ моѧ̀ гдⷭ҇а. / бл҃гослове́нъ є҆сѝ гдⷭ҇и. / бл҃гословѝ дꙋшѐ моѧ̀ гдⷭ҇а, / и҆ всѧ̑ внꙋ́трєннѧѧ моѧ̑ и҆́мѧ ст҃о́е є҆гѡ̀.
в҃ ли́къ: Бл҃гословѝ дꙋшѐ моѧ̀ гдⷭ҇а / и҆ не забыва́й всѣ́хъ воздаѧ́нїй є҆гѡ̀.
а҃ ли́къ: Ѡ҆чища́ющаго всѧ̑ беззакѡ́нїѧ твоѧ̑, / и҆сцѣлѧ́ющаг о всѧ̑ недꙋ́ги твоѧ̑:
в҃ ли́къ: И҆збавлѧ́ющаго ѿ и҆стлѣ́нїѧ живо́тъ тво́й, / вѣнча́ющаго тѧ̀ млⷭ҇тїю и҆ щедро́тами:
а҃ ли́къ: И҆сполнѧ́ющаго во бл҃ги́хъ жела́нїе твоѐ, / ѡ҆бнови́тсѧ ꙗ҆́кѡ ѻ҆́рлѧ ю҆́ность твоѧ̀.
в҃ ли́къ: Ще́дръ и҆ млⷭ҇тивъ гдⷭ҇ь, / долготерпѣли́въ и҆ многомлⷭ҇тивъ.
а҃ ли́къ: Бл҃гословѝ дꙋшѐ моѧ̀ гдⷭ҇а, / и҆ всѧ̑ внꙋ́трєннѧѧ моѧ̑ и҆́мѧ ст҃о́е є҆гѡ̀: / Бл҃гослове́нъ є҆сѝ гдⷭ҇и.
Е҆ктенїа̀ ма́лаѧ
Дїа́конъ: Па́ки и҆ па́ки ми́ромъ гдⷭ҇ꙋ помо́лимсѧ.
Ли́къ: Гдⷭ҇и поми́лꙋй.
Дїа́конъ: Застꙋпѝ, спасѝ, поми́лꙋй и҆ сохранѝ на́съ бж҃е, твое́ю бл҃года́тїю.
Ли́къ: Гдⷭ҇и поми́лꙋй.
Дїа́конъ: Прест҃ꙋ́ю, пречⷭ҇тꙋю, пребл҃гослове́ннꙋю, сла́внꙋю влⷣчцꙋ на́шꙋ бцⷣꙋ и҆ приснодв҃ꙋ мр҃і́ю со всѣ́ми ст҃ы́ми помѧнꙋ́вше, са́ми себѐ, и҆ дрꙋгъ дрꙋ́га, и҆ ве́сь живо́тъ на́шъ хрⷭ҇тꙋ̀ бг҃ꙋ предади́мъ.
Ли́къ: Тебѣ̀ гдⷭ҇и.
Моли́тва втора́гѡ а҆нтїфѡ́на
І҆ере́й: [глаго́летъ та́йнѡ]
Возглаше́нїе: Ꙗ҆́кѡ твоѧ̀ держа́ва, и҆ твоѐ є҆́сть црⷭ҇тво и҆ си́ла и҆ сла́ва, ѻ҆ц҃а̀, и҆ сн҃а, и҆ ст҃а́гѡ дх҃а, ны́нѣ и҆ при́снѡ, и҆ во вѣ́ки вѣкѡ́въ.
Ли́къ: А҆ми́нь.
Вторы́й а҆нтїфѡ́нъ, ѱало́мъ рм҃є
а҃ ли́къ: Хвалѝ дꙋшѐ моѧ̀ гдⷭ҇а, / восхвалю̀ гдⷭ҇а въ животѣ̀ мое́мъ, / пою̀ бг҃ꙋ моемꙋ̀, до́ндеже є҆́смь.
в҃ ли́къ: Не надѣ́йтесѧ на кнѧ́зи, на сы́ны человѣ́чєскїѧ, / въ ни́хже нѣ́сть сп҃се́нїѧ.
а҃ ли́къ: И҆зы́детъ дꙋ́хъ є҆гѡ̀, / и҆ возврати́тсѧ въ зе́млю свою̀, / въ то́й де́нь поги́бнꙋтъ всѧ̑ помышлє́нїѧ є҆гѡ̀.
в҃ ли́къ: Бл҃же́нъ, є҆мꙋ́же бг҃ъ і҆а́кѡвль помо́щникъ є҆гѡ̀, / ᲂу҆пова́нїе є҆гѡ̀ на гдⷭ҇а бг҃а своего̀:
а҃ ли́къ: Сотво́ршаго нб҃о и҆ зе́млю, / мо́ре, и҆ всѧ̑ ꙗ҆̀же въ ни́хъ:
в҃ ли́къ: Хранѧ́щаго и҆́стинꙋ въ вѣ́къ, / творѧ́щаго сꙋ́дъ ѡ҆би̑димымъ, / даю́щаго пи́щꙋ а҆́лчꙋщымъ.
а҃ ли́къ: Гдⷭ҇ь рѣши́тъ ѡ҆кова̑нныѧ, / гдⷭ҇ь ᲂу҆мꙋдрѧ́етъ слѣпцы̀.
в҃ ли́къ: Гдⷭ҇ь возво́дитъ низве́ржєнныѧ, / гдⷭ҇ь лю́битъ првⷣники.
а҃ ли́къ: Гдⷭ҇ь храни́тъ прише́льцы, / си́ра и҆ вдовꙋ̀ прїи́метъ, / и҆ пꙋ́ть грѣ́шныхъ погꙋби́тъ.
в҃ ли́къ: Воцр҃и́тсѧ гдⷭ҇ь во вѣ́къ, / бг҃ъ тво́й сїѡ́не, въ ро́дъ и҆ ро́дъ.
а҃ ли́къ: Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ.
в҃ ли́къ: И҆ ны́нѣ и҆ при́снѡ и҆ во вѣ́ки вѣкѡ́въ, а҆ми́нь.
Е҆диноро́дный сн҃е, гла́съ ѕ҃
Ли́къ: Е҆диноро́дный сн҃е и҆ сло́ве бж҃їй, безсме́ртенъ сы́й, / и҆ и҆зво́ливый сп҃се́нїѧ на́шегѡ ра́ди / воплоти́тисѧ ѿ ст҃ы́ѧ бцⷣы, и҆ приснодв҃ы мр҃і́и, / непрело́жнѡ вочл҃вѣ́чивыйсѧ: / распны́йсѧ же, хрⷭ҇тѐ бж҃е, сме́ртїю сме́рть попра́вый, / є҆ди́нъ сы́й ст҃ы́ѧ трⷪ҇цы, / спрославлѧ́емый ѻ҆ц҃ꙋ̀, и҆ ст҃о́мꙋ дх҃ꙋ, сп҃сѝ на́съ.
Е҆ктенїа̀ ма́лаѧ
Дїа́конъ: Па́ки и҆ па́ки ми́ромъ гдⷭ҇ꙋ помо́лимсѧ.
Ли́къ: Гдⷭ҇и поми́лꙋй.
Дїа́конъ: Застꙋпѝ, спасѝ, поми́лꙋй и҆ сохранѝ на́съ бж҃е, твое́ю бл҃года́тїю.
Ли́къ: Гдⷭ҇и поми́лꙋй.
Дїа́конъ: Прест҃ꙋ́ю, пречⷭ҇тꙋю, пребл҃гослове́ннꙋю, сла́внꙋю влⷣчцꙋ на́шꙋ бцⷣꙋ и҆ приснодв҃ꙋ мр҃і́ю со всѣ́ми ст҃ы́ми помѧнꙋ́вше, са́ми себѐ, и҆ дрꙋгъ дрꙋ́га, и҆ ве́сь живо́тъ на́шъ хрⷭ҇тꙋ̀ бг҃ꙋ предади́мъ.
Ли́къ: Тебѣ̀ гдⷭ҇и.
Моли́тва тре́тїѧгѡ а҆нтїфѡ́на
І҆ере́й: [глаго́летъ та́йнѡ]
Возглаше́нїе: Ꙗ҆́кѡ бл҃гъ и҆ человѣколю́бецъ бг҃ъ є҆сѝ, и҆ тебѣ̀ сла́вꙋ возсыла́емъ, ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, ны́нѣ и҆ при́снѡ, и҆ во вѣ́ки вѣкѡ́въ.
Ли́къ: А҆ми́нь.
Тре́тїй а҆нтїфѡ́нъ, бл҃жє́нны
а҃ ли́къ: Во црⷭ҇твїи твое́мъ помѧнѝ на́съ гдⷭ҇и, є҆гда̀ прїи́деши во црⷭ҇твїи твое́мъ.
а҃ ли́къ: Бл҃же́ни ни́щїи дх҃омъ, ꙗ҆́кѡ тѣ́хъ є҆́сть црⷭ҇тво нбⷭ҇ное.
в҃ ли́къ: Бл҃же́ни пла́чꙋщїи ꙗ҆́кѡ ті́и ᲂу҆тѣ́шатсѧ.
а҃ ли́къ: Бл҃же́ни кро́тцыи, ꙗ҆́кѡ ті́и наслѣ́дѧтъ зе́млю.
в҃ ли́къ: Бл҃же́ни а҆́лчꙋщїи и҆ жа́ждꙋщїи пра́вды, ꙗ҆́кѡ ті́и насы́тѧтсѧ.
а҃ ли́къ: Бл҃же́ни млⷭ҇тивїи, ꙗ҆́кѡ ті́и поми́ловани бꙋ́дꙋтъ.
в҃ ли́къ: Бл҃же́ни чи́стїи се́рдцемъ, ꙗ҆́кѡ ті́и бг҃а ᲂу҆́зрѧтъ.
а҃ ли́къ: Бл҃же́ни миротво́рцы, ꙗ҆́кѡ ті́и сы́нове бж҃їи нарекꙋ́тсѧ.
в҃ ли́къ: Бл҃же́ни и҆згна́ни пра́вды ра́ди, ꙗ҆́кѡ тѣ́хъ є҆́сть црⷭ҇тво нбⷭ҇ное.
а҃ ли́къ: Бл҃же́ни є҆стѐ, є҆гда̀ поно́сѧтъ ва́мъ, и҆ и҆зженꙋ́тъ, и҆ рекꙋ́тъ всѧ́къ ѕо́лъ глаго́лъ, на вы̀ лжꙋ́ще менє̀ ра́ди.
в҃ ли́къ: Ра́дꙋйтесѧ и҆ весели́тесѧ, ꙗ҆́кѡ мзда̀ ва́ша мно́га на нб҃сѣ́хъ.
а҃ ли́къ: Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ.
в҃ ли́къ: И҆ ны́нѣ и҆ при́снѡ и҆ во вѣ́ки вѣкѡ́въ, а҆ми́нь.
Ма́лый вхо́дъ со є҆ѵⷢ҇лїемъ.
І҆ере́й: [глаго́летъ та́йнѡ]
Дїа́конъ: Премꙋ́дрость, про́сти.
Ли́къ: Прїиди́те, поклони́мсѧ и҆ припаде́мъ ко хрⷭ҇тꙋ̀. спаси́ ны сн҃е бж҃їй, во ст҃ы́хъ ди́венъ сы́й, пою́щыѧ тѝ, а҆ллилꙋ́їа.
Тропарѝ:
[...]
Моли́тва трист҃а́гѡ пѣ́нїѧ
І҆ере́й: [глаго́летъ та́йнѡ]
Дїа́конъ: Гдⷭ҇ꙋ помо́лимсѧ.
Ли́къ: Гдⷭ҇и поми́лꙋй.
І҆ере́й: Ꙗ҆́кѡ ст҃ъ є҆сѝ бж҃е на́шъ, и҆ тебѣ̀ сла́вꙋ возсыла́емъ, ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, ны́нѣ и҆ при́снѡ, и҆ во вѣ́ки вѣкѡ́въ.
Дїа́конъ: Гдⷭ҇и, спасѝ бл҃гочести̑выѧ.
Ли́къ: Гдⷭ҇и, спасѝ бл҃гочести̑выѧ.
Дїа́конъ: И҆ ᲂу҆слы́ши ны̀.
Ли́къ: И҆ ᲂу҆слы́ши ны̀.
Дїа́конъ: И҆ во вѣ́ки вѣкѡ́въ.
Ли́къ: А҆ми́нь.
Трист҃о́е
Ли́къ: Ст҃ы́й бж҃е, ст҃ы́й крѣ́пкїй, ст҃ы́й безсме́ртный, поми́лꙋй на́съ. [Три́жды.]
Сла́ва ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, и҆ ны́нѣ и҆ при́снѡ и҆ во вѣ́ки вѣкѡ́въ, а҆ми́нь.
Ст҃ы́й безсме́ртный поми́лꙋй на́съ.
Ст҃ы́й бж҃е, / ст҃ы́й крѣ́пкїй, / ст҃ы́й безсме́ртный, / поми́лꙋй на́съ.
Прокі́менъ
Дїа́конъ: Во́нмемъ.
І҆ере́й: Ми́ръ всѣ̑мъ.
Чте́цъ: И҆ дх҃ови твоемꙋ̀.
Дїа́конъ: Премꙋ́дрость.
Чте́цъ: [прокі́менъ]
А҆пⷭ҇лъ
Дїа́конъ: Премꙋ́дрость.
Чте́цъ: [надписа́нїе а҆пⷭ҇ла]
Дїа́конъ: Во́нмемъ.
Чте́цъ: [чте́нїе а҆пⷭ҇ла]
А҆ллилꙋ́їа
І҆ере́й: Ми́ръ тѝ.
Чте́цъ: И҆ дх҃ови твоемꙋ̀.
Ли́къ: А҆ллилꙋ́їа. [Три́жды.]
Чте́цъ: [чте́нїе а҆ллилꙋ́їа]
Є҆ѵⷢ҇лїе
І҆ере́й: [глаго́летъ та́йнѡ]
Дїа́конъ: Бл҃гословѝ, влⷣко, бл҃говѣсти́телѧ ст҃а́гѡ а҆пⷭ҇ла и҆ є҆ѵⷢ҇лі́ста, [и҆́мⷬ҇къ].
І҆ере́й, зна́менꙋѧ є҆го̀: Бг҃ъ, мл҃твами ст҃а́гѡ, сла́внагѡ, всехва́льнагѡ а҆пⷭ҇ла и҆ є҆ѵⷢ҇лі́ста, [и҆́мⷬ҇къ], да да́стъ тебѣ̀ глаго́лъ бл҃говѣствꙋ́ющемꙋ си́лою мно́гою, во и҆сполне́нїе є҆ѵⷢ҇лїа возлю́бленнагѡ сн҃а своегѡ̀, гдⷭ҇а на́шегѡ і҆и҃са хрⷭ҇та̀.
Дїа́конъ: А҆ми́нь.
І҆ере́й: Премꙋ́дрость, простѝ, ᲂу҆слы́шимъ ст҃а́гѡ є҆ѵⷢ҇лїа. Ми́ръ всѣ̑мъ.
Ли́къ: И҆ дх҃ови твоемꙋ̀.
Дїа́конъ: Ѿ [и҆́мⷬ҇къ] ст҃а́гѡ є҆ѵⷢ҇лїа чте́нїе.
Ли́къ: Сла́ва тебѣ̀ гдⷭ҇и, сла́ва тебѣ̀.
І҆ере́й: Во́нмемъ.
[чте́нїе є҆ѵⷢ҇лїа]
Ли́къ: Сла́ва тебѣ̀ гдⷭ҇и, сла́ва тебѣ̀.
Е҆ктенїа̀ сꙋгꙋ́баѧ
Дїа́конъ: Рце́мъ всѝ ѿ всеѧ̀ дꙋшѝ, и҆ ѿ всегѡ̀ помышле́нїѧ на́шегѡ рце́мъ.
Ли́къ: Гдⷭ҇и поми́лꙋй.
Дїа́конъ: Гдⷭ҇и вседержи́телю, бж҃е ѻ҆ц҃ъ на́шихъ, мо́лимъ ти сѧ, ᲂу҆слы́ши и҆ поми́лꙋй.
Ли́къ: Гдⷭ҇и поми́лꙋй.
Дїа́конъ: Поми́лꙋй на́съ бж҃е, по вели́цѣй ми́лости твое́й, мо́лимъ ти сѧ, ᲂу҆слы́ши и҆ поми́лꙋй.
Ли́къ: Гдⷭ҇и поми́лꙋй. [Три́жды.]
Дїа́конъ: Е҆щѐ мо́лимсѧ ѡ҆ вели́комъ господи́нѣ и҆ ѻ҆ц҃ѣ̀ на́шемъ, бл҃же́ннѣйшемъ митрополі́тѣ са́ввѣ, и҆ ѡ҆ господи́нѣ на́шемъ преѡсвѧще́ннѣйшемъ є҆пⷭ҇кпѣ а҆ѳана́сїи, ло́дзинскомъ и҆ по́знаньскомъ, и҆ ѡ҆ все́й во хрⷭ҇тѣ̀ бра́тїи на́шей.
Ли́къ: Гдⷭ҇и поми́лꙋй. [Три́жды.]
Дїа́конъ: Е҆щѐ мо́лимсѧ ѡ҆ богохрани́мѣй странѣ̀ на́шей, властѣ́хъ и҆ во́инствѣ є҆ѧ̀, да ти́хое и҆ безмо́лвное житїѐ поживе́мъ во всѧ́комъ бл҃гоче́стїи и҆ чистотѣ̀.
Ли́къ: Гдⷭ҇и поми́лꙋй. [Три́жды.]
Дїа́конъ: Е҆щѐ мо́лимсѧ ѡ҆ бра́тїѧхъ на́шихъ, сщ҃е́нницѣхъ, сщ҃енномона́сѣхъ и҆ все́мъ во хрⷭ҇тѣ̀ бра́тствѣ на́шемъ.
Ли́къ: Гдⷭ҇и поми́лꙋй. [Три́жды.]
Дїа́конъ: Е҆щѐ мо́лимсѧ ѡ҆ бл҃же́нныхъ и҆ приснопа́мѧтныхъ созда́телехъ ст҃а́гѡ хра́ма сегѡ̀, [а҆́ще во ѻ҆би́тели: ст҃ы́ѧ ѻ҆би́тели сеѧ̀, ] и҆ ѡ҆ всѣ́хъ преждепочи́вшихъ ѻ҆ц҃ѣ́хъ и҆ бра́тїѧхъ, здѣ̀ лежа́щихъ и҆ повсю́дꙋ, правосла́вныхъ.
Ли́къ: Гдⷭ҇и поми́лꙋй. [Три́жды.]
Дїа́конъ: Е҆щѐ мо́лимсѧ ѡ҆ ми́лости, жи́зни, ми́рѣ, здра́вїи, спасе́нїи, посѣще́нїи, проще́нїи и҆ ѡ҆ставле́нїи грѣхѡ́въ рабѡ́въ бж҃їихъ, бра́тїи ст҃а́гѡ хра́ма сегѡ̀ [а҆́ще во ѻ҆би́тели: ст҃ы́ѧ ѻ҆би́тели сеѧ̀].
Ли́къ: Гдⷭ҇и поми́лꙋй. [Три́жды.]
Дїа́конъ: Е҆щѐ мо́лимсѧ ѡ҆ плодоносѧ́щихъ и҆ добродѣ́ющихъ во ст҃ѣ́мъ и҆ всечестнѣ́мъ хра́мѣ се́мъ, трꙋжда́ющихсѧ, пою́щихъ и҆ предстоѧ́щихъ лю́дехъ, ѡ҆жида́ющихъ ѿ тебѐ вели́кїѧ и҆ бога́тыѧ млⷭ҇ти.
Ли́къ: Гдⷭ҇и поми́лꙋй. [Три́жды.]
Мл҃тва прилѣ́жнагѡ моле́нїѧ
І҆ере́й: [глаго́летъ та́йнѡ]
Возглаше́нїе: Ꙗ҆́кѡ ми́лостивъ и҆ чл҃вѣколю́бецъ бг҃ъ є҆сѝ, и҆ тебѣ̀ сла́вꙋ возсыла́емъ, ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, ны́нѣ и҆ при́снѡ и҆ во вѣ́ки вѣкѡ́въ.
Ли́къ: А҆ми́нь.
Е҆ктенїа̀ ѡ҆ ᲂу҆со́пшихъ
Дїа́конъ: Поми́лꙋй на́съ бж҃е, по вели́цѣй млⷭ҇ти твое́й, мо́лимъ ти сѧ, ᲂу҆слы́ши и҆ поми́лꙋй
Ли́къ: Гдⷭ҇и поми́лꙋй. [Три́жды.]
Дїа́конъ: Є҆щѐ мо́лимсѧ ѡ҆ ᲂу҆покое́нїи дꙋ́шъ ᲂу҆со́пшихъ рабѡ́въ бж҃їихъ, [и҆́мⷬ҇къ], и҆ ѡ҆ є҆́же прости́тисѧ и҆̀мъ всѧ́комꙋ прегрѣше́нїю, во́льномꙋ же и҆ нево́льномꙋ.
Ли́къ: Гдⷭ҇и поми́лꙋй. [Три́жды.]
Дїа́конъ: Ꙗ҆́кѡ да гдⷭ҇ь бг҃ъ ᲂу҆чини́тъ дꙋ́шы и҆́хъ, и҆дѣ́же пра́веднїи ᲂу҆покоѧ́ютсѧ.
Ли́къ: Гдⷭ҇и поми́лꙋй. [Три́жды.]
Дїа́конъ: Ми́лости бж҃їѧ, црⷭ҇тва нбⷭ҇нагѡ, и҆ ѡ҆ставле́нїѧ грѣхѡ́въ и҆́хъ, ᲂу҆ хрⷭ҇та̀ безсме́ртнагѡ цр ҃ѧ̀ и҆ бг҃а на́шегѡ про́симъ.
Ли́къ: Пода́й гдⷭ҇и.
Дїа́конъ: Гдⷭ҇ꙋ помо́лимсѧ.
Ли́къ: Гдⷭ҇и поми́лꙋй.
Моли́тва ѡ҆ ᲂу҆со́пшихъ
І҆ере́й: Бж҃е дꙋхѡ́въ, и҆ всѧ́кїѧ пло́ти, сме́рть попра́вый и҆ дїа́вола ᲂу҆праздни́вый, и҆ живо́тъ мі́рꙋ твоемꙋ̀ дарова́вый: са́мъ, гдⷭ҇и, поко́й дꙋ́шы ᲂу҆со́пшихъ ра̑бъ твои́хъ, и҆́мⷬ҇къ, въ мѣ́стѣ свѣ́тлѣ, въ мѣ́стѣ ѕла́чнѣ, въ мѣ́стѣ поко́йнѣ, ѿню́дꙋже ѿбѣжѐ болѣ́знь, печа́ль и҆ воздыха́нїе. всѧ́кое согрѣше́нїе, содѣ́ѧнное и҆́ми сло́вомъ, и҆лѝ дѣ́ломъ, и҆лѝ помышле́нїемъ, ꙗ҆́кѡ бл҃гі́й чл҃вѣколю́бецъ бг҃ъ, простѝ: ꙗ҆́кѡ нѣ́сть человѣ́къ, и҆́же жи́въ бꙋ́детъ, и҆ не согрѣши́тъ: ты́ бо є҆ди́нъ кромѣ̀ грѣха̀, пра́вда твоѧ̀ пра́вда во вѣ́ки, и҆ сло́во твоѐ и҆́стина.
Возгла́съ: Ꙗ҆́кѡ ты̀ є҆сѝ воскресе́нїе и҆ живо́тъ и҆ поко́й ᲂу҆со́пшихъ ра̑бъ твои́хъ, и҆́мⷬ҇къ, хрⷭ҇тѐ бж҃е на́шъ, и҆ тебѣ̀ сла́вꙋ возсыла́емъ, со безнача́льнымъ твои́мъ ѻ҆ц҃е́мъ, и҆ прест҃ы́мъ и҆ бл҃ги́мъ и҆ животворѧ́щимъ твои́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ.
Ли́къ: А҆ми́нь.
Е҆ктенїа̀ ѡ҆ ѡ҆глаше́нныхъ
Дїа́конъ: Помоли́тесѧ, ѡ҆глаше́ннїи гдⷭ҇ви.
Ли́къ: Гдⷭ҇и поми́лꙋй.
Дїа́конъ: Вѣ́рнїи, ѡ҆ ѡ҆глаше́нныхъ помо́лимсѧ, да гдⷭ҇ь поми́лꙋетъ и҆̀хъ.
Ли́къ: Гдⷭ҇и поми́лꙋй.
Дїа́конъ: Ѡ҆гласи́тъ и҆̀хъ сло́вомъ и҆́стины.
Ли́къ: Гдⷭ҇и поми́лꙋй.
Дїа́конъ: Ѿкры́етъ и҆̀мъ є҆ѵⷢ҇лїе пра́вды.
Ли́къ: Гдⷭ҇и поми́лꙋй.
Дїа́конъ: Соедини́тъ и҆̀хъ ст҃ѣ́й свое́й собо́рнѣй и҆ а҆пⷭ҇льстѣй це́ркви.
Ли́къ: Гдⷭ҇и поми́лꙋй.
Дїа́конъ: Спасѝ, поми́лꙋй, застꙋпѝ и҆ сохранѝ и҆̀хъ, бж҃е, твое́ю бл҃года́тїю.
Ли́къ: Гдⷭ҇и поми́лꙋй.
Дїа́конъ: Ѡ҆глаше́ннїи, главы̑ ва́шѧ гдⷭ҇ви приклони́те.
Ли́ къ: Тебѣ̀ гдⷭ҇и
Мл҃тва ѡ҆ ѡ҆глаше́нныхъ
І҆ере́й: [глаго́летъ та́йнѡ]
Возглаше́нїе: Да и҆ ті́и съ на́ми сла́вѧтъ пречестно́е и҆ великолѣ́пое и҆́мѧ твоѐ, ѻ҆ц҃а̀, и҆ сн҃а, и҆ ст҃а́гѡ дх҃а, ны́нѣ и҆ при́снѡ, и҆ во вѣ́ки вѣкѡ́въ.
Ли́къ: А҆ми́нь.
Лїтꙋргі́а вѣ́рныхъ
Нача́ло
Дїа́конъ: Е҆ли́цы ѡ҆глаше́ннїи, и҆зыди́те: ѡ҆глаше́ннїи и҆зыди́те: є҆ли́цы ѡ҆глаше́ннїи и҆зыди́те: да никто̀ ѿ ѡ҆глаше́нныхъ, є҆ли́цы вѣ́рнїи, па́ки и҆ па́ки ми́ромъ гдⷭ҇ꙋ помо́лимсѧ.
Ли́къ: Гдⷭ҇и поми́лꙋй.
Дїа́конъ: Застꙋпѝ, спасѝ, поми́лꙋй и҆ сохранѝ на́съ, бж҃е, твое́ю благода́тїю.
Ли́къ: Гдⷭ҇и поми́лꙋй.
Дїа́конъ: Премꙋ́дрость
Мл҃тва вѣ́рныхъ пе́рваѧ
І҆ере́й: [глаго́летъ та́йнѡ]
Возглаше́нїе: Ꙗ҆́кѡ подоба́етъ тебѣ̀ всѧ́каѧ сла́ва, че́сть и҆ поклоне́нїе, ѻ҆ц҃ꙋ̀ и҆ сн҃ꙋ и҆ ст҃о́мꙋ дх҃ꙋ, ны́нѣ и҆ при́снѡ и҆ во вѣ́ки вѣкѡ́въ.
Ли́къ: А҆ми́нь.
Е҆ктенїа̀ вели́каѧ
Дїа́конъ: Па́ки и҆ па́ки ми́ромъ гдⷭ҇ꙋ помо́лимсѧ.
Ли́къ: Гдⷭ҇и поми́лꙋй.
Дїа́конъ: Ѡ҆ свы́шнѣмъ ми́рѣ, и҆ спасе́нїи дꙋ́шъ на́шихъ, гдⷭ҇ꙋ помо́лимсѧ.
Ли́къ: Гдⷭ҇и поми́лꙋй.
Дїа́конъ: Ѡ҆ ми́рѣ всегѡ̀ мі́ра, бл҃гостоѧ́нїи ст҃ы́хъ бж҃їихъ цр҃кве́й и҆ соедине́нїи всѣ́хъ, гдⷭ҇ꙋ помо́лимсѧ.
Ли́къ: Гдⷭ҇и поми́лꙋй.
Дїа́конъ: Ѡ҆ ст҃ѣ́мъ хра́мѣ се́мъ, и҆ съ вѣ́рою, бл҃гоговѣ́нїемъ и҆ стра́хомъ бж҃їимъ входѧ́щихъ во́нь, гдⷭ҇ꙋ помо́лимсѧ.
Ли́къ: Гдⷭ҇и поми́лꙋй.
Дїа́конъ: Ѡ҆ и҆зба́витисѧ на́мъ ѿ всѧ́кїѧ ско́рби, гнѣ́ва и҆ нꙋ́жды, гдⷭ҇ꙋ помо́лимсѧ.
Ли́къ: Гдⷭ҇и поми́лꙋй.
Дїа́конъ: Застꙋпѝ, спасѝ, поми́лꙋй и҆ сохранѝ на́съ, бж҃е, твое́ю благода́тїю.
Ли́къ: Гдⷭ҇и поми́лꙋй.
Дїа́конъ: Премꙋ́дрость
Мл҃тва вѣ́рныхъ втора́ѧ
І҆ере́й: [глаго́летъ та́йнѡ]
Возглаше́нїе: Ꙗ҆́кѡ да под̾ держа́вою твое́ю всегда̀ храни́ми, тебѣ̀ сла́вꙋ возсыла́емъ, ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, ны́нѣ и҆ при́снѡ, и҆ во вѣ́ки вѣкѡ́въ.
Ли́къ: А҆ми́нь.
Херꙋві́мскаѧ пѣ́снь
Ли́къ: И҆̀же херꙋві́мы та́йнѡ ѡ҆бразꙋ́юще, и҆ животворѧ́щей трⷪ҇цѣ трист҃ꙋ́ю пѣ́снь припѣва́юще, всѧ́кое ны́нѣ жите́йское ѿложи́мъ попече́нїе.
І҆ере́й: [глаго́летъ та́йнѡ]
Вели́кїй вхо́дъ
Дїа́конъ: Вели́каго господи́на и҆ ѻ҆тца̀ на́шегѡ бл҃же́ннѣйшагѡ са́ввꙋ, митрополі́та варша́вскагѡ и҆ всеѧ̀ по́льши, и҆ господи́на на́шегѡ преѡсщ҃е́ннѣйшагѡ а҆ѳана́сїѧ, є҆пⷭ҇кпа ло́дзинскагѡ и҆ по́знаньскагѡ, да помѧне́тъ гдⷭ҇ь бг҃ъ во црⷭ҇твїи свое́мъ, всегда̀, ны́нѣ и҆ при́снѡ и҆ во вѣ́ки вѣкѡ́въ.
І҆ере́й: Преѡсвѧще́нныѧ митрополі́ты, а҆рхїепⷭ҇кпы и҆ є҆пⷭ҇кпы, и҆ ве́сь сщ҃е́нническїй и҆ мона́шескїй чи́нъ, бра́тїю и҆ прихо́жанъ ст҃а́гѡ хра́ма сегѡ̀, ва́съ и҆ всѣ́хъ правосла́вныхъ хрⷭ҇тїа́нъ да помѧне́тъ гдⷭ҇ь бг҃ъ во црⷭ҇твїи свое́мъ всегда̀, ны́нѣ и҆ при́снѡ и҆ во вѣ́ки вѣкѡ́въ.
Ли́къ: А҆ми́нь. Ꙗ҆́кѡ да цр҃ѧ̀ всѣ́хъ под̾и́мемъ, а҆́гг҃льскими неви́димѡ дорѷноси́ма чи́нми. а҆ллилꙋ́їа, а҆ллилꙋ́їа, а҆ллилꙋ́їа.
Е҆ктенїа̀ проси́тєльнаѧ
Дїа́конъ: И҆спо́лнимъ моли́твꙋ на́шꙋ гдⷭ҇ви.
Ли́къ: Гдⷭ҇и поми́лꙋй.
Дїа́конъ: Ѡ҆ предложе́нныхъ честны́хъ дарѣ́хъ, гдⷭ҇ꙋ помо́лимсѧ.
Ли́къ: Гдⷭ҇и поми́лꙋй.
Дїа́конъ: Ѡ҆ ст҃ѣ́мъ хра́мѣ се́мъ, и҆ съ вѣ́рою, бл҃гоговѣ́нїемъ и҆ стра́хомъ бж҃їимъ входѧ́щихъ во́нь, гдⷭ҇ꙋ помо́лимсѧ.
Ли́къ: Гдⷭ҇и поми́лꙋй.
Дїа́конъ: Ѡ҆ и҆зба́витисѧ на́мъ ѿ всѧ́кїѧ ско́рби, гнѣ́ва и҆ нꙋ́жды, гдⷭ҇ꙋ помо́лимсѧ.
Ли́къ: Гдⷭ҇и поми́лꙋй.
Дїа́конъ: Застꙋпѝ, спасѝ, поми́лꙋй и҆ сохранѝ на́съ бж҃е твое́ю бл҃года́тїю.
Ли́къ: Гдⷭ҇и поми́лꙋй.
Дїа́конъ: Днѐ всегѡ̀ соверше́нна, свѧ́та, ми́рна и҆ безгрѣ́шна, ᲂу҆ гдⷭ҇а про́симъ.
Ли́къ: Пода́й гдⷭ҇и.
Дїа́ конъ: А҆́гг҃ла ми́рна, вѣ́рна наста́вника, храни́телѧ дꙋ́шъ и҆ тѣле́съ на́шихъ, ᲂу҆ гдⷭ҇а про́симъ.
Ли́къ: Пода́й гдⷭ҇и.
Дїа́конъ: Проще́нїѧ и҆ ѡ҆ставле́нїѧ грѣхѡ́въ и҆ прегрѣше́нїй на́шихъ, ᲂу҆ гдⷭ҇а про́симъ.
Ли́къ: Пода́й гдⷭ҇и.
Дїа́конъ: До́брыхъ и҆ поле́зныхъ дꙋша́мъ на́шымъ, и҆ ми́ра мі́рови, ᲂу҆ гдⷭ҇а про́симъ.
Ли́къ: Пода́й гдⷭ҇и.
Дїа́конъ: Про́чее вре́мѧ живота̀ на́шегѡ въ ми́рѣ и҆ покаѧ́нїи сконча́ти, ᲂу҆ гдⷭ҇а про́симъ.
Ли́къ: Пода́й гдⷭ҇и.
Дїа́конъ: Хр ⷭ҇тїа́нскїѧ кончи́ны живота̀ на́шегѡ, безболѣ́зненны, непосты́дны, ми́рны и҆ до́брагѡ ѿвѣ́та на стра́шнѣмъ сꙋди́щи хрⷭ҇то́вѣ про́симъ.
Ли́къ: Пода́й гдⷭ҇и.
Дїа́конъ: Прест҃ꙋ́ю, пречⷭ҇тꙋю, пребл҃гослове́ннꙋю, сла́внꙋю влⷣчцꙋ на́шꙋ бцⷣꙋ, и҆ приснодв҃ꙋ мр҃і́ю со всѣ́ми ст҃ы́ми помѧнꙋ́вше, са́ми себѐ, и҆ дрꙋгъ дрꙋ́га, и҆ ве́сь живо́тъ на́шъ хрⷭ҇тꙋ̀ бг҃ꙋ предади́мъ.
Ли́къ: Тебѣ̀ гдⷭ҇и.
Мл҃тва приноше́нїѧ, по поставле́нїи бж҃е́ственныхъ дарѡ́въ на ст҃ѣ́й трапе́зѣ
І҆ере́й: [глаго́летъ та́йнѡ]
Возглаше́нїе: Щедро́тами є҆диноро́днагѡ сн҃а твоегѡ̀, съ ни́мже бл҃гослове́нъ є҆сѝ, со прест҃ы́мъ и҆ бл҃ги́мъ и҆ животворѧ́щимъ твои́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ.
Ли́къ: А҆ми́нь.
І҆ере́й: Ми́ръ всѣ̑мъ.
Ли́къ: И҆ дх҃ови твоемꙋ̀.
Дїа́конъ: Возлю́бимъ дрꙋгъ дрꙋ́га, да є҆диномы́слїемъ и҆сповѣ́мы.
Ли́къ: Ѻ҆ц҃а̀, и҆ сн҃а, и҆ ст҃а́го дх҃а, трⷪ҇цꙋ є҆диносꙋ́щнꙋю, и҆ нераздѣ́льнꙋю.
Дїа́конъ: Двє́ри, двє́ри премꙋ́дростїю во́нмемъ.
Сѷмво́лъ вѣ́ры
а҃. Вѣ́рꙋю во є҆ди́наго бг҃а ѻ҆ц҃а̀ вседержи́телѧ, творца̀ нб҃ꙋ и҆ землѝ, ви̑димымъ же всѣ̑мъ и҆ неви̑димымъ.
в҃. И҆ во є҆ди́наго гдⷭ҇а і҆и҃са хрⷭ҇та̀ сн҃а бж҃їѧ, є҆диноро́днаго и҆́же ѿ ѻ҆ц҃а̀ рожде́ннаго пре́жде всѣ́хъ вѣ̑къ. Свѣ́та ѿ свѣ́та, бг҃а и҆́стинна ѿ бг҃а и҆́стинна, рожде́нна, не сотворе́нна, є҆диносꙋ́щна ѻ҆ц҃ꙋ̀, и҆́мже всѧ̑ бы́ша.
г҃. На́съ ра́ди человѣ̑къ, и҆ на́шегѡ ра́ди сп҃се́нїѧ сше́дшагѡ съ нб҃съ, и҆ воплоти́вшагосѧ ѿ дх҃а ст҃а и҆ мр҃і́и дв҃ы, и҆ вочл҃вѣ́чшасѧ:
д҃. Распѧ́таго же за ны̀ при понті́йстѣмъ пїла́тѣ, и҆ страда́вша и҆ погребе́нна:
є҃. И҆ воскре́сшаго въ тре́тїй де́нь по писа́нїємъ:
ѕ҃. И҆ возше́дшаго на нб҃са̀ и҆ сѣдѧ́ща ѡ҆деснꙋ́ю ѻ҆ц҃а̀:
з҃. И҆ па́ки грѧдꙋ́щаго со сла́вою сꙋди́ти живы̑мъ и҆ мє́ртвымъ, є҆гѡ́же црⷭ҇твїю не бꙋ́детъ конца̀.
и҃. И҆ въ дх҃а ст҃а́го, гдⷭ҇а, животворѧ́щаго, и҆́же ѿ ѻ҆ц҃а̀ и҆сходѧ́щаго, и҆́же со ѻ҆ц҃е́мъ и҆ сн҃омъ спокланѧ́ема и҆ ссла́вима глаго́лавшаго прⷪ҇рѡ́ки.
ѳ҃. Во є҆ди́нꙋ ст҃ꙋ́ю собо́рнꙋю и҆ а҆пⷭ҇льскꙋю цр҃ковь.
і҃. И҆сповѣ́дꙋю є҆ди́но креще́нїе, во ѡ҆ставле́нїе грѣхѡ́въ.
а҃і. Ча́ю воскр҃се́нїѧ ме́ртвыхъ:
в҃і. И҆ жи́зни бꙋ́дꙋщагѡ вѣ́ка. а҆ми́нь.
Ст҃о́е возноше́нїе
Дїа́конъ: Ста́немъ до́брѣ, ста́немъ со стра́хомъ, во́нмемъ, ст҃о́е возноше́нїе въ ми́рѣ приноси́ти.
Ли́къ: Ми́лость ми́ра, же́ртвꙋ хвале́нїѧ.
І҆ере́й: Бл҃года́ть гдⷭ҇а на́шегѡ і҆и҃са хрⷭ҇та̀, и҆ любы̀ бг҃а и҆ ѻ҆ц҃а̀, и҆ прича́стїе ст҃а́гѡ дх҃а, бꙋ́ди со всѣ́ми ва́ми.
Ли́къ: И҆ со дх҃омъ твои́мъ.
І҆ере́й: Горѣ̀ и҆мѣ́имъ сердца̀.
Ли́къ: И҆́мамы ко гдⷭ҇ꙋ.
І҆ере́й: Бл҃годари́мъ гдⷭ҇а.
Ли́къ: Досто́йно и҆ пра́ведно є҆́сть, покланѧ́тисѧ ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, трⷪ҇цѣ є҆диносꙋ́щнѣй и҆ нераздѣ́льнѣй.
І҆ере́й: [глаго́летъ та́йнѡ]
І҆ере́й: Побѣ́днꙋю пѣ́снь пою́ще, вопїю́ще, взыва́юще и҆ глаго́люще.
Ли́къ: Ст҃ъ, ст҃ъ, ст҃ъ гдⷭ҇ь саваѡ́ѳъ, и҆спо́лнь нб҃о и҆ землѧ̀ сла́вы твоеѧ̀, ѡ҆са́нна въ вы́шнихъ, бл҃гослове́нъ грѧды́й во и҆́мѧ гдⷭ҇не, ѡ҆са́нна въ вы́шнихъ.
І҆ере́й: [глаго́летъ та́йнѡ]
І҆ере́й: Прїими́те, ꙗ҆ди́те, сїѐ є҆́сть тѣ́ло моѐ є҆́же за вы̀ ломи́мое во ѡ҆ставле́нїе грѣхѡ́въ.
Ли́къ: А҆ми́нь.
І҆ере́й: [глаго́летъ та́йнѡ]
І҆ере́й: Пі́йте ѿ неѧ̀ всѝ, сїѧ̀ є҆́сть кро́вь моѧ̀ но́вагѡ завѣ́та, ꙗ҆́же за вы̀ и҆ за мнѡ́гїѧ и҆злива́емаѧ, во ѡ҆ставле́нїе грѣхѡ́въ.
Ли́къ: А҆ми́нь.
І҆ере́й: [глаго́летъ та́йнѡ]
І҆ере́й: Твоѧ̑ ѿ твои́хъ тебѣ̀ приносѧ́ще, ѡ҆ всѣ́хъ и҆ за всѧ̑.
Ли́къ: Тебѐ пое́мъ, тебѐ бл҃гослови́мъ, тебѣ̀ бл҃годари́мъ гдⷭ҇и, и҆ мо́лимъ ти сѧ, бж҃е на́шъ.
І҆ере́й: [глаго́летъ та́йнѡ]
І҆ере́й: И҆зрѧ́днѡ ѡ҆ прест҃ѣ́й, пречⷭ҇тѣй, пребл҃гослове́ннѣй, сла́внѣй влⷣчцѣ на́шей бцⷣѣ и҆ приснодв҃ѣ мр҃і́и.
Ли́къ: Досто́йно є҆́сть ꙗ҆́кѡ вои́стиннꙋ, блажи́ти тѧ̀ бцⷣꙋ, приснобл҃же́ннꙋю, и҆ пренепоро́чнꙋю, и҆ мт҃рь бг҃а на́шегѡ. Чⷭ҇тнѣ́йшꙋю херꙋві̑мъ, и҆ сла́внѣйшꙋю без̾ сравне́нїѧ серафі̑мъ, без̾ и҆стлѣ́нїѧ бг҃а сл о́ва ро́ждшꙋю, сꙋ́щꙋю бцⷣꙋ тѧ̀ велича́емъ.
І҆ере́й: [глаго́летъ та́йнѡ]
І҆ере́й: Въ пе́рвыхъ помѧнѝ гдⷭ҇и, вели́каго господи́на и҆ ѻ҆тца̀ на́шегѡ бл҃же́ннѣйшагѡ са́ввꙋ, митрополі́та варша́вскагѡ и҆ всеѧ̀ по́льши, и҆ господи́на на́шегѡ преѡсщ҃е́ннѣйшагѡ а҆ѳана́сїѧ, є҆пⷭ҇кпа ло́дзинскагѡ и҆ по́знаньскагѡ, и҆̀хже да́рꙋй ст҃ы̑мъ твои̑мъ цр҃квамъ, въ ми́рѣ цѣ́лыхъ, чⷭ҇тныхъ, здра́выхъ, долгоде́нствꙋющихъ, пра́вѡ пра́вѧщихъ сло́во твоеѧ̀ и҆́стины.
Ли́къ: И҆ всѣ́хъ, и҆ всѧ̑.
І҆ере́й: [глаго́летъ та́йнѡ]
І҆ере́й: И҆ да́ждь на́мъ є҆ди́нѣми ᲂу҆сты̀ и҆ є҆ди́нѣмъ се́рдцемъ сла́вити и҆ воспѣва́ти пречⷭ҇тно́е и҆ великолѣ́пое и҆́мѧ твоѐ, ѻ҆ц҃а̀, и҆ сн҃а, и҆ ст҃а́гѡ дх҃а, ны́нѣ и҆ при́снѡ, и҆ во вѣ́ки вѣкѡ́въ.
Ли́къ: А҆ми́нь.
І҆ере́й: И҆ да бꙋ́дꙋтъ ми́лѡсти вели́кагѡ бг҃а и҆ сп҃са на́шегѡ і҆и҃са хрⷭ҇та̀ со всѣ́ми ва́ми.
Ли́къ: И҆ со дх҃омъ твои̑мъ.
Е҆ктенїа̀ проси́тєльнаѧ
Дїа́конъ: Всѧ̑ ст҃ы̑ѧ помѧнꙋ́вше, па́ки и҆ па́ки ми́ромъ гдⷭ҇ꙋ помо́лимсѧ.
Ли́къ: Гдⷭ҇и поми́лꙋй.
Дїа́конъ: Ѡ҆ принесе́нныхъ и҆ ѡ҆свѧще́нныхъ честны́хъ дарѣ́хъ, гдⷭ҇ꙋ помо́лимсѧ.
Ли́къ: Гдⷭ҇и поми́лꙋй.
Дїа́конъ: Ꙗ҆́кѡ да чл҃вѣколю́бецъ бг҃ъ на́шъ прїе́мъ ѧ҆̀ во ст҃ы́й и҆ пренбⷭ҇ный и҆ мы́сленный сво́й же́ртвенникъ, въ воню̀ бл҃гоꙋха́нїѧ дꙋхо́внагѡ, возниспо́слетъ на́мъ бж҃е́ственнꙋю бл҃года́ть и҆ да́ръ ст҃а́гѡ дх҃а, помо́лимсѧ.
Ли́къ: Гдⷭ҇и поми́лꙋй.
Дїа́конъ: Ѡ҆ и҆зба́витисѧ на́мъ ѿ всѧ́кїѧ ско́рби, гнѣ́ва и҆ нꙋ́жды, гдⷭ҇ꙋ помо́лимсѧ.
Ли́къ: Гдⷭ҇и поми́лꙋй.
І҆ере́й: [глаго́летъ та́йнѡ]
Дїа́конъ: Застꙋпѝ, спасѝ, поми́лꙋй и҆ сохранѝ на́съ бж҃е, твое́ю благода́тїю.
Ли́къ: Гдⷭ҇и поми́лꙋй.
Дїа́конъ: Дн ѐ всегѡ̀ соверше́нна, свѧ́та, ми́рна и҆ безгрѣ́шна, ᲂу҆ гдⷭ҇а про́симъ.
Ли́къ: Пода́й гдⷭ҇и.
Дїа́конъ: А҆́гг҃ла ми́рна, вѣ́рна наста́вника, храни́телѧ дꙋ́шъ и҆ тѣле́съ на́шихъ, ᲂу҆ гдⷭ҇а про́симъ.
Ли́къ: Пода́й гдⷭ҇и.
Дїа́конъ: Проще́нїѧ и҆ ѡ҆ставле́нїѧ грѣхѡ́въ и҆ прегрѣше́нїй на́шихъ, ᲂу҆ гдⷭ҇а про́симъ.
Ли́къ: Пода́й гдⷭ҇и.
Дїа́конъ: До́брыхъ и҆ поле́зныхъ дꙋша́мъ на́шымъ, и҆ ми́ра мі́рови, ᲂу҆ гдⷭ҇а про́симъ.
Ли́къ: Пода́й гдⷭ҇и.
Дїа́конъ: Про́чее вре́мѧ живота̀ на́ше гѡ въ ми́рѣ и҆ покаѧ́нїи сконча́ти, ᲂу҆ гдⷭ҇а про́симъ.
Ли́къ: Пода́й гдⷭ҇и.
Дїа́конъ: Хрⷭ҇тїа́нскїѧ кончи́ны живота̀ на́шегѡ, безболѣ́знены, непосты́дны, ми́рны и҆ до́брагѡ ѿвѣ́та на стра́шнѣмъ сꙋди́щи хрⷭ҇то́вѣ про́симъ.
Ли́къ: Пода́й гдⷭ҇и.
Дїа́конъ: Соедине́нїе вѣ́ры, и҆ прича́стїе ст҃а́гѡ дх҃а и҆спроси́вше, са́ми себѐ, и҆ дрꙋгъ дрꙋ́га, и҆ ве́сь живо́тъ на́шъ хрⷭ҇тꙋ̀ бг҃ꙋ предади́мъ.
Ли́къ: Тебѣ̀ гдⷭ҇и.
Моли́тва пред̾ ст҃ы́м причаще́нїем
І҆ере́й: [глаго́летъ та́йнѡ]
Возглаше́нїе: И҆ сподо́би на́съ, влⷣко, со дерзнове́нїемъ, неѡсꙋжде́ннѡ смѣ́ти призыва́ти тебѐ нбⷭ҇наго бг҃а ѻ҆ц҃а̀, и҆ глаго́лати.
Лю́дїе: Ѻ҆́ч҃е на́шъ, и҆́же є҆сѝ на нб҃сѣ́хъ, да ст҃и́тсѧ и҆́мѧ твоѐ, да прїи́детъ ца́рствїе твоѐ: да бꙋ́детъ во́лѧ твоѧ̀, ꙗ҆́кѡ на нб҃сѝ, и҆ на землѝ. хлѣ́бъ на́шъ насꙋ́щный да́ждь на́мъ дне́сь, и҆ ѡ҆ста́ви на́мъ до́лги на́шѧ, ꙗ҆́коже и҆ мы̀ ѡ҆ставлѧ́емъ должникѡ́мъ на́шымъ: и҆ не введѝ на́съ во и҆скꙋше́нїе, но и҆зба́ви на́съ ѿ лꙋка́вагѡ.
І҆ере́й: Ꙗ҆́кѡ твоѐ є҆́сть црⷭ҇тво, и҆ си́ла, и҆ сла́ва, ѻ҆ц҃а̀, и҆ сн҃а, и҆ ст҃а́гѡ дх҃а, ны́нѣ и҆ при́снѡ, и҆ во вѣ́ки вѣкѡ́въ.
Ли́къ: А҆ми́нь.
І҆ере́й: Ми́ръ всѣ̑мъ.
Ли́къ: И҆ дх҃ови твоемꙋ̀.
Дїа́конъ: Главы̑ ва́шѧ гдⷭ҇ви приклони́те.
Ли́къ: Тебѣ̀ гдⷭ҇и.
Моли́тва главоклоне́нїѧ
І҆ере́й: [глаго́летъ та́йнѡ]
Возглаше́нїе: Бл҃года́тїю, и҆ щедро́тами, и҆ человѣколю́бїемъ є҆диноро́днагѡ сн҃а твоегѡ̀, съ ни́мже бл҃гослове́нъ є҆сѝ, со прест҃ы́мъ и҆ бл҃ги́мъ и҆ животворѧ́щимъ твои́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ.
Ли́къ: А҆ми́нь.
І҆ере́й: [глаго́летъ та́йнѡ]
Дїа́конъ: Во́нмемъ.
Ли́къ: Тебѣ̀ гдⷭ҇и.
І҆ере́й: Ст҃а̑ѧ ст҃ы̑мъ.
Ли́къ: Є҆ди́нъ ст҃ъ, є҆ди́нъ гдⷭ҇ь, і҆и҃съ хрⷭ҇то́съ, во сла́вꙋ бг҃а ѻ҆ц҃а̀, а҆ми́нь.
Причаще́нїе въ ѻ҆лтарѣ́
[...]
Причаще́нїе вѣ́рныхъ
Дїа́конъ: Со стра́хомъ бж҃їимъ и҆ вѣ́рою пристꙋпи́те.
Ли́къ: Бл҃гослове́нъ грѧды́й во и҆́мѧ гдⷭ҇не, бг҃ъ гдⷭ҇ь, и҆ ꙗ҆ви́сѧ на́мъ.
І҆ере́й: Вѣ́рꙋю, гдⷭ҇и, и҆ и҆сповѣ́дꙋю, ꙗ҆́кѡ ты̀ є҆сѝ вои́стиннꙋ хрⷭ҇то́съ, сн҃ъ бг҃а жива́гѡ, прише́дый въ мі́ръ грѣ̑шныѧ спастѝ, ѿ ни́хже пе́рвый є҆́смь а҆́зъ: є҆щѐ вѣ́рꙋю, ꙗ҆́кѡ сїѐ са́мое є҆́сть пречи́стое тѣ́ло твоѐ, и҆ сїѧ̀ є҆́сть са́маѧ честна́ѧ кро́вь твоѧ̀. молю́сѧ ᲂу҆̀бо тебѣ̀: поми́лꙋй мѧ̀, и҆ прости́ ми прегрѣшє́нїѧ моѧ̑ вѡ́льнаѧ и҆ невѡ́льнаѧ, ꙗ҆̀же сло́вомъ, ꙗ҆̀же дѣ́ломъ, ꙗ҆̀же вѣ́дѣнїемъ и҆ невѣ́дѣнїемъ: и҆ сподо́би мѧ̀ неѡсꙋжде́ннѡ причасти́тисѧ пречи́стыхъ твои́хъ та́инствъ, во ѡ҆ставле́нїе грѣхѡ́въ и҆ въ жи́знь вѣ́чнꙋю. А҆ми́нь.
І҆ере́й: Ве́чери твоеѧ̀ та́йныѧ, дне́сь сн҃е бж҃їй, прича́стника мѧ̀ прїимѝ: не бо̀ врагѡ́мъ твои̑мъ та́йнꙋ повѣ́мъ, ни лобза́нїѧ тѝ да́мъ ꙗ҆́кѡ і҆ꙋ́да, но ꙗ҆́кѡ разбо́йникъ и҆сповѣ́даю тѧ̀: помѧни́ мѧ гдⷭ҇и, во црⷭ҇твїи твое́мъ. Да не въ сꙋ́дъ и҆лѝ во ѡ҆сꙋжде́нїе бꙋ́детъ мнѣ̀ причаще́нїе ст҃ы́хъ твои́хъ та̑инъ гдⷭ҇и, но во и҆сцѣле́нїе дꙋшѝ и҆ тѣ́ла. А҆ми́нь.
Ли́къ: Тѣ́ло хрⷭ҇то́во прїими́те, и҆сто́чника безсме́ртнагѡ вкꙋси́те. А҆ллилꙋ́їа, а҆ллилꙋ́їа, а҆ллилꙋ́їа.
По причащ е́нїи
І҆ере́й: Спасѝ бж҃е лю́ди твоѧ̑, и҆ благословѝ достоѧ́нїе твоѐ.
Ли́къ: Ви́дѣхомъ свѣ́тъ и҆́стинный, прїѧ́хомъ дх҃а нбⷭ҇наго, ѡ҆брѣто́хомъ вѣ́рꙋ и҆́стиннꙋю, нераздѣ́льнѣй трⷪ҇цѣ покланѧ́емсѧ: та́ бо на́съ спасла̀ є҆́сть.
І҆ере́й: Всегда̀, ны́нѣ и҆ при́снѡ, и҆ во вѣ́ки вѣкѡ́въ.
Ли́къ: А҆ми́нь. Да и҆спо́лнѧтсѧ ᲂу҆ста̀ на́шѧ хвале́нїѧ твоегѡ̀ гдⷭ҇и, ꙗ҆́кѡ да пое́мъ сла́вꙋ твою̀, ꙗ҆́кѡ сподо́билъ є҆сѝ на́съ причасти́тисѧ ст҃ы̑мъ твои̑мъ, бж҃е́ствєннымъ, безсмє́ртнымъ и҆ животворѧ́щымъ та́йнамъ, соблюдѝ на́съ во твое́й ст҃ы́ни ве́сь де́нь поꙋча́тисѧ пра́вдѣ твое́й. а҆ллилꙋ́їа, а҆ллилꙋ́їа, а҆ллилꙋ́їа.
Е҆ктенїа̀ благода́рственнаѧ
Дїа́конъ: Про́сти прїи́мше бж҃е́ственныхъ, ст҃ы́хъ, пречⷭ҇тыхъ, безсме́ртныхъ, небе́сныхъ и҆ животворѧ́щихъ, стра́шныхъ хрⷭ҇то́выхъ та̑инъ, досто́йнѡ благодари́мъ гдⷭ҇а.
Ли́къ: Гдⷭ҇и поми́лꙋй.
Дїа́конъ: Застꙋпѝ, спасѝ, поми́лꙋй и҆ сохранѝ на́съ бж҃е твое́ю бл҃года́тїю.
Ли́къ: Гдⷭ҇и поми́лꙋй.
Дїа́конъ: Де́нь ве́сь соверше́нъ, ст҃ъ, ми́ренъ и҆ безгрѣ́шенъ и҆спроси́вше, са́ми себѐ и҆ дрꙋгъ дрꙋ́га, и҆ ве́сь живо́тъ на́шъ хрⷭ҇тꙋ̀ бг҃ꙋ предади́мъ.
Ли́къ: Тебѣ̀ гдⷭ҇и.
І҆ере́й: Ꙗ҆́кѡ ты̀ є҆сѝ ѡ҆свѧще́нїе на́ше, и҆ тебѣ̀ сла́вꙋ возсыла́емъ, ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, ны́нѣ и҆ при́снѡ, и҆ во вѣ́ки в ѣкѡ́въ.
Ли́къ: А҆ми́нь.
І҆ере́й: Съ ми́ромъ и҆зы́демъ.
Ли́къ: Ѡ҆ и҆́мени гдⷭ҇ни.
Дїа́конъ: Гдⷭ҇ꙋ помо́лимсѧ.
Ли́къ: Гдⷭ҇и поми́лꙋй.
Мл҃тва заамвѡ́ннаѧ
І҆ере́й: Бл҃гословлѧ́ѧй бл҃гословѧ́щыѧ тѧ̀ гдⷭ҇и, и҆ ѡ҆свѧща́ѧй на тѧ̀ ᲂу҆пова́ющыѧ, спасѝ лю́ди твоѧ̑, и҆ благословѝ достоѧ́нїе твоѐ, и҆сполне́нїе цр҃кве твоеѧ̀ сохранѝ, ѡ҆свѧтѝ лю́бѧщыѧ благолѣ́пїе до́мꙋ твоегѡ̀: ты̀ тѣ́хъ воспросла́ви бж҃е́ственною твое́ю си́лою, и҆ не ѡ҆ста́ви на́съ ᲂу҆пова́ющихъ на тѧ̀. ми́ръ мі́рови твоемꙋ̀ да́рꙋй, це́рквамъ твои̑мъ, свѧще́нникѡмъ, во́инствꙋ, и҆ всѣ̑мъ л ю́демъ твои̑мъ: ꙗ҆́кѡ всѧ́кое даѧ́нїе бл҃го, и҆ всѧ́къ да́ръ соверше́нъ свы́ше є҆́сть, сходѧ́й ѿ тебѐ ѻ҆ц҃а̀ свѣ́тѡвъ: и҆ тебѣ̀ сла́вꙋ, и҆ бл҃годаре́нїе, и҆ поклоне́нїе возсыла́емъ, ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, ны́нѣ и҆ при́снѡ, и҆ во вѣ́ки вѣкѡ́въ.
Ли́къ: А҆ми́нь.
Ли́къ: Бꙋ́ди и҆́мѧ гдⷭ҇не бл҃гослове́но ѿ ны́нѣ и҆ до вѣ́ка. [Три́жды.]
Ѱало́мъ л҃г
а҃. Бл҃гословлю̀ гдⷭ҇а на всѧ́кое вре́мѧ, вы́нꙋ хвала̀ є҆гѡ̀ во ѹ҆стѣ́хъ мои́хъ.
в҃. Ѡ҆ гдⷭ҇ѣ похва́литсѧ дꙋша̀ моѧ̀: да ѹ҆слы́шатъ кро́тцыи и҆ возвеселѧ́тсѧ.
г҃. Возвели́чите гдⷭ҇а со мно́ю, и҆ вознесе́мъ и҆́мѧ є҆гѡ̀ вкꙋ́пѣ.
д҃. Взыска́хъ гдⷭ҇а, и҆ ѹ҆слы́ша мѧ̀ и҆ ѿ всѣ́хъ скорбе́й мои́хъ и҆зба́ви мѧ̀.
є҃. Пристꙋпи́те къ немꙋ̀ и҆ просвѣти́тесѧ, и҆ ли́ца ва̑ша не постыдѧ́тсѧ.
ѕ҃. Се́й ни́щїй воззва̀, и҆ гдⷭ҇ь ѹ҆слы́ша и҆̀, и҆ ѿ всѣ́хъ скорбе́й є҆гѡ̀ сп҃сѐ и҆̀.
з҃. Ѡ҆полчи́тсѧ а҆́гг҃лъ гдⷭ҇ень ѡ҆́крестъ боѧ́щихсѧ є҆гѡ̀ и҆ и҆зба́витъ и҆̀хъ.
и҃. Вкꙋси́те и҆ ви́дите, ꙗ҆́кѡ бл҃гъ гдⷭ҇ь: бл҃же́нъ мꙋ́жъ, и҆́же ѹ҆пова́етъ на́нь.
ѳ҃. Бо́йтесѧ гдⷭ҇а, всѝ ст҃і́и є҆гѡ̀, ꙗ҆́кѡ нѣ́сть лише́нїѧ боѧ́щымсѧ є҆гѡ̀.
і҃. Бога́тїи ѡ҆бнища́ша и҆ взалка́ша: взыска́ющїи же гдⷭ҇а не лиша́тсѧ всѧ́кагѡ бла́га.
а҃і. Прїиди́те, ча̑да, послꙋ́шайте менѐ, стра́хꙋ гдⷭ҇ню наꙋчꙋ̀ ва́съ.
в҃і. Кто́ є҆сть человѣ́къ хотѧ́й живо́тъ, любѧ́й дни̑ ви́дѣти бла́ги;
г҃і. Ѹ҆держѝ ѧ҆зы́къ тво́й ѿ ѕла̀ и҆ ѹ҆стнѣ̀ твоѝ, є҆́же не глаго́лати льстѝ.
д҃і. Ѹ҆клони́сѧ ѿ ѕла̀ и҆ сотворѝ бла́го: взыщѝ ми́ра и҆ поженѝ и҆̀.
є҃і. Ѻ҆́чи гдⷭ҇ни на првⷣныѧ, и҆ ѹ҆́ши є҆гѡ̀ въ моли́твꙋ и҆́хъ.
ѕ҃і. Лице́ же гдⷭ҇не на творѧ́щыѧ ѕла̑ѧ, є҆́же потреби́ти ѿ землѝ па́мѧть и҆́хъ.
з҃і. Воззва́ша првⷣнїи, и҆ гдⷭ҇ь ѹ҆слы́ша и҆̀хъ и҆ ѿ всѣ́хъ скорбе́й и҆́хъ и҆зба́ви и҆̀хъ.
и҃і. Бли́з̾ гдⷭ҇ь сокрꙋше́нныхъ се́рдцемъ, и҆ смирє́нныѧ дꙋ́хомъ сп҃се́тъ.
ѳ҃і. Мнѡ́ги скѡ́рби првⷣнымъ, и҆ ѿ всѣ́хъ и҆́хъ и҆зба́витъ ѧ҆̀ гдⷭ҇ь.
к҃. Храни́тъ гдⷭ҇ь всѧ̑ кѡ́сти и҆́хъ, ни є҆ди́на ѿ ни́хъ сокрꙋши́тсѧ.
к҃а. Сме́рть грѣ́шникѡвъ люта̀, и҆ ненави́дѧщїи првⷣнаго прегрѣша́тъ.
к҃в. И҆зба́витъ гдⷭ҇ь дꙋ́шы ра̑бъ свои́хъ, и҆ не прегрѣша́тъ всѝ ѹ҆пова́ющїи на него̀.
Мл҃тва, глаго́лемаѧ внегда̀ потреби́ти ст҃а̑ѧ
І҆ере́й: [глаго́летъ та́йнѡ]
Возглаше́нїе: Благослове́нїе гдⷭ҇не на ва́съ, тог ѡ̀ бл҃года́тїю и҆ чл҃вѣколю́бїемъ, всегда̀, ны́нѣ и҆ при́снѡ, и҆ во вѣ́ки вѣкѡ́въ.
Ли́къ: А҆ми́нь.
І҆ере́й: Сла́ва тебѣ̀ хрⷭ҇тѐ бж҃е, ᲂу҆пова́нїе на́ше, сла́ва тебѣ̀.
Ли́къ: Сла́ва ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, и҆ ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.
Ли́къ: Гдⷭ҇и поми́лꙋй. [Три́жды.]
Ли́къ: Благословѝ.
Ѿпуст
І҆ере́й: [Воскресы́й и҆з̾ ме́ртвыхъ] хрⷭ҇то́съ и҆́стинный бг҃ъ на́шъ, мл҃твами пречⷭ҇тыѧ своеѧ̀ мт҃ре (и҆ прѡ́чаѧ), и҆́же во ст҃ы́хъ ѻ҆ц҃а̀ на́шегѡ а҆рхїепⷭ҇кпа кѡнстанті́нѧ гра́да і҆ѡа́нна златоꙋ́стагѡ: и҆ ст҃а́гѡ, и҆́мⷬ҇къ, [є҆гѡ́же є҆́сть хра́мъ и҆ є҆гѡ́же є҆́сть де́нь], и҆ всѣ́хъ ст҃ы́хъ, поми́лꙋетъ и҆ спасе́тъ на́съ, ꙗ҆́кѡ бл҃гъ и҆ чл҃вѣколю́бецъ.
Ли́къ: Спасѝ, хрⷭ҇тѐ бж҃е и҆ поми́лꙋй бл҃же́ннѣйшагѡ са́ввꙋ, митрополі́та варша́вскагѡ и҆ всеѧ̀ по́льши, и҆ господи́на на́шегѡ преѡсщ҃е́ннѣйшагѡ а҆ѳана́сїѧ, є҆пⷭ҇кпа ло́дзинскагѡ и҆ по́знаньскагѡ, богохрани́мꙋю странꙋ̀ на́шꙋ, вла́сти и҆ вѡ́инства є҆ѧ̀, настоѧ́телѧ и҆ прихожа́нъ ст҃а́гѡ хра́ма сегѡ̀ и҆ всѧ̑ правосла́вныѧ хрⷭ҇тїа́ны, гдⷭ҇и, сохранѝ и҆́хъ на мнѡ́гаѧ лѣ̑та.